2 Juan 1 - Wounaan Meu

Dich khapeen daupii wenʉrraju aai nʉm

¹ Mʉʉn Juanau. Mʉch chi jooirauchata pãar ich Ẽwandamaucha ich iglesiakha autarr khʉʉn athee mʉg ẽsap phã chirʉm, ag ee thum chi ʉkha durrum khʉʉnag. Mua chadcha pãar khõsi chitʉm; wajapcharan mʉch appaimua khaba, thum ar maachjo Ẽwandam iek chaarta khaphʉ nʉm khʉʉnaujã agjo pãar khõsi nʉm.

² Mua mag pãar khõsi chitʉmʉn, Ẽwandam iek chaar mʉchdeu ʉkha chirʉmta pãraujã ʉkha naawaiu; mag chadam iek maachdeu ʉkha nʉmʉn mʉg atag pawiajã ich mag maach thãar ee sĩerraju.

³ Ẽwandam chi Ayau maimua chi Iewaa Jesucristooujã pãar ʉu wai naapim khõsinaa pãar eeg oopim khõsi chirʉm dʉi ĩchab pãachdeu chadam iek ʉkha nʉm gaaimua khõinaa agdaujo dich khapeenjã kha khõsita wenʉrrapim khõsi chirʉm.

⁴ Mʉ onee chirʉm keena, chadcha pãar ee ãaur khʉʉn ich Ẽwandamau maachig wenʉrrapi jaau simjo amachdeu chadam iek ʉkhatarr ipierraata wenʉrrʉm mʉch daúa ootarr aawai.

⁵ Ĩsjã nawe pãachig jaautarr iekpaita deeu pʉaba pãrag, agdaujo dich khapeen kha khõsi aju aai nʉm a chirʉm. Mua pãrag mag phã deepʉi chirʉm chan iek iiur khabam; mʉg iekhan warr pãachdeu ũrtarr iekpaiu.

⁶ Chadcha chi Ẽwandam khõsi simuan irua nem jaau sim thum i ipierraata nem waaujem. Pari ʉ̃rcha irua maachig waupi jaau simʉn, ar nacha pãachig jaau nʉm aig ũrtarrjo, agdaujo dich khapeen daupiita wenʉrrapi jaau simʉu.

Sĩi chikham khũguurjem khʉʉn

⁷ Jãg õor pom sĩi seukha pãar khũguraagpai Jesús chan woun chaar khabamta jãg nʉrrajim a jaau nʉm khʉʉn khapan thʉnaawai, muan pãragan warrgarwe mag pãachdeu ʉkhatarr iekta khĩir eyaa api chirʉm, ʉdʉʉr pãach khũgurpimaaugau. Chi jãg wenʉrrʉm khʉʉnan sĩi chikham khũguurjem khʉʉn anaa Cristojã oomapha nʉm khʉʉnau.

⁸ Pãachdeu Ẽwandam iek ʉkhatarr gaai ubʉ wenʉrrʉm paar ʉ̃gthar paawaijã irua deeju a sim thum chadcha aum khõsi nʉm khai, khĩir khaphʉnaa õor sĩi jãg seukha nʉrrjeem khʉʉn iek oob ʉkhamiet. Pãrau magba ʉdʉraata amag pãach khũgurpim chan irua mag nem deeju a simjã thumcha aubaju.

⁹ Ãbmua khãijã maach Por Jesucristo iekta bigaau sĩunaa ag khãai wajapcharamta jawaag awia i iek khabamta jaau nʉrrʉmʉn, magan Ẽwandam i dʉi khaba sim. Mamʉ Cristoou jaau pʉarr iek ichdeu ʉkhatarrta ogdʉba ʉkha simʉn chadau ich Ẽwandam chi Aai dʉi chi Iewaajã i dʉi nʉm.

¹⁰ Ãbmua khãijã pãach di aig beewia Cristoou jaau pʉarr iek khabamta jaaucheewai oob pãach di aig jẽerpimiet, ni sĩi irig ʉu pʉ beejim wa ʉu pet khãijã amiet.

¹¹ Chi mag nʉrrjeem khʉʉnag saludaa nʉm khʉʉnan amau mag nem khaigba jaau nʉmjã dʉi amach paarmua jaau nʉmjota nʉm, magʉm gaaimua warag õor okhoomkhĩir.

Ãbmiem salud

¹² Pãrag nem jaauju pooma wai chirʉm; pari sĩi mʉg ẽsap gaaipai chan mua jaaupʉibam. Magju khãai mʉchchata pãar aar mawia pãar dʉi khĩirchata iyʉʉ am khõsi chirʉm, maach thumaa ãba wajapcha onee aag.

¹³ Maujã ĩchab pãarjo ich Ẽwandamaucha jʉr awia Cristo gaaimua pãar iglesia eem khʉʉn dʉi khodkha durrum khʉʉnau pãrag salud deepʉi nʉm. Mʉgdam ajim pãrag jaaum ig chirarr. Ayoo keena, Juan