2 Pedro 3 - Wounaan Meu

Cristoon beeb khaba beeju

¹ Keena, Cristo gaaimua mʉchdeu pãar khõsi chitaawai mʉg khurau ya biek numí pam pãrag ẽsap phã deepʉi chirʉm. Ich mʉg gaaijã napem gayamjo pãar wawí chirʉm, nem agchata khĩirjumkhĩir.

² Pãrag khĩir eyaa apim khõsi chirʉmʉn, warrgarwe Ẽwandamau ich i jaaumkhĩir jʉr autarr khʉʉnau jaaujerrta khĩir eyaa api chirʉm. Mag nʉm dʉi ĩchab ich maach Por anaa maach peerdʉajem Cristooucha jaau pʉawi jũrr maach ichdeu jʉr auwi pʉitarr khʉʉnaucha pãachig jaautarrta agjo khĩir eyaa apim khõsi chirʉm.

³ Ajapha ũrbat cha mua jawaagpam. Mʉg atag paawai mʉgta thʉnʉisiju: Ya Ẽwandamau mʉg durr i agkhaju gayaa paawai õrau amachdeu nem waum khõchagpierr parhooba nem khaigbamta waum khõchkhanaa chi ʉkha durrum khʉʉnjã wau iekhaa neeme sĩsid aju.

⁴ Mag chikham wau iekhamamua amau, “Pãar iek mag Cristo deeu beeju ajim anʉmta, ¿jãga jãg beeba khĩir waaurdʉbaadema?” aju. “Beeba nʉm ee ya maach jooinjã odubjim; magʉmjã barchebam. Warr Ẽwandamau mʉg jẽb ompaatarr aigmua thum chigjã aba ich magpai sim” aju, chikham wau iekhamamua.

⁵ Mamʉ jãgʉm khʉʉnau chan warrgarwe Ẽwandamau ich iiuta mʉg jẽb edaujã dʉi ompaatarrjã ʉkhamapha nʉm. Amaun ĩsjã agtha warrgarmjota simpii nʉm. Amau ʉkhamapha nʉm, dojã appai pʉʉrkhoo wejorr eemuata jʉsargjã obeerpi auwi ich ag dooupaita mʉg jẽb gaai nem thʉnʉmjã thum ʉu iiu wai sĩepitarr.

⁶ Am iek mag nem thum ich agtha maach dau chaauraajã khaba sim anʉm, magan Ẽwandamau dohãd pom pʉiwi ich ag dooupai mʉg durr gaai nem thʉnarr thum khechpʉitarrjã ¿khan ajimma? ¿Magtarr chan bʉ̃ʉrjã cambieba arrpá?

⁷ Mamʉ cha maadeu edau oo nʉm dʉi cha maach bʉ dʉnʉʉu nʉm jẽb chan maagwaimjo deeu dohãdauta ʉʉrppäaig khaba, ich maagwaijã ich iekhauta magpierrjo õtdaúa jẽraagta sĩi wai sim Ẽwandamau, ichdeu mʉg durr i agkhawi ich dau na khaigba wenʉrraajerr khʉʉn ich mag dau aug wau wenʉrraju jaaubarm edta jũrr õtou deepäaig.

⁸ Mag nʉm dʉi pãade khĩir eyaa abat keena. Mʉchdeu pãar jãsene chitaawai pãrag pʉaba jaau chirʉm: Mag i da beebam awia oob i nʉba amiet. Maach Por Ẽwandamagan mʉg khãai ãb kheubaademʉn, mil añosjota sim; maagwai mil años jũrr khãai ãbpaimjota sim. Maachigta da beeba sim, pari ichigan atcha jophee sĩewaita nʉ sim, õrag ich iek ʉkhamkhĩir.

⁹ Khar õrau jaaujemjo mʉg i da beeba sim chan mag ichdeu nem magju atarrjã ãsie wauba aajeewai khabam. Jãan ichdeu iwiir ãbjã okhoopimapha sĩewai ich bee nʉm ora thumaam khʉʉnau ãsie amach khaibag isegwi ichig chugpaapi jeeumkhĩirta jãg da beeba sim.

¹⁰ Mamʉ jãg sĩi awia ich beem edan degolp õrau nem jĩgkhabaichemjo degolpta dʉnʉʉucheju. Magbaawai edjã ee maach jãphierraa ʉrʉrʉʉmjo athamua warre edaujã chukkhu aadem dʉi edjã ee nem nʉnʉidʉmjã thum õtdaúa bʉ̃ʉudubwi chugpaju. Magbaadeewai mʉg jẽbjã ĩchab ag gaai nem thʉnʉm dʉi thumaa juau nem waumatarrpa phaadubwi chukkhu apʉiju ich Ẽwandamau.

¹¹ Keena, ichdeu õor i agkham ed mʉg durr gaai magta aju khaphʉ naawai, i dau na ichdeu khõsi simjo i atheepai nem waunaa ãba irigpaita ee aju aai nʉm.

¹² Chadcha Ẽwandamag pãach awaan beepim khõsita i beeju nʉbat. I mag jopai beemkhĩir, ichdeu khõsimjota abat, bigaaum khʉʉnagjã i khaugpiju ẽkha nʉmua. Mag pierrum edan, edaujãan ag ee nem thʉnʉmjã dʉi warre õtkhierr pechgau bʉ̃ʉumaju.

¹³ Chadcha magjup mamʉ, maach chi ʉkha nʉm khʉʉnagan, Ẽwandamau edjã iiur dʉi jẽbjã chi iiurta deeju a sĩewai, aata nʉ nʉm. Mag durr iiur gaai chan mʉg durr jooi gaai aajerrjo khaba, nem thum thʉnʉmjã ajaugnaa thumaam khʉʉnau nem agchata aajeeju.

¹⁴ Cristo gaaimua khodamnaan, maguata muan pãragan Ẽwandamau mag maachig durr iiur deeju a sim ed pa nʉm ora, pekau chukhu wenʉrrajuuta ẽkhanaa thumaa khõinaa wenʉrrat a chirʉm, maagwai degolp ich dʉnʉʉubaicheewaijã pãach ajapha nʉm oochemkhĩir.

¹⁵ Mag nʉm dʉi ĩchab chaig mʉchdeu jaau chirarrjo khaphʉ abat: Jãg maach Por Ẽwandam da beeba simʉn, ich beeju nawe ich iek ʉkhawia ʉu peerdʉtkhamkhĩirta jãg da beeba sim. Ich mag iek igwi maach khod jooi Pablooujã ich agjo ya pãrag jaaupʉijim, ichdeu ẽsap phã deepʉitarr gaai. Jãg irua pãrag jaaupʉitarran, ĩchab ich Ẽwandamau irig khĩirjug deetarrauta pãrag jãg phã deepʉijim, khap amkhĩir.

¹⁶ Irua ẽsap deepʉimarr gaai pogkha nem jaau sĩsidʉm chadcha phithur sĩsidʉm, khani jaau sĩ a khap aag. Mamʉ ichdeu ẽsap phã deepʉpʉikhampierr ya irua pãrag jãga wenʉrraju aai nʉ a jaauwi sim, mag deeu maach Por Jesucristo beeju aawai. Mag irua nem jaau sim pogkha phithur sĩsidʉm aawaita, chadcha meraam khʉʉnaun maimua mʉg iek amachdeu ʉkhatarr gaai ubʉ khaba nʉm khʉʉnaun warag chaaurta jaaujem, tagam Ẽwandam iek phãkha sĩsidʉm amachdeu parhoob jaaujemjo. Mamʉ amau Ẽwandam iekta jãg parhooba jaau nʉmʉn, wir aig amach khĩrauta Ẽwandam jua machag jʉr wenʉrrʉm.

¹⁷ Khodamnaan, mag maestronaan anʉmta seukha nem jaau nʉrrjee aju khʉʉn beejujã ya mua pãrag ag nawe jaautarr aawai pãach eejã magju nawe khĩir khaphʉ abat. Jãkhʉʉn õor khaigbam khʉʉn khabahab, amach jãg nʉrrjeem gaaimua. Magba akhiin eeu jãg parhoob nem waunaa parhoob nem jaau jẽedʉ sĩerrjeem khʉʉnau pãach khũgur amachig paa auwia pãachdeu ʉkhatarr iek gaai ʉu ubʉ narrta deeu ewag wetdukham.

¹⁸ Magju khãai maach Por anaa maach peerdʉajem Jesucristota ajapcha khaphʉ aju ẽkha nʉmuata warag pãachdeu ʉkhatarr iek gaai khĩirjug bãauju ẽkhabat. Ichta ich mag chi jua thierrkha sĩewai mʉg atag pawiajã ich mag irigpaita thumaam khʉʉnau ee apim khõsi chirʉm. Mʉgdampai ajim pãrag jaaupʉim ig chirarr. Pedro