Apocalipsis 1 - Wounaan Meu

¹ Mʉʉn Juanau, Jesucristo chog. Muata pãrag mʉchdeu ootarr jaaum ig chirʉm. Mʉg mua jawaagpam iekhan ich Ẽwandamaucha Jesucristoog jaautarrau. Mag ichig jaaubaawaita mʉ khãaipi auwi mʉrʉg jaaujim, jũrr mua ich iek ʉkha durrum khʉʉnag jaaumkhĩir. Mʉg iek thum ich jaaubarmjo chadcha jopcha aju khap amkhĩir, Jesucristoou ich chog ãb ʉ̃gthar ich dʉi sĩejemʉgta jaaujim, mag mʉ khãaipi atham ee jũrr magua mʉrʉg jaaumkhĩir.

² Magbaawaita Ẽwandamau Jesucristo dʉimua mʉchig oopinaa mʉchig ũrpitarrpa thumaa phã chirʉm.

³ Chi mʉg mua phãbarm ẽsap thʉ̃r sim woun onee aju; maimua onee ajurau ĩchab mʉg ich iek phã sim gaai Ẽwandamau nem thum ichdeu jaau sim iek ãbmua thʉ̃rmam ũrwia ag gaai jaau simjo i ipierraa wenʉrrʉm khʉʉn. Ya chadcha thum mʉg ẽsap gaai ichdeu jaau simjo obeberg maju dakkha pamam.

Phobor siete narr ee iglesiapierr Juanau ẽsap phãnaa aaidʉtarr

^4-5 Mʉʉn Juanau. Muata mʉg ẽsap phã deepʉi chirʉm Asia durr phobor siete nʉm ee Ẽwandam iek ʉkha nʉm khʉʉnag. Mua pãar kõit jeeu chirʉm, ichta warrgarwe ich mag sĩerranaa mʉg atagjã ich mag sĩerraju igwia, ich khu juupjem khĩirphee ich Ẽwandam Akhaar sĩerrʉm igwia, maimua Jesucristo chadam iek chaarcha jaauchetarr igwiajã jeeu chirʉm, pãar dau ee aug khaug paraanaa pãar ʉu wai nʉm dʉi ĩchab pãar khõinaa wai wenʉrramkhĩir. Mag Cristota meeba arrjo nacha iiu phiidʉwia mʉg reinaan thʉnʉm khãaijã iek theeg ʉ̃rcha sĩerrʉm. Ich ag Cristota maach daupigau ʉdʉraa ich thõopijim. Magbarmua maach khaibag chugpaapʉiwia

⁶ ich Aai anaa ich Ẽwandam athee maachta phadnaankha aujim, ich dʉi agdaujo iek thethe wenʉrramkhĩir. Irigta ãba thumaam khʉʉnau, “Ich appaita ãba Ẽwandam chaarkha sĩerrʉm” a iekhanaa, “Ichdeupaita warrgarwejã nem thum khaphʉnaa mʉg atagjã khaphʉ sĩerraju; maata maach Ẽwandamau” a tho iekhaju aai nʉm.

⁷ Cristo, Ẽwandam Iewaa, edjã baug ee urum thumaam khʉʉnau amach daúa ooju, i thõotarr khʉʉnaupa. Magbaawai durrpierram khʉʉnau amach daujã merag phewi, jũrr amach gaai mas aju khap, i okgau icharaucha bĩejurau. Magju anʉm chan seukhaawai khabam.

⁸ Ich Ẽwandamauta ich igwia, “Mʉchpaita nacharam ẽsapdau Ajonaa chi ãbmiecharam Zetajo chitʉm” a iekhaajem, ich warrgarwejã ich mag sĩerrawi mʉg atagjã ich mag sĩerraju Jooirau. Ichdeu mag sim aawai oob khĩirjumiet. Ichta Ẽwandamau, thumaam khʉʉn Por; i athee chan phithurm nem chukhum.

Khãaipi athamua maach Por Jesucristo ootarr

⁹ Mʉʉn pãach khod ar Jesús iek gaaimua pãachjo phithurg au pʉʉrba khitaajemuata pãrag mʉg ẽsap phã deepʉi chirʉm. Mag phithurg aaujeeb mamʉ, ich Jesucristoouta magʉm ãwataagjã juapá deejeewai, magʉmjã igba, phithurg jẽedʉ khitʉmua i aar barwi i khĩir wajaug oo wai chitaju. Ẽwandam iek jaau chitʉm dʉi Jesuu nem wau nʉrrarr mʉch daúacha oojerrta jaau chitʉm gaaimua, mau dojãrr phʉram Patmos anʉm gaai preso chirʉm.

¹⁰ Mag mʉ preso chirʉmta biek ãb domighed ich Ẽwandam Akhaarta mʉ gaai phẽs aicheewai, mʉ dau eerthʉg athamjo abarm ee, trompeta iekjota nem jẽbag mʉ eugarmua mʉrʉg iekhachewia,

¹¹ “Nau mua pʉchig nem oopibarm thumaa ẽsap gaai phãnaa Asia durr phobor siete nʉm ee mʉ iek ʉkha nʉm khʉʉn aar deebapʉi” ajim: “Efesopienag, Esmirnapienag, Pérgamopienag, Tiatirapienag, Sardipienag, Filadelfiapienag maimua Laodiceapienagjã agjo.”

¹² Mʉchig mag iekhabaichem khap aag awi mua ewag phʉʉrbanaa oowai, lámpara bʉ ausĩiujemta phĩr den phurii khitheem ãbam aig siete nʉm oojim.

¹³ Maimua mag lámpara siete nʉm jãrr mua oowai, woun ãb ich Jooi Iewaa Jesujoo simta ichkhaarjã araa correerjo phĩr den phuu khitʉmua ãi jʉ̃naa khajũa bʉ duurga khĩeb bʉ khãdau aar jũa dʉnʉm oojim.

¹⁴ Mag simʉn khĩirjug khaauga sĩerraawai sĩi lanjota pordam bäpphä khitajim, ich khĩirjug khaugau. Maagwai ich daúapai nem thum khaphʉ aajeewai, i dau oowain sĩi õtdaujota uujẽer uujẽer uujẽer sĩsid ajim.

¹⁵ I bʉ, sĩi nem inag õtdau ee bʉ̃ʉupinaa wau simjo nem theega sĩejim, broncejo. Mag nem theeg sĩewai sĩi uhbʉ oodʉnaajim, bʉ̃ʉrjã burrju khaba. Mag i bʉ broncejo sĩewai sĩi phuu khitajim. Mag sim iekha sim ũurwai, ichta thumaam khʉʉn khãai iek theeg sĩerraawai, sĩi phũasdau dapagta do igaau jurrdʉbaichem iekjo sĩejim, i iek.

¹⁶ Mag simua ich juachaar gar phĩdag siete wai dʉnaajim; ich i ee espaar khẽu mii khitʉm phõpá garm magwe dee khitʉmjã wai sĩejim, agua ich oomapham khʉʉnag bʉ̃ʉrjã ich jua jʉmpiba aag. Maimua i khĩir oowain sĩi edau pechagkham ee nem phuum oo nʉmjota maach dau perpermjo sĩejim, pod i dʉi khĩircha eerpaju khaba. Magta mʉrʉg mʉch daúacha maach Por Jesucristoou ich oopijim.

¹⁷ Mag oobarmʉn mʉʉn sĩi chi meemjota thʉbepjã chukhu i bʉkhʉrr buju aimajim. Mamʉ magbaawai ichdeu mʉ gaai pʉrnaa, “Oob jãphierram” ajim. “Mʉchta nem thum ompaaju nawe chirajim; mʉg durr thum owiajã mʉchta ich mag chirsiju khabahab” ajim mʉrʉg.

¹⁸ “Mʉchpai khabahab” ajim, “ar meewi deeu iiu phiidʉtarr; magtarr cha agtha iiu chirʉm, mʉg atagjã ich mag iiu chitʉm iekhau. Mʉchdeuta khap chirʉmgui” ajim, “jãagwaichata õor meepiju, maimua mag meewaijã chijã khʉʉnta khĩmie durr wetju” a iekhamajim mʉrʉg.

¹⁹ Maimua mʉrʉg, “Cha pʉchdeu nem oobarm dʉi nau pʉchig oopibarmpa ẽsap gaai thumaa phã sĩubá” ajim, “mʉʉgwai nem in thʉnʉm, maimua mʉgtarr khurjã nem obeberg maju thum phã sĩubá” ajim.

²⁰ Maimua mʉrʉg, “¿Pua khaphʉ chirʉ́” ajim “khani jaau sĩ ar mua mʉch juachaar gar phĩdag siete wai chirarr, maimua lámpara ausĩiujemjã phĩr den siete wai chirarr?” Magnaa ichdeupai, “Ar phĩdag siete narr, jã mag siete iglesia nʉm ee agjo pastornaan siete nʉm khʉʉnta jaau simgui” ajim. “Maagwai mag chi lámpara ausĩiujem agjo siete narr, jãkhʉʉn Asia durr mag iglesia siete nʉmta jaau simgui” a jaaujim mʉrʉg ich Cristooucha.