2 Timoteo 4 - Wounaan Meu

¹ Timoteo, Ẽwandam Jesucristo dʉi nʉm dakhĩir mua pʉrʉgan, Cristoou maach peerdʉ aaujem iek jaau nʉmta warag penaa a chirʉm. Pua khaphʉ sim, ich mag Cristoouta õor porkhaan beem ed thumaam khʉʉnag jaauju, ich aar auju wa aubaju. Mag sim dakhĩirta pʉrʉgan,

² õrau mag pʉchdeu jaau nʉm iek ũrmapha awiajã, ichiita jaaubá a chirʉm. Cristo iekta õrag ʉkhapi auju ẽkhabá; khaigba wenʉrrʉm khʉʉnag ikhʉaba iekhabá; ar Ẽwandam iek athee kha thũu nʉm khʉʉnjã khĩir onee apibá. Magnaa nem jaauwaijã ithũuta nem jaaubá.

³ Mʉʉgwaiweran agtha õrau ũrju nʉm. Mamʉ mʉg atag paawai chan mʉg iek wajapham jaauwaijã õrau bʉ̃ʉrjã khõchkhabaju. Iek wajapham jaau nʉm khʉʉn iek ũrju khãyau, warag amach maestronaan amach khĩetta jʉr auwi amachdeu ũrm khõsimpaita amachig jaaupiju.

⁴ Mag nʉm gaaimua chadcharam iekhagta warag oojã ooba, sĩi parhoobam iek jaau nʉmʉgta ee aju.

⁵ Mamʉ pʉ chan oob magʉm khʉʉnjo chitam; magju khãai thumaam khʉʉn dakhĩir agpierraata chitá. Phithurg au chitawi khãijã ãwatbá. Tagam nem wauju khãai, Jesucristo iek maach peerdʉajem jaau nʉm gaaipaita chitʉmua pʉchig phidag jaautarrta wajapha wau chitá.

⁶ Timoteo, warrgar Ẽwandam athee nemchaain kheechjerrjo mʉʉn ya amau juauta thõopʉiju dakha pamaawai mʉg atag jopcha mua tag pʉ juag oobaju.

⁷ Ẽwandam i jaau nʉmta sĩi khajap jãau chaar jãau nʉmjo ʉdʉʉr mʉch deeba, mʉʉn ya ag iek kõit woun atheemjo werbʉbarm. Woun ãb khaphig nʉrrʉmua ich barju atarr aar barbaimamjo, muajã ĩchab Ẽwandamau mʉchig phidag deetarr thum waubapʉim. Maach Por Jesucristo iek mʉchdeu ʉkhatarrjã isegba agtha ich mag ʉkha chitʉm.

⁸ Mʉch mʉg phidkhabarm jũrran, jãg khaphig nʉm aig chi ganbarm khʉʉg porsir deejemjo, mʉrʉgjã ʉ̃gthar pabaimaawai maach Por Jesucristooucha, “Pʉ ʉu mʉ na ajapha chitajim” awi nem deeb khaba deeju, ichdeuta thumaam khʉʉn dʉi agcha ich jua khap nem waaujeewai. Mamʉ mag irua nem deeju chan mʉrʉgpai khaba, ar thum chadcha i deeu beepim khõsi nʉ durrum khʉʉnagjã irua deeju.

Ãbmiecha Timoteoog nem jaautarr

⁹ Timoteo, mʉ ap chitʉm jopcha mʉ oobahur.

¹⁰ Mʉʉn mʉch appaita chirʉm, Demaaujã Tesalonicaag mam khõchgau mʉ barpʉabajeewai. Sĩi mʉg jẽb gayam nemegta ʉ̃rcha ee am khõchgau mʉrʉgjã ooba petajim. Crescentejã Galaciaag petaawai Titoou jũrr Dalmaciaag petajim.

¹¹ Mʉiguin Lucas appaita mʉ dʉi sim. Marcos jʉr aunaa irig jaauwi pʉch dʉi aipidú; mua mau i igju mʉch juag oomkhĩir.

¹² Tiquicoon chadau mʉchdeuta Efesoog pʉijim.

¹³ Mag pʉch beewai Troas phobor ee Carpo di aig mʉ capote pʉatarr aipidú. Mag dʉi ĩchab mʉ ẽsapjã phepidú. Thum phebeeba awiajã ar pergamino gaai phã sĩsidʉm chan oob phepʉam.

¹⁴ Alejandro chi jierr den nem waaujemuan wajapta mʉ khaibag waubarm. Irua mʉ dʉi jãgtarr jũrr maach Por Ẽwandamauta khap chirʉm, ichdeu ampierr i dʉi aag.

¹⁵ Timoteo, jãg dʉi khai khĩir khaphʉ chitá. Jãgua chan maachdeu Ẽwandam iek jaau wenʉrrʉm khõchkhaba, warag chaaurta iekha sĩerrʉm.

¹⁶ Nacha chi thethemnaanau mʉ amach aar thʉ̃rpʉiwi iekhathuurwai, ni ãbjã mʉ bigaau chukhu ajim, mʉ ipierr dʉi mʉ kõit iekhaag. Magju khãai sĩi thumaam khʉʉnau mʉrʉg oobamjo ajierram. Amau jãgtarr paar Ẽwandamau amag ag iek eudʉba akhiin ʉu akham.

¹⁷ Amau bʉ̃ʉrjã mʉ khaigperbajierrab mamʉ, maach Por Jesuuta chadcha ʉu mʉ eeg oowia mʉrʉg ich juapadamjã deejim. Mag gaaimua ʉu mua khĩirdam ubʉ maach peerdʉajem iekjã jaauwi parhooba judionaan khabam khʉʉnaupa ũrjierram. Mag, maach Por Ẽwandamau ʉu mʉrʉg juapadam deewiata, khum i ee chirʉmjo chirarrjã, ʉu mʉ peerdʉjim.

¹⁸ Mua khaphʉ chirʉm ĩchab, mʉg durr gaai mʉg khaibag pom thʉnʉm eemuajã irua mʉ peerdʉ auwia mʉ thʉa wai nʉrraju, khaigbam khʉʉnag chig apiba ʉ̃gthar ichta thumaam khʉʉn Porkha sim aar barmkhĩir. Thumaam khʉʉnau iita tho iekhaju aai nʉm, ichta ich mag wajaug khitaawai.

Pabloou salud deepʉitarr

¹⁹ Timoteo, mʉ salud Priscaag jaaubá, Aquiloog maimua Onesíforoogjã agjo, thum ich chaain dʉi ich ʉʉiragpa.

²⁰ Erasto Corinto phobor ee thʉbajim, maagwai Trófimo mor mas sim mua werpʉajim Mileto phobor ee.

²¹ Ed khõrg jaar paju nawe pʉchdeujã jopcha mʉ oobahur. Pʉrʉg salud deepʉi nʉm Eubuloou, Pudenteeu, Linoou, Claudioou maimua thum Cristo gaaimua maach khodkha thʉnʉm khʉʉnaujã agjo pʉrʉg salud deepʉi nʉm.

²² Timoteo, maach Por Jesucristoou pʉ thʉa wai nʉrrapim khõsi chirʉm dʉi tagam khʉʉn dʉijã Ẽwandamau ʉu apim khõsi chirʉm. Ayoo kake, Pablo