2 Corintios 9 - Wounaan Meu

¹ Ya mʉchdeu pãar khaphʉ chiraawai, hermanonaan athee ofrenda deemkhĩir chan tag pãrag phʉʉrba jaauju chukhu chirʉm.

² Mua khaphʉ chirʉm, pãrau pãach khĩrauta hermanonaan juag oom khõchkhaajem. Jãg nʉm aiguin chadcha mua pãar tho chitʉm. Mag gaaimua ya ante mua Macedoniapienag jaau wai chirʉm, naam añoouwe pãrau ofrenda jʉr phiewi aphʉʉm khʉʉn athee deepʉim ig narr. Mag, jam Acaya durr pãrau mag khĩirju nʉm ũrwia mau Macedoniapienaujã ich agjo khõchkha thʉnarram.

³ Ya mua pãar amag wajapha jaau wai chiraajeewai mʉchcha maju nawe ĩs mua pãar aar mʉkhʉʉn hermanonaan pʉibapʉim, chadcha pãachdeu ofrenda deepʉiju ag nawe sĩi khĩir khaug wai naamkhĩir.

⁴ Magba akhiin, mʉchcha pãar aar barm ed Macedoniapien khãijã mʉ dʉi mawi agtha chukhu nʉm oobaimaawai, sĩi seukhata pãar eugar mag chirarrjoo aju. Magbaawaijã, ¿jãga aag agá? Magan pãrau wajapta mʉ khĩir naaupiwia pãachjã dʉi khĩir naauju, khani mag mʉch khĩir naaupibajupii awiata mua pãar eugar amag mag jaaujerr aawai.

⁵ Pari magam uguata mua mʉch nawe mʉkhʉʉn hermanonaan pʉi chirʉm, pãrau agtha ofrenda dʉrrcha pãachdeu deeju atarrjo chukhu nʉm khai, dʉi pãar juag ooimamkhĩir. Maagwai mʉ baarwaijã ya sĩi khĩir khaug wai naaju. Pari mag chirʉm chan mag ajuésta deepiba, sĩi pãach khĩrauta deepim khõsi chirʉm.

⁶ Pãrau khaphʉ nʉm, jãga aajẽ nemjĩir jĩirwai. Bʉ̃rʉʉ jĩirtarr khai, paarpaawaijã ich agpierrpai bʉ̃rʉʉ aaujem. Dʉrrcha jĩirtarr khai, paarpaawaijã ich agpierr agjo dʉrrchata aaujem.

⁷ Maguata mag ofrenda dee nʉm aigjã ich agjota sim. Thumaam khʉʉnau wajapha khĩirjuwia khaphʉ aju aai nʉm, khachpaita agdaujo deemaju aai nʉ. Pari ich Ẽwandamaujã mag deem khõsi dee nʉm khʉʉnta daupii aajeewai mag dee nʉm aigjã bigaaum khʉʉnau ajués deepi naawaita mag deegpamjã aba, ni sĩi khĩir mor chigpaijã deeju aai khaba nʉm.

⁸ Pãrau magta amʉn, Ẽwandamaujã pãrag nem wajapham pom deewia maimuajã khĩirpierr dʉrrchata deeju, pãachdeu nem ig nʉmdam paraa amkhĩir, mag dʉrrcha wai naawai jũrr bigaaum khʉʉndamau mag chukhu nʉm khʉʉnagjã agjo dedee amkhĩir.

⁹ Magʉm jaauwia Ẽwandam iek phã sim gaai, “Ar chadcha ich khapeen athee nem wajapha waaujem khʉʉnaun aphʉʉm khʉʉn dʉijã o ajaugta aajem” a sim. Maimua ĩchab, “Chi o wajapha nem dee sim khʉ chan augchebam, mag o wajapha amkhĩirta ich Ẽwandamau jũrr irig dʉrrcha deejeewai” a phã sim. (Sal. 112:9)

¹⁰ Ich Ẽwandamauta nemjĩir jĩramkhĩirjã maachig nemjĩir dau deenaa nem thum maadeu khoojemjã deejeewai, ichdeuta ĩchab nem wajapha wawaag pãrau nem iigwaijã deeb khaba deeju. Mag nem deem khõsi dee nʉmta nemjĩir jĩirwia bãaumamjo warag ʉ̃rpapag maju, mag oowia warag ofrenda deem khõsi dʉrrcha deemkhĩir.

¹¹ Pãar magta wenʉrrʉmʉn, pãachdeu nem wajapham ig nʉm thum wai naawai, jũrr pãach khãai aphʉʉm khʉʉnag dʉrrcha deegjã dʉrr aju. Maagwai pãrau mag ofrendadam maar gaau deepʉi nʉmjã marau hermanonaan Jerusalenpien aar deebaimaawai ag paar amau Ẽwandamagta ʉu ajim aju.

¹² Pãrau ofrenda deepʉi nʉm marau am athee arr nʉm chan sĩi amau nem ig nʉmdam deeimaagpai khabam; mag am aar ofrenda deen mamjo deen ma nʉmua ĩchab amag Ẽwandamagjã magʉm nemdam paarjã ʉu ajim abat a jawaanta maar wet naabahab.

¹³ Pãrau mʉg ofrendadam amachig deebapʉim gaaimua amau khaphʉ aju, chadcha pãraujã Cristoou maach peerdʉajem iek gaai jaau sim ipierraa nʉm. Mag nʉm dʉi ĩchab pãraujã pãach garmuata amag mag ofrendajã dʉrrchata deepʉim khõsi deepʉi nʉm aawai, pãach kõit Ẽwandamagjã ʉu ajim awia

¹⁴ warag amau pãar kõit irig jeeuju ʉu pãrag amach juag oomkhĩir, mag khĩirjugdam deetarr jũrr.

¹⁵ Magua mʉchdeujã Ẽwandamag ʉu ajim a chirʉm, ich Chaai regalo wajapham khãaijã wajaug atcha simta deetarr kõit. Sĩi irig ʉu ajim aajem, ag khãai wajapcha jawaag tag iekhaju khaugba aawai.