2 Tesalonicenses 2 - Wounaan Meu

Cristo beeju na woun ãb chi khaigbam beeju jaautarr

¹ Khodamnaan, maach Por Jesucristo pierrwai maachin chadcha i dʉi nʉisiju. Mamʉ mag i beeju jaau nʉm gaaimua chan

² oob parhoobam khʉʉnag ʉdʉʉr pãach khũgurpimiet, Ẽwandam iek awia pãachig jaau nʉmua, sĩi õor ijẽjẽbkham ũrwia, wa ẽsapjom khãijã maar i gaai thʉwia parhooba pãach aig deepʉi nʉm gaai ya maach Por Jesucristoon barbaichem a jaauwaijã oob magʉm gaaimua pãach khũgurpimiet.

³ Ãbmua khãijã pãachig mag jaauwai maan seukhaawaiu. Ich Jesucha beeju na ichiita woun ãb chi khaigbam mʉg jẽb gaai sĩeicheju. Mag wounauta õor Ẽwandam dʉi meeukhapiju. Mamʉ mʉg atag paawai Ẽwandamau jũrr i gaaita jua khʉaba ich mag i gaai mas wai nʉrraju.

⁴ Pari ichta mʉg jẽb gaai sĩweran ich mag wounauta Ẽwandam igwia nem jaau nʉmjã bʉ̃ʉrjã khõchkhaba ni sĩi irigjã jeeupimapha aju. Maguan mawia ichta Aai i jeeujem degjã jupimaju; mag jupimawia iita Ẽwandamau aju, ichdeupai.

⁵ ¿Pãrau khĩir ee paba nʉ, ar mʉ pãar aar chiraawai ich mag iek mua pãachig jaaujerr?

⁶ Pãrau khaphʉ nʉm ĩchab, khaniuta mʉʉgwaiwe i beepiba sĩi ãba ich beeju ed aadeewaita ʉdʉraa beepi nʉ.

⁷ Mʉʉgwaiwejã õrau nem khaigbam pom wau thʉnʉm. Mamʉ mag ãbmua ideu i beepiba thʉa wai simjo sim chawag khecheu athaawaita warag khaibag athuucha thʉnʉisiju.

⁸ Mag ideu ʉdʉraa ich beepibaawain chadau mag woun chi khaigbam beewi sĩeicheju; mamʉ par mag khaibag sĩewiajã maach Por Jesuu, sĩi phuasirbapʉimjo, ich ooimʉgau ich jua theeg dʉimua warre thõopʉiju.

⁹ Mag woun chi khaigbam beejuun, mepeer jua theeg dʉita beeju. Mag simua aawai chi meperau i juag ooju, ag na õrau nem ooba aajempa õor dauderraa waumamkhĩir; mamʉ mag waumamʉn sĩi õor khũguraagpaiu.

¹⁰ Magbaadem abarmʉn, ar pod peerdʉba awia Ẽwandamau isegju khʉʉnan ichdeu khũgurm aig nem parhooba waumamua khũgurmaju, chadcharam iek amachig jaautarrjã warag igba ni ʉkhajã ʉkhaba awia maach Por Jesuug ʉdʉʉr amach peerdʉpiba arr aawai.

¹¹ Mag gaaimua ich Ẽwandamaujã ĩchab ʉdʉraa mag nem chad khabamʉg am khũgurpimaju, magʉmta chadam iekjo ʉkhamamkhĩir;

¹² magbaawai ĩchab magʉm gaaimua amach khõchagpierr nem khaigbamta waum khõchgau chadam iekta ʉkhaba arr gaaimua jũrr ich Ẽwandamauta am gaai mas aímʉ mas aag.

Ẽwandamau ich athee peerdʉ awaag jʉr autarr khʉʉn

¹³ Khodamnaan maach Por Jesuu kha khõsim khʉʉn, ichiita marau pãar gaaimua Ẽwandamag ʉu ajim aju aai nʉm. ¿Khan jãgwi? Pãachta jãig Tesalónica phobor ee chi nacha Ẽwandamau jʉr autarr khʉʉn aawaima. Magnaa ĩchab ich Ẽwandam Akhaar maachig nem wajapha waupiejem dʉimua pãachdeu ʉkhatarr gaaimuapa pãachta nacha peerdʉwi naawaima.

¹⁴ Magaag atheeta Ẽwandamau õor peerdʉ aaujem iek marau jaau wenʉrrʉm gaaimua Ẽwandamau pãar ich denkha aujim, mʉg atag pawiajã maach Por Jesucristo ajaug ich mag oo wenʉrramkhĩir.

¹⁵ Magau khodamnaan, Ẽwandam iek khĩirchajã marau jaaunaa sĩi ẽsap phã deepʉi nʉm gaaijã pãachig jaautarr chan oob khĩir okhoomiet. Khĩir okhooju khãai pãrau warag ag gaaita ubʉ thierrkha nʉisit.

^16-17 Maraun, ich maach Por Jesucristoouchata maach Ẽwandam chi Aai dʉimua pãar khĩir jãsenkhanaa pãar juag oopim khõsi nʉm, pãrau nem jaaunaa nem wau nʉm thum wajaphata obeber amkhĩir. Ich Ẽwandamauta maach khõsi khĩir jãsenkhajim, ich mag wenʉrrʉmua ich dʉi ogdʉba nʉisijujã khap amkhĩir.