3 Juan 1 - Wounaan Meu

Gayo gaaimua Juan onee arr

¹ ¿Jãgpai chirʉ́ Gayo, khapeer wʉjʉu? Mʉ ich jooi Juanauta pʉrʉg mʉg ẽsap phã deepʉi chirʉm, chadcha mʉchdeu pʉ khõsi chitaawai.

² Cristo gaaimua khodam, muan Ẽwandamagta pʉ kõit jeeu khitaajem, jãg pʉch Ẽwandam dʉi ʉu chirʉmjo tagam nemdam waauwaijã wajaphata obeberkham dʉi pʉch kha monakhata chitamkhĩir.

³ Mʉ onee chirʉm chadcha, hermanonaan bee nʉm khʉʉnau jaauwai pʉ chadam iek gaaita ubʉ ogdʉba chiraajem a mʉchig jaauche nʉm ũrwia.

⁴ Mʉchdeu Cristo iek jaau chitʉm ũrwia ʉkhatarr gaaimua jãg mʉch chaainjo khitheem khʉʉn chadcharam iek gaai jaau sim ipierraa wenʉrrʉm a ũurwaita chadcha mʉ onee chiraajem; deeum nem jaau nʉm ũurwai chan jãgcha mʉ onee aba chitʉm.

⁵ Hermano, pua chadcha Cristo gaaimua maach khodkha thʉnʉm khʉʉn dʉijã Ẽwandamau waupim khõsi aajemjota aajem am dʉi; pari maagjem chan sĩi pʉch khapkhʉʉn aawai khaba, warpmua Ẽwandam iek jawaan bee nʉm khʉʉn dʉita pua mag wajapha aajem.

⁶ Mag amau mʉrʉg pʉ jaaucheewai amau chi ʉkha durrum khʉʉn khapan thʉnʉm dakhĩirta jaau naajim, jãga pua ʉu am khĩir jãsenkhajĩ. Jãkhʉʉn wounaan deeu pʉch aar weetwai Ẽwandamau waupi jaau simjo amau nemdam ig nʉm thumaa amag jʉr deebá, amach dʉi warramkhĩir.

⁷ Am jãg wenʉrrʉmʉn, chadcha Cristo iek chaar jawaagta jãg wenʉrrabahab; mag wenʉrrʉmjã Ẽwandam iek ʉkhaba nʉm khʉʉnag chan nem jeeuba wenʉrrʉm.

⁸ Magua maachdeuta jũrr amau nem ig nʉmjã khap aju aai nʉm, mag amau nemdam ig nʉm dee nʉmua warag Ẽwandam iek chaarta jaaumkhĩir. Mag nʉm aig maadeu warag Ẽwandam iekta maach paarmua aaidʉpi nʉm.

Ejemplo wajapham jaaunaa ejemplo khaigbamjã jaautarr

⁹ Mua jam chi ʉkha durrum khʉʉnag ũrmkhĩirta nawe mʉchdeu ẽsap phã deepʉitarr gaai jaaupʉijim, ʉu mag Cristo iek jaau wenʉrrʉm khʉʉn pãach ee recibiimkhĩir. Mamʉ magtarrta Diotrefeeu, ichta thumaam khʉʉn khãaijã ʉ̃rpai am khõsi sĩewai, irua mʉ iek asekasmapha sim.

¹⁰ Ich jãg chitʉm athee, mʉchcha jam baarwai mua pãar dakhĩir irig iekhaju; maumua mua ũurwai ichdeuta jãg mʉ eugarjã seukha chadam iek khabampa õrag jaau nʉrraajem aajem. Pari wajapcharan mag seukha simpaijã khaba, hermanonaan warpmua Ẽwandam iek jawaan beewaijã õor recibiiba simta bigaaum khʉʉnau recibiim iigwaijã ideu recibiipiba aajem anʉm. Mag nʉm ee ãbmua khãijã õor recibiimʉn mag hermanodam warre iglesia eemuajã jʉrpʉipiejem aajem, mag warpmua berr recibiitarr kõit.

¹¹ Hermano, oob pua ejemplo khaigbam chan au chitam; mag khãai ejemplo wajaphamta athá. Pua khaphʉ sim, ar chi nem khaigbam waaujem khʉʉnan Ẽwandamjã khaugba naawaita mag nem khaigba wau sĩerrjeem; pari nem wajapha wau nʉm khʉʉnan Ẽwandam dʉi naawaita mag nem wajapha waaujem.

¹² Magta sim maach hermano Demetrio. Chadam iek ichdeu khaugtarr ipierr nem ajapha wau simuata ich iiucha jaau simjo merag chukhu khaphʉ api sim, ichdeu chadcha nem wajapha wau sim. Magua thum chi ʉkha durrum khʉʉnau i eugar wajapha jaaujem. Mʉchdeujã mag khaphʉ chiraawaita irua chadcha nem wajapha wau sim a chirʉm. Pua khaphʉ sim, mua chadcha nem jaau chitʉm.

Ãbmiecharam salud

¹³ Mua pʉrʉg nem jaauju pooma wai chirʉm; pari mʉg ẽsap gaai pod thum jaaupʉibam.

¹⁴ Mʉchdeun pʉ dʉi jopcha khĩircha ooju khĩirju chirʉm; maigta maach iyʉʉ aju.

¹⁵ Gayo, pʉ khõinaa chiramkhĩir muan Ẽwandamagta pʉ kõit jeeu chiraajem. Pʉ khapkhʉʉn mawaam khʉʉnaujã pʉrʉg salud deepʉi nʉm; maagwai jũrr mʉ khapkhʉʉn pʉch aram khʉʉnagjã agjo amachpierr mʉ salud jaaupet. Mʉgdampai ajim pʉrʉg jaaum ig chirarr. Ayoo kake, Pʉch khaphʉm, Juan