2 Timoteo 2 - Wounaan Meu

Jãga soldaaunjo Jesucristo chogkhaju aai nʉ

¹ Timoteo, pʉʉta mʉch chaai chaarjo wai chitaawai pʉ wawikhim: Pʉch khĩirjugaupai nem jaauju khĩirjuba Jesucristoou ʉu pʉch eeg oowi pʉchig juapá deetarrauta i iek jaaubá. Pua magta amʉn, ich mag nem jaau chitʉmuata warag i dʉi pʉ juapá jãpmaju.

² Õor khapanag dakhĩir mua jaaujerr pʉchdeu ũrwi khaugtarr iek jũrr ar pʉchdeu oowai chadcha deeum khʉʉnagjã jaau wai nʉnʉʉu ajojoom khʉʉnag jaaupet, magbaawai jũrr makhʉʉnau agjo deeum khʉʉnag jaaumkhĩir.

³ Pʉch chadcha Jesucristo chogkha chitʉm gaaimua bʉ̃ʉrjã pʉch dau aphʉʉ ajujã igba, soldaaunjo i chogkha chitá.

⁴ Pua khaphʉ sim, soldaaun abarm chan mag sĩi ich phidagjã khaugba nem parhoobam gaaita oo sĩi aba aajem. Magju khãai ʉu ich porkha simjã ich gaaimua onee amkhĩir, ãba ich phidag waujupaita khĩirjuajem, ich por ichaaur aju khĩirjuba.

⁵ Maimua ĩchab jemkha nʉmua premio gaanjem khʉʉnjota chitá. Pua khaphʉ sim, amau amach reglamento wai nʉm gaai jaau simjo jemkhabam chan pod mag premio gan auba aajem. Magua puajã Ẽwandamau pʉchig jaau simjo nem thumaa wajaphata waubá.

⁶ Ich agjota sĩebahab nemjĩir jĩirwaijã. Phidkhaba arr khʉʉnau pod amachdeuta nacha ag eem khoju khaba nʉm. Juacho khaiso nem jĩir nʉm khʉʉnauta mod paarpaawaijã nacha ag eem khoju aai nʉm.

⁷ Cha mua pʉchig jaaubarm wajapha khĩirjubá. Pua mag wajapha khĩirjumʉn, maach Por Jesucristoou pʉrʉg khĩirjug deeju, jãga ich iek jaauju aai sĩ a khap amkhĩir.

⁸ Mag mua jaau chirʉm khĩirjunaa warag jaaubá, jãga maach Por Jesucristo rey David khararr ag chaain ewagam khʉʉn eemkha sĩerrta meewi deeu iiu phiidʉjĩ. Ich ag iekta muajã ich mag jaau chitʉm, ajapcharan maach peerdʉajem iekma.

⁹ Mag iek jaau chitʉm gaaimuata mʉg phithurg wau chitʉm dʉi õor thõotarrjo ĩs warag mʉ preso wai nʉm. Mamʉ mʉg mʉ preso chirʉm gaaimua chan oob amau Ẽwandam iek mag aaidʉpimaaugau awi, cha mʉ wai nʉmjo ãbam aigpai i iek pʉr wai naaju amiet.

¹⁰ Maguata muan warag maach peerdʉajem iek aaidʉpim khõchgau, ich jãg phithurgjã igba ãwat chitaju, mʉg atag Ẽwandamau ich iek ʉkhapi aumam khʉʉndam ʉu amkhĩir; mag Jesucristo gaaimua peerdʉ nʉisiewai ich mag i sim aar wenʉrramkhĩir.

¹¹ Cha mua jaau chirʉm chan seukhaawaijã khabam: Maach i dʉi wenʉrrʉmta khechmʉn, magan ĩchab ʉ̃gthar pawijã ich mag i dʉi iiu wenʉrraju.

¹² I gaaimuata phithurg au wenʉrrʉmjã magʉm igba nʉmʉn, magan ĩchab irua durr jʉ̃a sim aar pawijã maach iek thethe wenʉrraju i dʉi. Mamʉ maadeuta i iek ʉkhamapham iekhau i khaugbam amʉn, magan maach meem edjã agjo irua maach aubaju iekhau, “Muajã pãar khaugba chitʉm” aju.

¹³ Iruata nem magju abarmʉn, ich magta aju ich igbam khʉʉn dʉi. Maadeun dichdeu nem wauju atarr ichaau pawia wauba awiajã, ichin ich iekhatarrjo chadchata nem wau sĩerrʉm, pod ich iekhatarr meerju khaba sĩerraawai.

Jãga Ẽwandamau khõsimjo i chogkhaju aai nʉ

¹⁴ Timoteo, ar sĩi jãg maadeu igmapham iek igphobaademjã pʉa chʉuu aajem khʉʉnag deeu phʉʉrba jaaubá, tag jãgʉm iek gaaipai ich jãg wenʉrram ugua. Jãgʉm iek chan bʉ̃ʉrjã maadeu nem igbata sĩsidʉm. Jãgʉm khʉʉnaun sĩi jãg iekha wenʉrrʉmua warag õor khaibagta wau nʉm.

¹⁵ Ãba Ẽwandam na wajapha chitajuuta ẽkhabá, wajappha i iek jaau khaphʉ jaau chitʉmua. Magaag atheen õor amach ajapha phidkha nʉm gaaimua chigag chukhu naajem khʉʉnjo abá, chadcharam iekta ag eyaa jaau chitʉmua.

¹⁶ Ar sĩi maadeu igmapham iek iyʉʉm khʉʉn aig dʉi par iphithur iyʉʉ aju khãai, pʉchta warag chaaug pet. Pua khaphʉ sim, ar sĩi jãgʉm iekpai ig iyʉʉm khʉʉnan, sĩi amachdeupaita warag Ẽwandam na amach khaibag wau nʉm dʉi

¹⁷ mag amau jaau wenʉrrʉm iek ũr nʉm khʉʉn khĩirjugpata warag ãr wenʉrrʉm. Imeneo dʉi Fileto magta wenʉrrʉm.

¹⁸ Maguata amach mag wenʉrram khõchgau warag amachta mag maach Ẽwandam iek chaar eemuajã oberdʉtkhawi sĩi nem parhooba jaau wenʉrrʉm. Mʉg atag okhar maach phiidʉtkhajuuta am iek mag ya maach iiu phiidʉwi nʉm aajem. Magʉm iek ũrwi ãaur khʉʉnau ʉu Cristo iek ogdʉba ʉkha narrta ya warag iseg wetum.

¹⁹ Par amau mag amach iphithur amach khõchagpierr jaau wenʉrrab mamʉ, Ẽwandam iek chan cambieba ich mag sĩerrʉm. Mag sĩewai ich iek gaai, “Maach Por Ẽwandamau ich chaainan thum wajapha khaphʉ sĩerrʉm” a phãnaa ĩchab, “Thum maach Por Ẽwandamag jeeu wenʉrraajem khʉʉnan amach khaibag isegju aai nʉm” a phã sim.

²⁰ Pua khaphʉ sim, riknaan deg jua choogjem nem khĩir pogkhe thʉnaajem, phatkhon den dʉi phĩr denpa. Pari mag appai khaba, pa denjã paraanaa jẽb denjã thʉnaajem. Am nem mag sĩsidʉm ãaur khʉʉn sĩi parhooba jua chogaagau; mamʉ ãaur khʉʉn chan mag sĩi parhooba ag ee jua chogaag khaba, kharii ich igam edta iigjem.

²¹ Mua pʉrʉg jaaukhim, mʉ iek ũrbá: Maach chan mʉg nʉm aig sĩi parhooba jua chogaag atheem nemjo khaba, nem wajapha wau nʉm gaaita maach Por Cristoog ʉdʉraa dichta ich jua choogjem khapiju aai nʉm. Mamʉ magaagan i dau na bʉ̃ʉrjã khaibag chukhuta naaju aai nʉm. Mag khaibag chukhuta nʉmʉn chadau, irua ichdeu igam aig maach igju, ich athee nem wajapha waumkhĩir.

²² Timoteo, ar ẽwannaan amachdeu khõchagpierr nem waaujem khʉʉn khĩirjug oob pʉch gaai ʉ̃rpapim. Mag khãai ar par iiupai khaba chadcha maach Por Ẽwandamag jeeu durraajem khʉʉn dʉi chitʉmuata Ẽwandam dau na agcha chitaju ẽkhanaa irua nem khõsimpaita waubá. Maadeu ʉkha nʉm iekjã bʉ̃ʉrjã ogdʉba ʉkhanaa dich khapeenjã thumaa kha khõsi abá, am dʉi khõinaa chitʉmua.

²³ Mamʉ ar maadeu igmapham iekta parhooba jaau wenʉrraajem khʉʉn dʉi chan oob am ipierr dʉi magʉm gaai par pʉch iphithur iyʉʉ chitam. Ya pua khaphʉ sim, jãgʉm iek gaaimuan sĩi warag chikham ipeer ahaujii awi, warag khĩir khʉʉukha phobaadep aajem.

²⁴ Pua khaphʉ sim ĩchab, maach mʉg maach Por Jesucristo chogkha nʉm khʉʉn chan pod dich khapeen dʉi meeukha nʉrrjee aju khaba nʉm. Mag khãai thumaam khʉʉn daar wajaphata wenʉrraju aai nʉm, Ẽwandam iekjã wajapha jawaag.

²⁵ Mag jaauwaijã ar warag chaaur ʉkha ʉkha sĩerrjeem khʉʉnagjã jaau khaphʉ ithũu jaauju aai sim. Maadeu khaugbam, mag ithũu jaaumam gaaimua khãijã Ẽwandamau am khĩirjug ichig khĩirjupi auju. Mag akhiin khaugbaju arr khãijã ʉu Ẽwandam iek chaar khaphʉ aadeewai

²⁶ meperau sĩi ichdeu nem khõsimpierr waumkhĩir ich las ee khõokha wai simjo narrjã ʉu peerdʉtkhaju.