Apocalipsis 10 - Wounaan Meu

Ẽwandam chog chi jua thierr ʉ̃gtharmua ẽsapdam dʉi beetarr

^1-2 Magtarr khur mua oo nʉʉ aawai, Ẽwandam chog dewam nem jua theeg simta ʉ̃gtharmua sĩi jʉʉnthumie bau thʉnʉm eemua beewi, mʉ dakhĩir bʉchaar garm bʉ phũas ee dʉnʉʉunaa bʉwe garm bʉ durr jẽb gaai dʉnʉʉuchejim. Mag simua pirm ich por ʉ̃r wai sĩejim. I khĩir, sĩi edau khĩirjo bʉ̃ʉʉ maach dau khakhaisamjo sĩewai i bʉ sĩi õtdau ʉ̃gthaag uu jẽjẽerkhamjota sĩejim. Ẽsapdam pa gaai pʉʉrthʉ khitʉmjã jua ee wai sĩejim.

³ Mag dʉnʉʉuchewi nem iek theeg äaa ajim. Mag äa a simʉn sĩi león puu a sim iekjo sĩejim. Mag irua äa abaawai pagthʉm siete narrauta dʉi i iek ʉkha, äaa ajierram.

⁴ Maimua mag pagthʉm siete narrau iekha dichdimaawai ya mua ẽsap gaai phãag ẽkha chirajim. Mamʉ magbaa ĩchab ʉ̃gtharmua mʉrʉg woun iekjo, —Jãg pagthʉm siete narrau nem jaaubarm pʉchdeu ũrtarr oob phãm; sĩi pʉch thãar eepai wai sĩsí ajim.

⁵ Magbaawai mag Ẽwandam chog bʉ ãb phũas ee dʉnʉʉunaa bʉ ãb durr jẽb gaai dʉnʉʉu sĩerrau ich juachaar garm jua ʉ̃gthaag edjãag ʉanaa magjim:

⁶ —Ẽwandam ichta ich mag meejã khaugba sĩerranaa mʉg edaujã ompaawi, mʉg jẽb, mʉg phũas maimua makhʉʉn ee nem thʉnʉm thum ompaatarr Jooi iekhau, mʉgbarm aigmua ya chadcha maachdeu jaau nʉmjo aimʉʉ pamgui ajim.

⁷ Ya ãbmiecharam Ẽwandam chogau sieteem ich trompeta sirbaadeewai Ẽwandamau ichdeu ich thãar eepai nem wauju khaphʉ sĩerr thumaa ich i jaaumienag jaautarrjo aagpamgui ajim chi Ẽwandam chogau.

⁸ Magbaawai mag edjã eemua mʉrʉg woun iekjo iekha sĩerrau deeu mʉrʉg, —Ar Ẽwandam chog bʉ ãb phũas ee dʉnʉʉunaa thoom bʉ durr jẽb gaai dʉnʉm aar mawia irua jua ee padam gaai ẽsapdam pʉʉrthʉ khitʉm eeurjãg wai dʉnʉm jeeu athamí ajim mʉrʉg.

⁹ Magbaawai chadcha mua i aar mawia ichig mag ẽsapdam jeeubaimaawai mʉrʉg, —Ya magan warre khobapʉi ajim. Nau pua i ee aauwain chadcha khũwaa mieljo khopʉiju; mamʉ pʉ bi ee pabaimaawai nem achaaga pʉ biiu ãwatbajugui ajim mʉrʉg.

¹⁰ Magbaawai mua chadcha mag ẽsap i jua eem auwi khobaadejim. Warran chadcha mua mieljo khũwaa khopʉijim; mamʉ ya mʉ jã gar paawaita sĩi nem achaaga mʉ biiu ãwatbajim.

¹¹ Magbaawai mag chi mʉrʉg ẽsap dee sĩerrau mʉrʉg, —Agtha Ẽwandamau nem waumaju pooma thʉnaawai puajã agjo phãju pooma chirʉmgui ajim, phoborpierr õor meu khĩir pogkhe amach meupierr nʉnʉidʉm ee durrpierr reinaanagpa jawaag.