2 Pedro 2 - Wounaan Meu

Chad khabam iekta jaaujem khʉʉn

¹ Cristo gaaimua khodamnaan, ich jãg warr jooingarwe ĩchab maach jooin phobor ee Ẽwandam i chaar khabamta jaaujerr khʉʉn paraa arrjo, mʉg atagjã maestronaan anʉmta pãar ee seukha nem jaau nʉrrjeem khʉʉn paraa aju. Mag nʉrrjeemʉn sĩi chadam iekjoo nem jaau nʉmuata õrau amachdeu maach peerdʉajem iek ʉkha narrjã isegpi nʉmua warag õor khaibag wau wenʉrraju. Mag seukha wenʉrrʉmua maach thumaam khʉʉn peerdʉju ayaa amkhĩir maach Por Jesuu ich thõopitarrjã chad khabajim a jaau nʉrrjee aju. Mamʉ inaata am jãg wenʉrrʉmʉn, Ẽwandamau degolp am gaai mas ab khaba mas aju.

² Amau mag nem jaau wenʉrrʉm ũrwi, chi ʉkhaajerr khʉʉn khapan am igar wetwi, amau nem khaigbam wau nʉmpa dʉi parhooba amachdeu am aig aju. Mag ʉkha nʉm anʉm khʉʉnpa mag thʉnʉm gaaimua, mʉg chadam iek maach peerdʉajem iek igwiata woun eugarmjo khaigba iekhamamua, “Chadam iek khabam ʉkha wenʉrraawaita mag amachdeu ʉkha nʉm anʉmjo khaba nʉmgui” aju bigaaum khʉʉnau.

³ Jãg pãrag jaau wenʉrrʉm khʉʉnan sĩi phatkhon atheepai bĩe sĩsid aawai, mag chad khabam nempa jaau wenʉrrʉmua pãar khũgurnaa pãar jua eem phatkhonpa aumaju. Mamʉ amach mag wenʉrrʉm paar am dau aug waupijuun, ya nawe Ẽwandamau jaau wai sim aawai ya chadcha am gaai mas aju dakpamam.

⁴ Am khãai ich chognaan ʉ̃gthar ich dʉi ãba naajerr khʉʉnjã irua perdonaabajim aajem, pekau ee burrwai. Perdonaaju khãai warag ich aarmua khĩmie durr barkhʉʉipʉiwi ich mam khĩchag eeta cadenau jʉ̃kha wai sim anaabá, ichdeu mʉg durr i agkham ed “Mam ich mag nʉisiju” amachigcha jawaag.

⁵ Ni warrcha ichdeu mʉg jẽb ompaawai ag gaai ĩchab õor paarpapitarr khʉʉnjã atcha ich dakhĩir pekau pooma aphobaadeewai Jooirau perdonaabajim anaabá. Sĩi warag dohãd pom beepiwi, mʉg durr thũppʉiwi, õor amach khaibag ee thʉnarr khʉʉn thumaa odubpʉijim aajem. Ãba ochopaita peerdʉtkhajim anaabá, jooi Noé ich ʉʉi dʉi maimua ich chaain seis narr khʉʉnpai, ich mag jooirauta ich paarmua deeum khʉʉnagjã ich denjo ajapha Ẽwandam dau na nem waupi jaaujerr aawai.

⁶ Ẽwandamau ĩchab phobor dau numí narrjã orpʉiwi warre khʉrr mephorr appaita bau joppijim anaabá. Makhʉʉn phobor Sodoma ajim aajem, Gomorra dʉi. Ẽwandamau am dʉi magtarran, amach mag khaigba thʉnarr gaaimua ewag pawiajã ich mag nʉm khʉʉnan ich agjo khaigba aju thumaam khʉʉnag khap amkhĩir ajim.

⁷ Mamʉ warm khʉʉn dʉi magtarrta, jooi Lodjã ich dau na ajapha khitarr aawai, Ẽwandamau i dau aug khaugwi am dʉi phaapʉiba, ʉu khaigper aujim aajem, warm khʉʉnau ich daar mag nem khaigbam wau nʉmjã am denjo aba aajerr aawai.

⁸ Mag, jooi Lod dʉi am ee sĩerrjã, amjo khaba, sĩi mag ed eepierraa amau nem wau thʉnʉmjã oonaa am parhooba iekha thʉnʉmjã ũrwi warag gaai machaagata aajeejim anaabá.

⁹ Magua, ar ich atheepai nem wau nʉm khʉʉnta maach Por Ẽwandamau oowai pekau ee burrjojoo aadep aawain, ichdeuta ʉu khaigper aaujem. Mamʉ khaigbam khʉʉnan deeu ich beem ed mʉg durr i agkhawi warag am khaibag wawaagta sĩi phe wai sim.

¹⁰ Ar jãg thum amach khõchagpierrta nem waum khõsinaa Ẽwandam jua theegjã ogkhaba aajem khʉʉn gaaita ʉ̃rcha Ẽwandamau mas ab khaba mas aju. Jãg pãrag seukha nem jaau nʉm khʉʉnan jʉ̃g khĩchagnaa khĩir nagjã chukhuta sĩsidʉm. Maguata leinaan amach khãai jua theeg sĩsidʉm khʉʉn igwiajã warag am serbiibag phemaajem.

¹¹ Am khãai Ẽwandam chognaan jua theeg ʉ̃rpainaa iek theeg sĩsidʉm khʉʉnaujã jũrr am denjo leinaan eugar mag khaigba iekhaba aajem.

¹² Maach khapeen jãg iekhaajem khʉʉnan sĩi nemchaainjota thʉnʉm, bʉ̃ʉrjã khĩirjugjã chukhu. Maguata nem inag pod amachdeu khaugba aawaijã warag parhoobata iekhapʉimaajem. Jãgʉm khʉʉnan amach mag nʉm gaaimua amachdeupaita Ẽwandamag amach mod ʉmkha nʉmjo naawai, sĩi nemchaain õtpaanaa kheechjemjota aju Ẽwandamau am dʉi,

¹³ amachdeujã amach khapeendam dau aphʉʉ apiejerrjo. Amachigan onee nʉm anʉm, jãg amachdeu khõchagpierr athuucha aawai. Pãar dʉi phiesta waauwai thach bipom khonaa dojã do nʉm gaaimua khech thʉnʉisip aawai, pãachta wajap khĩir naau naabahab, õor daar jãg nʉm gaaimua. Pari mag pãar khĩir naau nʉm chan am gaai mas khaba, sĩi warag onee nʉm, amachigan pãar dʉi nem agchata wau nʉm anʉmua.

¹⁴ Amach mag naawai, ʉʉin oowaijã warre ag dʉi khãiju khĩirjugta khĩirjuajerram, mag pekau wauba akhimjã aba. Mag naawai Ẽwandam iek gaai ubʉ khaba khitheem khʉʉnagjã amach denjota waupiju ẽkhaajerram. Mag sĩsidʉmʉn ĩchab Ẽwandamau nem khõch khabam atheeta wʉrppa sĩerrjeem. Jãgʉm khʉʉnan ya sĩi ich Ẽwandamau isegju khʉʉnau.

¹⁵ Amach mag thʉnʉm gaaimua ya chi okhoomta thʉnʉm, Ẽwandam aarcha oberaag nem wauju khaphʉ narrta sĩi amach khõchagpierr wenʉrraawai. Warr nawe aajeewai Beor khararr iewaa Balam chi Aai i jaaumieu arrjo, parhooba nem khaigbam wau nʉm gaaimuapata phatkhon auju ẽkhaajerram.

¹⁶ Pãrau khaphʉ nʉm, Balamau ich iek ũrba abaawai, Ẽwandamau burroogta irig iekhapibaawai, ich nemchaaíupai Balamag woun denjo iekhajim, Ẽwandam ichaaur nem waum ig sĩerr waupimaaugau.

¹⁷ Pãar ee mag maestronaan anʉm khʉʉnan, sĩi noseg cheegpamjo edjã khĩ thʉnarrta phũu aaisirbapäaiwai cheba sĩi õor khũgurpäaijemjota sĩerrjeem, chadam iekjoo jaau nʉmta sĩi seukha wenʉrraawai. Wa magba, jãgʉm khʉʉnan sĩi dosĩg chaai jʉʉubaademjota sĩsidʉm. Mamʉ amach mag nʉrrjeem gaaimuata, meewaijã Ẽwandamau khĩchag ee barkhʉʉipʉiwi ich mampaita wenʉrrapiju, oberaajã khaugba.

¹⁸ Amau mag nem jaau wenʉrrʉm ũurwain chadcha nem ũrimʉgma; mamʉ mag jaau nʉmʉn sĩi parhooba dau lokoo amach nem wau wenʉrrarr jaau nʉmuata õor khũgur nʉm. Mag nʉmuata amach khaibag pʉawi eeu ʉkhawi agtha Ẽwandam iek gaai ubʉ khaba khitheem khʉʉnjã amachig paa auwi ũwaai ãrpʉimaajem.

¹⁹ Mag nʉmta i wajaugan, “Maar iek ʉkhakhiin, tag chikhamnauta pãrag nem jajaau aba pãachdeupaita pãach khĩrau nem wauju” a jaau sĩerrjeem. Mamʉ mag nʉmʉn amachjã mag amachdeu nem parhooba amach khõchagpierr nem wau nʉmuata, woun amach khãai ʉ̃rpai sim denjo phẽethʉg wai nʉmta mag am chan chikhamnaan chognaan khabam aajem. Pari pãade ũrbat: Maata pãrau ʉ̃rcha waum khõchkhaajem khai, magan maata pãar khãai ʉ̃rpai simjo sĩewai maguata pãran woun denjo ich chogkha wai sim.

²⁰ Ar maach Por anaa maach peerdʉajem Jesucristo khaugwi amachdeu nem khaigbam waaujerrjã isegpʉiwi ʉu ajapha nʉisierrta, deeu ũwaai warram khĩirjug khaigbam auwia magʉmʉgta ʉdʉraa amach ʉ̃rpapiewain, warr Cristo khaugba aajeewai amach naajerr khãaijã warag athuuchata nʉisiejem.

²¹ Jãgʉm khʉʉnau warrjã mʉg khʉdau chaar ich Ẽwandam aar mapiejem iek ũrbamuan, ajapcha akham, jãg sĩi khũchpai ʉkhawi tag ich Ẽwandamau jaau simjã wauba parta ʉkhaju khãai.

²² Jãgʉm khʉʉnan, õrau jaaujem iekhõoin, saakiu ich chʉgappaita deeu khobaimamjo nʉm. Wa magbam khai, khũs ajapha domeerpinaa sĩubarm bʉrre deeu ich khathajemeerjem ee pʉʉrbaba khabaimamjota sĩsidʉm, Ẽwandam iekta isegwi warr amachdeu nem khaigbam waaujerr eeta deeu nʉisiewai.