2 Timoteo 3 - Wounaan Meu

Jãga thʉnaaju khai Ẽwandamau mʉg durr i agkhaimʉʉ paawai

¹ Timoteo, ĩchab khaphʉ abá: Mʉg atag ya Ẽwandamau mʉg durr i agkhaimʉʉ paawai warag Ẽwandam iek ʉkhajujã phithuurga aju.

² Mag jaar paawai õrau amachpaita wir aig khĩirju sĩsid aju. Mag nʉm dʉi phatkhonagta eenaa ĩchab wir aig amachpai tho iekhaju. Ẽwandam khõchkhaba warag parhooba chaaur iekha sĩsidnaa, dennaanpan amach dennaanau iekhaawaijã warag dʉi ʉkha ʉkha sĩsid aju, amach dʉi ajapha aajerrjã deeu ewag khĩirjuba. Mʉg maadeu ʉkha nʉm iekjã õrau ʉkhamaaugau warag amachdeu ampierr aju:

³ dich dennaan dʉi agdaujo chikham daupii khaba, bʉ̃ʉrjã dich khapeen dau aug khaug chukhu aju. Magnaa nem ieknem, nem khaigbam wauju khĩirju athamjã pod ãwat auba, dich khapeen gaaijã jua khʉabanaa, dau lokoo, bʉ̃ʉrjã nem wajapham khõchkhabaju.

⁴ Mag nʉm dʉi ĩchab dich khapeen dich dʉi wajaug aajerr khʉʉnjã imeraa dakhũgne pʉr auwi khaibag wauju. Eem khʉʉnau amach thethemkha nʉm awia wir aig amachpai thonaa, Ẽwandamau nem khõsimjã wauba sĩi amachdeu nem khõsimʉgta ee aju.

⁵ Magʉm khʉʉnau amach iiupain chadcha ʉkha nʉm aju. Mamʉ mag amachdeu ʉkha nʉm anʉmjojã wenʉrrabaju mag wenʉrraag Ẽwandamag ʉdʉʉr ich jua theeg amachig deepiba naawai. Õor mag nʉrrjeem khʉʉn dʉi khĩir khaphʉ abá.

⁶ ¿Khan jãgwia mua mag chirʉ́? Mua mag chirʉmʉn, jãgʉm khʉʉnauta parhoob dipierr dub wenʉrrʉmua ar ʉʉin sĩi bʉ̃ʉr abaawaijã chikham iek ʉkhakharrso sĩerrjeem khʉʉn amachig paa aumaajeewaita mag chirʉm. Magʉm ʉʉinta parhoobam pekau pom amach khõchagpierr nem wau sĩerrjeem khʉʉnau.

⁷ Amachigan warag khĩirjug ajaphamta khaug wetum anʉm; mamʉ mag nʉm chan maach peerdʉajem iek chaar chan bʉ̃ʉrjã khaugba nʉmta mag nʉm.

⁸ Ich jãgta ajierram warrgarjã benkhʉʉn Janes aajerrau ãb agjo Jambres aajerr dʉimua. Moiseeu Ẽwandam iek jaau khitaawai jũrr makhʉʉnau warag i ichaaur ajierram. Ĩsjã ich agjota nʉm. Ar jãg nem khaigba jaau wenʉrrʉm khʉʉnan sĩi warag khĩirjug memerkhomjota sĩsidʉm. Mag gaaimua jãgʉm khʉʉnan ya chi okhoomta nʉm, Ẽwandam iek ʉkhaba naawai.

⁹ Par am jãg nʉm, jãgʉm khʉʉnau pod ich jãg õor khũgur wai wenʉrrabam. Jãg naawia mag warm khʉʉn Moisés ichaaur arr khʉʉnjo õrau am igwia “Jãkhʉʉnan bʉ̃ʉrjã khaugba nʉmta jãg wenʉrrʉm” a khaug athaawai, tag amag ee abaju.

Pabloou ãbmiecha Timoteo wawitarr

¹⁰ Puata chadcha mua nem jaau chirʉm ipierraa aajem. Pua khaphʉ sim, mʉ jãga chitaajẽ maimua khantheeta mʉ mʉg chitʉ́. Pua khaphʉ sim, õor dʉijã mʉ khĩir machag chukhu chitʉm. Magju khãai mua thumaam khʉʉn kha khõsi chitʉm dʉi ĩchab mʉ Ẽwandam gaaijã ubʉ chirʉm,

¹¹ õrau mʉch dʉi khaigba aawai mʉch dau aug wau nʉmjã igba magʉm ãwat chitaag. Pua khĩir eyaa sim jãga ajierrá mʉ dʉi Antioquía phobor ee, Iconio phobor ee maimua Listra phobor eejã agjo. Amau chadcha peer mʉ thõojierram, mamʉ maach Por Ẽwandamau ʉu am jua eemua mʉ peerdʉ aujim.

¹² Ar chadcha Jesucristo denkhanaa ãba i atheepai nem wau wenʉrram khõsi nʉm khʉʉnan, chadcha õrau am dʉi khaigba aawai dʉrrcha am dau aphʉʉ aju.

¹³ Mamʉ ĩchab ar jãg õor khũgurnaa khaigba nem wau wenʉrrʉm khʉʉnan mʉg atag paawai warag athuucha paaukhamaju, amachpata dosãtau khũgur wai sĩewai.

¹⁴ Mamʉ pʉ chan oob magʉm khʉʉnjo chitam. Magju khãai, chi jaautarr khʉʉnaujã chadam iekta pʉchig jaautarr khap, pʉchdeu Ẽwandam iek khaugtarr gaaita warag ubʉ thierrkha chirsí.

¹⁵ Mag nʉm dʉi ĩchab Ẽwandam iek phã sĩsidʉm gaai pʉchdeu erraawe khaugtarrta khĩir eyaa abá. Mag pʉch bʉ̃rʉʉwe khaugtarrdamuata pʉrʉg khĩirjug wajapham deejim, pʉchdeu thãraucha Jesucristo iek ʉkhabaawai peerdʉmkhĩir.

¹⁶ Ẽwandam iek phã sĩsidʉmʉn, thum ich Ẽwandamaucha khĩirjug deewi phãtarrau. Maguata sĩi õrag jawaagjã nem wajaugnaa aguapai õrag meeurrau sĩwaagjã nem wajaug sim. Õor wawiegjã nem wajaug sim, aata jaau nʉʉ jaau nʉʉ aadee khaphʉ aadee Ẽwandam dau najã agchanaa õor dau najã agcha wenʉrramkhĩir.

¹⁷ Jãg iek pua khaugtarrauta ar pʉjo Ẽwandam chogkham khõsi nʉm khʉʉnag khaphʉ apiejem, jãga amau Ẽwandam athee amachdeu waum khõsimpierr waau khaphʉ aju.