2 Timoteo 1 - Wounaan Meu

Salud

¹ Mʉʉn Pabloou, Jesucristoou ich i jaaumkhĩir jʉr autarr. Mag jʉr auwi, Ẽwandamau ich khĩrau mʉ pʉim khõsi pʉijim, ich iek jaaumamua warrgarwe thãrau ich iek ʉkha nʉmʉn Jesucristo gaaimua irua peerdʉ auju a jaautarr iek õrag jaaumkhĩir.

² Timoteo, pʉʉta mʉch chaaijo daupii wai chitaawai pʉrʉg mʉg ẽsap phã deepʉi chirʉm. Muan Ẽwandam maach Ayau maach Por Jesucristo dʉimua pʉ dau aug khaug paraanaa pʉ ʉuu wai nʉm dʉi khõinaata pʉ wai wenʉrrapim khõsi chirʉm.

Chigag chukhu Cristo ig iyʉʉ aju aai nʉm

³ Timoteo, pʉ igwi khĩir eyaanaa edaram magwe Ẽwandamag ʉu ajim a chiraajem, irig jeeupierr. Mua mag irigpaita jeeunaa ãba i atheepaita phidkha chitʉmʉn, ich jãg warrgarwe ĩchab mʉch jooinau aajerrjo Jooi dau najã mʉch khĩirjug ajapha chirʉm khapta mʉg phidkha chitʉm.

⁴ Agtha khĩir eyaa wai chitaajem, ar maach ayoyoo khaawai pʉ dauhi paraa thʉnarr. Magarr aa deeu pʉ dʉi oom khõchag chirʉm, mag oobaawai onee chirsieg.

⁵ ¿Khan jãgwi mua mag chirʉ́? Mua mag chirʉmʉn, pua chadcha pʉch thãraucha Cristo iek ogdʉba ʉkha sim mʉchdeu khaphʉ chiraawaita mag chirʉm. Ich mag ʉkhaajeejim pʉ ãdhũan Loidaau pʉ ãd Eunice dʉimua. Maagwai mua khaphʉ chirʉm, puajã ich agjo ʉkha sim.

⁶ Mag gaaimua mua pʉ wawí chirʉm: Ar mʉchdeu pʉ ʉ̃r jua ausĩubaawai Ẽwandamau pʉrʉg ich jua theeg deetarr, oob sĩi ich jãg par wai chitam. Magaag warrjã agua phidkhamkhĩirta Ẽwandamau pʉrʉg mag ich jua theeg deetarrau.

⁷ Irua maachig ich Akhaar chi jua thierrta deebajieb, õrag inag chukhu ich iek jaaumkhĩir. Mag Akharauta maachig dich khapeenjã kha khõsi apinaa nem waauwaijã wajapha khĩirjunaata nem waupiejem.

⁸ Timoteo, oob pʉchdeu maach Por Jesucristo khaugtarr igwia õrag jaauju chigaa chiram, ni Cristo gaaimua mʉ mʉg preso chirʉm õrag jaaujujã oob chigaa am. Magju khãai Ẽwandamau pʉchig juapadam deetarrau warag mʉ ipierr dʉi maach peerdʉajem iekta jaaum khõsi jaaubá, agʉm gaaimua pʉch aphʉʉ ajujã khĩirjuba.

⁹ Ẽwandamaun maach peerdʉ auwi sĩi pekau chukhu ich atheepai wenʉrramkhĩirta maach jʉr aujim. Mag maach jʉr autarr chan mag ichdeu oowai maachdeu nem wajapha wau wenʉrrʉm gaaimuajã khaba, warrgarwe ich Ẽwandamau mʉg durr thum ompaaju nawe ich garmua maach eeg oowia, Jesucristo gaaimua maach khĩir jãsenkhawia, ichdeu khõsi simjo wenʉrramkhĩirta maach jʉr aujim.

¹⁰ Mag warrgar maach khĩir jãsenkhatarran maach peerdʉajem Jesucristo pʉitarr gaaimuata ĩs ewag pawiajã khaphʉ nʉm. Magtarr aigmua ich Jesucristoouta maach dajẽegjem jua theeg chukhu apʉinaa jũrr maach peerdʉajem iekta ʉ̃rpai apijim. Magtarr aigmua ĩchab warr maach meewai ich mag okhoo wenʉrraju arrta ʉ̃gthar oberju aai apijim.

¹¹ Mag ich iek jaaujem khamkhĩirta Ẽwandamau mʉ jʉr auwi judionaan khabam khʉʉn ee pʉijim.

¹² Magtarr aawai mag iek jaau chitʉm gaaimuata chadcha mʉg mʉ phithur da aphʉʉ chitaajem. Mag chitab mamʉ jãgʉm iek gaaimuata mʉʉn wajappha khĩir naau chitaajemjã aba chitʉm. Mua khaphʉ chirʉm, khai iekta mʉchdeu ʉkha chirʉ́. Mag ãba Ẽwandam iekta mʉchdeu ʉkha chiraawai i jua theeg simjã mua khaphʉ chirʉm. Maagwai ich aar mʉch thʉ̃r nʉm ora mʉch thʉa wai nʉrrajujã khaphʉ chirʉm.

¹³ Timoteo, ar iek wajapham maach Ẽwandam den mua jaau chitarr ũrwi pʉchdeu khaugtarrta wajap khĩir eyaanaa agpierr chitá. Magnaa jãg pʉchdeu ʉkhatarr iek ich jãg ogdʉba ʉkhanaa, Cristoou ich garmua maach khõsi arr gaaimua i dʉi wenʉrraawai, pʉch khapeen kha khõsi chitá.

¹⁴ Ẽwandam Akhaar maach ee sĩejem ag jua theegau Ẽwandamau ich iek pʉchig jaaupitarr wajaphata jaaubá; chikhamnagjã oob chaauraa jaaupim.

¹⁵ Pʉrʉg khap amkhĩir jaaukhim: Ẽwandam gaaimua maach khodkha thʉnʉm khʉʉn Asia durrmua mʉ dʉi ãba beetarr khʉʉnau ya tag mʉrʉgjã ooba mʉch appai mʉ barpʉajierram. Chi mag mʉ barpʉatarr khʉʉn ee Figelo Ermógenes dʉi narrjã makhʉʉnaujã mʉrʉg ooba sĩi wetjierram.

¹⁶ Onesíforoouta mʉg mʉ cárcel deg chirʉm oowia bʉ̃ʉrjã chigag chukhu biek khapan ʉu mʉ khĩir jãsenkhaajerr aawai Ẽwandamag i kõit jeeu chirʉm, ich chaain dʉi ich ʉʉipa eeg oomkhĩir.

¹⁷ Ichdeuta ich Roma barbaichem bʉrre, bʉ ʉ̃ijã chukhu, mʉ jʉr phʉʉrdʉ khitʉʉ awi ʉu mʉ chirʉm aar beejim.

¹⁸ Pua mʉ khãyaujã wajapcha khaphʉ chirʉm, jãga i phidkhaajeejĩ Efeso phobor ee sĩejeewai. Magua mua pʉrʉg tag jaaubam. Irua mʉch dʉi jãgtarr jũrr, deeu ũmaai Cristo beem ed Ẽwandamag i dau aug khaugpim khõsi chirʉm.