2 Pedro 1 - Wounaan Meu

Salud

¹ Mʉʉn Simón Pedroou, ich Jesucristooucha ich i jaaumkhĩir jʉr autarr; muata pãrag mʉg ẽsap phã deepʉi chirʉm, pãraujã maach ich Jesucristooucha jʉr autarr khʉʉnau ʉkha nʉm iekpaita ʉkha naawai. Pãrau mag ʉkha nʉmʉn, maach Ẽwandam anaa maach peerdʉ aaujem Jesucristo thumaam khʉʉn dʉi nem agcha aajeewai, iwiir ãbam khʉʉnagpaita mag ich iek ʉkhapim khõsi khaba, thumaam khʉʉnagta agdaujo ʉkhapim khõsi aajeewaiu. Magua maach ich Jesucristo dʉicha wenʉrraajerr khʉʉn khaibag chugpatarrjo pãar maar khãai ẽudeecha ʉkhatarr khʉʉn khaibagjã ichdeuchata chugpatarr aawai, maach thumaam khʉʉn oneg ãbata nʉm, ãbam iekta ʉkha naawai.

² Pãar kõit jeeu chiraajem, jãg pãachdeu warag Ẽwandam khaug wetum dʉi maach Por Jesujã khaphʉcha paaukhamam gaaimua ʉu pãar dʉrrcha eeg oonaa pãar khõinaa phe wai sĩemkhĩir.

Dichdeu ʉkhatarr iek gaaita warag ubʉ paaukhamaju aai nʉm

³ Ẽwandamaun maachig chadcha ich iek ʉkha nʉm khʉʉnjo ich atheepai nem ajapha wau wenʉrrajuuta khap apim khõsi sim. Magaag atheyan ich iiu aawai maadeu nem igju thum warre khĩir khaug sĩubarmjota ajim: Nacha maachig Cristota ajapha khaphʉ apijim, ar ichdeu nem ajapham appai waunaa ich ajaugjã oopi nʉmua maach ichig paa autarr ag Cristo.

⁴ Cristo ich mag sim gaaimuata Ẽwandamau maachigjã khaphʉ api sim, jãga mʉg atag paawai maachjã ichjo nʉisiju; mag ichjo ajaug paaukhaju khĩirjugjo chan tag khĩirjug ajapham chukhum. Magta maachjã warm khʉʉnjo khaibag waum khõchgau warag eeg paaukhamatarrta ʉu Ẽwandamau maach peerdʉ aujim, magbarmua mʉg atag paawai ichjo ajaug paapʉiwi ich dʉi wenʉrramkhĩir.

⁵ Maguata muan pãragan, pãachdeu ʉkha nʉm iekta warag ogdʉba thãraucha ʉkhanaa Jooi dau na agchata wenʉrrat a chirʉm. Mag i dau na agcha wenʉrranaa khĩirjug paraa aajeet, khani Ẽwandamau waupim khõsi sĩ maimua khani waupiba sĩ.

⁶ Mag khĩirjug paraanaa pãach khĩirjug ee nem khaigbam wauju khĩirjug bee nʉm waum khõchgau phirir thʉnaawiajã oob magʉm khĩirjugta warag pãach gaai ʉ̃rpapimiet. Magju khãai magʉm khĩirjug dich garmuata mag podpʉpʉikham dʉi, phithurg auwiajã, sĩi khĩuta jʉmpʉpʉi abat. Mag sĩi khĩu ãwatpʉpʉikham dʉita Ẽwandam dau na nem khaigbam waujujã okhonaa i dawagaam nempaita waubat.

⁷ Magnaa dichjo Ẽwandam iek ʉkha durrum khʉʉnjã kha khõsinaa bigaaum khʉʉnjã thumaa daupii abat.

⁸ Cha mʉchdeu pãrag jaau chirʉmjo, chadcha mag ajapha nem wau nʉmuata warag pãachdeu ʉkhatarr iek gaai ubʉ paaukhamamʉn, magan pãar serbiibajã khaba, ni sĩi parta maach Por Jesucristo khaugjierramjã abaju.

⁹ Mamʉ ar mag ʉkhatarrjã magʉm nem ajapham wauju ẽkhaba aawai khĩirjug bãaubamjo sim woun chan, sĩi dau khĩsu wa dausĩ warppha nem oo nʉm khʉʉnau wajap nem wauju khaugba aajemjota sim, ich pekau ee nʉrraajerrta ʉu maach Por Ẽwandamau ich khaibag chugpaatarrjã khĩirjuba.

¹⁰ Cristo gaaimua khodamnaan, mag Ẽwandamau pãar ichdeucha jʉr auwi ich denkha autarr aawaita i dau na mag nem ajapha wau nʉmta khajapham benjo ideu pãach gaai thierrpapibat. Magta nem ajapham appai wau nʉm chan, meperau khujʉrchewiajã, pãrau pãach ʉdʉʉr deebaju.

¹¹ Pãrau magta amʉn, maach peerdʉ autarr anaa maach Por Jesucristo aar barimam edjã irua pãrag “Pãar ʉu beejim” awi, ich mag ich durr ich dʉi ajapha phe wai sĩsiju.

¹² Chadcha maach peerdʉajem iek pãachig jaautarr pãrau ʉkhawi ag iek gaai ubʉ nʉm awiajã ichiita cha mʉchdeu jaau chirʉm iekhan pʉaba ich jãg pãrag jaau wai chitaju, khĩir eyaa wai wenʉrramkhĩir.

¹³ Mua khĩirjuawai mʉʉta ʉu agtha iiu pʉʉrba chitʉm aiguin ich jãg pãar wawí iekha chitaju aai chirʉm.

¹⁴ Maach Por Jesucristoou mʉchigcha jaauwai i iek ya mʉ pom chitabaju aajem.

¹⁵ Maguata mʉch meeju nawe mua pãrag ajapha khaphʉ apiju ẽkha chirʉm, maagwai ya mʉ meebaadewiajã mag mʉchdeu pãach wawitarr iekta khĩir eyaa wai nʉisimkhĩir.

Ich Jesuucha jʉr autarr khʉʉnau chadam iekta jaau wenʉrrarr

¹⁶ Ya mua mʉch khapeen agjo ich Jesuucha jʉr autarr khʉʉn dʉimua pãrag jaaujim, jãga maach Por Jesucristo jua theeg sĩerrʉ́, maimua jãga deeu i beeju. Jãg marau pãrag nem jaau nʉm chan sĩi seukha maach khĩirjug eepaim nem ĩgkhaa khabam. Maran maachta maach Por Jesuu ich dʉi Ẽwandam durrsĩ gaai phe arrtarr aawai maraun maach daúacha i jua theeg oowi i ajaugjã maach daúacha ootarr aawaita mag i jaau nʉm.

¹⁷ Maar dakhĩir ajim Ẽwandam chi Ayau ich Iewaa khĩir ajaugau sĩi bʉ̃ʉmjo apiwi ich Ẽwandam thumaam khʉʉn khãai ʉ̃rʉʉcha sĩerrʉmuata i igwi jʉʉnthumiejo bau wejom eemua, “Chamʉʉta mʉ Iewaa, mʉchdeucha jʉr autarrau; iita mʉ thãrau” a iekhatarr.

¹⁸ Ich mag ed mag Ẽwandamau ich juapá oopiewai, maachta maach Por Jesús dʉi mag durrsĩ gaai narr aawai, mag edjã eemua woun iekjo iekhabarmjã maach jʉ̃gʉuchata marau ũrjim.

¹⁹ Mag, warrgarwe Ẽwandam i jaaumienau beeju jaaujerr wounta chadcha marau maach daúacha ootarr aawai marau khaphʉ nʉm, chadcha tagam nem amau jaaujerrjã ag ee oberju. Mua khaphʉ chirʉm, pãraujã agjo amau jaaujerr iek khaphʉ nʉm; mag Ẽwandam iek amau jaaujerran ĩs ewag pawiajã khĩchag ee õtdau paa dʉnʉmjota sim. Mag õtdaujo sĩewai, ag bʉʉg oo nʉmjo Ẽwandamau khõsimjota wenʉrraju aai nʉm, Cristo chi edpherr garm phĩdag dʉnʉʉuche nʉm ora. Mag ich dʉnʉʉubaichem edta, edau ãspa thʉnʉisiewai ag bʉʉg nem oo nʉmjo, maach khĩirjugjã aardʉbaadeewai warrgar Ẽwandam i jaaujerr khʉʉnau phã pʉatarrjã thumaa khaphʉ nʉisiju.

²⁰ Magua khap abat: Ẽwandam iek ichdeucha ich i jaaumienag ichdeu nem wauju jaaumamua phãpitarr chan ãbmuajã ichdeu khĩirjuawai magjoo abaawai sĩi ich khõchagpierr jaauju khaba sim.

²¹ ¿Jãgwi? Warr phãawaijã ich Ẽwandam Akharau jaaumamta phãtarr aawaima. Ẽwandam i jaaumienau bʉ̃ʉrjã sĩi amach khõchagpierr phãm khõchgauta phãbajierram. Amaun ich Ẽwandamau amachig khĩirjug deemampierrta phãmaajeejim.