2 Corintios 8 - Wounaan Meu

Jerusalenpien athee phatkhon phietarr

¹ Hermanonaan, ĩs jũrr mua pãrag jaaum khõsi chirʉm, jãga Ẽwandamau Macedonia durr iglesia nʉm eem khʉʉn ʉu wai sĩ.

² Aman chadcha phithuurga aadep naab pari onee naajem. Dau aphʉʉ naajeeb pari amachdeu phatkhondam oo nʉm eem chan mag deemaphamjã aba aajerram. Amaun paraam khʉʉn denjo dʉrrchata deenaa maimuajã deem khõsita deejerram.

³ Amau mag deemamjã amachdeu deeju arrpierrpai khaba, amachdeu deeju arr atchata deejem. Mua mag jaau chirʉmʉn, mʉchdeucha khaphʉ chiraawaiu.

⁴ Mag dee nʉm chan muata deepi jaauwia khaba, sĩi amach khĩrauta mag deejem. Amach garmuata, amaujã agjo amach hermanonaan Jerusalenpien athee amach paat deeju aai nʉnʉm nʉʉ paawaita mua amag, “Pãachdeu mag khõs nʉm khai, magan ʉu sim” a chirajim.

⁵ Maimua chadcha muan amau jãgcha abajupii chirajim. Nacha amachdeupaita sĩi deeum khʉʉnjo maach Por Jesuugta wir aig amach thʉsĩepʉijierram, irua nem khõsimpai wawaag. Maimuata jũrr sĩi mua nem jawaata oo nʉisijim, Ẽwandamau amachig api simjo.

⁶ Maguata muan pãragjã Macedoniapien denjo ofrenda deem khõsi deebat a chirʉm, o ãkhãragjã chukhu. Magamkhĩir Titoogjã jaau chirʉm, pãar aar ich maju nawe, jãg ichdeuta nacha pãrag ofrenda jʉr phiepi jaaubaaderr ich jãg warag thumaa ãba jʉr phie aumkhĩir.

⁷ Pãar chadcha chi wajapham khʉʉnau, thãraucha maach Por Jesucristo iek ʉkhaag. Maach Por Jesús iek khaugnaa iekhaa khaphʉ iekhamamua ag iek jawaagjã pãran chi wajapham khʉʉnau; maimua nem wajapha waum khõchkha nʉm dʉi ĩchab mʉchdeu pãrag jaautarrjo wir aig dich khapeen kha khõchag atheejã agjo chi wajapham khʉʉnau. Mag nem thumaam athee chi wajapham khʉʉn aawai chamʉg ofrenda deepi jaau nʉmjã dʉrrcha deebat.

⁸ Mag chirʉm aig chan mua ajuésta deebat aba chirʉm. Mag chirʉm aiguin sĩi pãraujã Macedoniapien denjo dee khaugamkhĩirta mag chirʉm. Pãrau mag deebapʉim gaaimua maach khodnaan Jerusalén phobor ee aphʉʉ khitheem khʉʉnau khaphʉ aju, sĩi par iekhaupai khaba, chadchata pãrau am khõsi nʉm.

⁹ Pãrau ni ãbmuajã meraa khaba nʉm, jãga maach Por Jesucristojã Ẽwandam dʉi ãba sĩerr aawai dau aphʉʉ khaba sĩerrta ich khĩrau mʉg jẽb gaai beewia dau aphʉʉ ajĩ maach gaaimua. Pari juau ogthom mag ich dau aphʉʉ apitarran, ich magbarm gaaimua jũrr Ẽwandamau maachta ich Cristo dʉi ãba wenʉrramkhĩir ajim. Magua Cristo gaaimua maach khodkha nʉm khʉʉn dau aphʉʉ oowai am dau aug khaug paraa abat.

¹⁰ Mʉg cha mʉchdeu jaau chirʉm athee sĩi mua pãar wawim ig chirʉm. Naam añoouwe pãachdeuta nacha hermanonaan Jerusalenpien athee phatkhon phieju aphobaadewi chadcha phiephobaaderr aawai,

¹¹ pãachdeu deeju ayaampierr agdaujo deemamua pãachdeu deeju aphobaadeewai deem khõsi narrjo ich jãg deem khõsi deepetat.

¹² Pãrau ofrenda deewaijã deem khõsita dee nʉmʉn, bʉ̃rʉʉ awiajã dʉrrcha dee nʉm dʉi ãba Ẽwandamau aum khõsi auju. Irua maachdeu chukhu nʉm atchajã jeeuba, maachdeu wai nʉmpierrpaita jeeu sim.

¹³ Magba akhiin wa dich khapeenag nem deem khõchgau jũrr dichdeu nem ig nʉmta chukhum aju. Mua pãar magpimapha chirʉm.

¹⁴ Mag khãai sĩi agdaujo pãachdeu nem ig nʉmta thum paraa apim khõsi chirʉm. Pãrau nem wai nʉm jũrr warm khʉʉnau chukhu nʉm khai, magan amag dee sim; maagwai jũrr pãrau chukhu abarm ed amau wai nʉm khai, ich agjo pãrag deeju. Mag nʉm aig sĩi agdaujo dichdeu nem ig nʉmdam augcheba wai nʉnʉid aju.

¹⁵ Cha mua jaau chirʉm igwia, Ẽwandam iek phã sim gaai jaauwai, “Khoju pom autarr den eemjã sobba, ni khojudam bʉ̃rʉʉ autarrjã waaurwia augchebajim” a sim. (Éx. 16:18)

Tito ich khapeen dʉi pʉitarr

¹⁶ Mua Ẽwandamag ʉu ajim a chirʉm, ichdeuta mua pãar khĩirju chirʉmjo Titoogjã pãar khĩirjupi sĩewai.

¹⁷ Mua ich Titoog pãar oon mamkhĩir jaaubaawai ʉu mʉ ipierr maju aadejim. Mag nʉm dʉi ichdeujã nawe pãar oon mam khõchag sĩerr aawai ĩsin chadau irua ich daúacha pãar oon mam. Pari mua oowai irig petá aba arr akhiinjã, ichiita ich khĩraujã maju sĩejim.

¹⁸ Tito dʉi mua deeum hermano pʉi chirʉm. Jãguan ĩchab mʉg maach peerdʉajem iek jaau gaai khitʉm gaaimua mau iglesia nʉnʉidʉm ee thumaam khʉʉnau i eugar wajapha ig iyʉʉ aajem.

¹⁹ Mag nʉm dʉi ĩchab, mʉg phatkhon jʉr phie wenʉrraag maar juag oomkhĩir tagam iglesia eem khʉʉnaujã iita jʉr aujierram. Mag phatkhon jʉr phie wenʉrrʉmʉn aphʉʉ khitheem khʉʉnag deepäaigau, magbaawai amaujã maach Por Jesuuta wajapha ig iyʉʉ nʉm dʉi chadcha maachdeu amach khõsi nʉm a khap amkhĩir. Magta mʉg hermanodam maar daumaai nʉrrʉm.

²⁰ Magba maach appaita wenʉrrakhiin, phatkhon dʉrrcha arrum aawai, eeu ãbmua khãijã wa marau ag eem aujim aju.

²¹ Pari ãbmuajã mag khĩirjum uguata ãba nem wajapha waujupaita khĩirjuajem, Ẽwandam dau na maimua sĩi mʉg jẽb gaai maach agdaujopai thʉnʉm khʉʉn dakhĩirjã agjo.

²² Pãar aar Corintoog mʉch maba abaawai mʉch jũrr dewam hermanodamta agjo am daumaai pʉi chirʉm. Jãjã agjo ichdeu nem wajapha wau khitʉm gaaimua mua i khaphʉ chirʉm, jãan hermano chaardamau. Magʉm ĩs chará ichdeujã ya pãar wajapha wenʉrrʉm khaphʉ sĩewai ʉ̃rcha irua pãar oom khõchkha sim.

²³ Ãbmua khãijã Tito igwia pãachig, “¿Jã khaíuma?” abaawai, jũrr mʉ igwia, “Jãan Pablo khaperau, pãach juag oom khõchgau i dʉi ãba phidkhaajem khabahab” abat. Wa jũrr i khapeen ar i dʉi numí wetum khʉʉn igwia khãijã, “¿Jãkhʉʉn chijã khʉʉnauma?” abaawai, “Jãkhʉʉnan mau Macedonia durr iglesia nʉnʉidʉm eem khʉʉnau jʉr auwia pʉitarr khʉʉnau” abat, “ĩchab wajapha maach Cristo iek ig iyʉʉ aajem khʉʉn.”

²⁴ Hermanonaan Corintopien, chamʉ khʉʉn wounaan pãach aar bardʉtkhaimaawai, pãachdeu am khõsi nʉm chadcha amach daúacha oomkhĩir, am dʉi wajaphanaa am jãsene abat. Pãrau am dʉi magmʉn, magan mʉg Macedonia ee iglesiapierr thumaam khʉʉnauta pãrau mag am khõsi nʉm khakhapdo aju, pãachdeu mag amach dʉi wajapha atarr jaauthurtarr ũrwia. Mag amʉn magan mʉjã ĩchab parcha onee khaba abarm pãar gaaimua.