2 Corintios 7 - Wounaan Meu

¹ Magua, Cristo gaaimua khodamnaan, magta Ẽwandamau maach dʉi aju a sim. Maguata maachin nem khaigbamjã pʉawia khĩirjug khaigbamjã isegnaa dich morta sʉrkhaju aai nʉm. Magnaa Ẽwandam dau na pekau wauju okhonaa warag i simjo wajapha ajuuta ẽkhaju aai nʉm.

Corintopienau ich ipierraa arr gaaimua Pablo onee atarr

² Keena, mʉ iek ũrbat: mua pãar eem khʉʉn dʉi ni ãbam dʉijã athuucha khaba ni ãbjã mua khaibag wauba, ni Ẽwandam iek chaar khabam jaauwia ãbjã mua khũgurba chitʉm.

³ Mua mag chirʉm chan mag mua pãach dʉi mag chirʉm khĩirju naawaita mag chirʉm abam. Mʉchdeu na pãrag jaau chirarrjo chadcha mʉchdeu pãar daupii wai chitaawai, jãga akhiin mʉchta warag pãar aar mawia ich mag pãar dʉi chirsikham. Mag ãba wenʉrrʉmua ãba khechju awiajã mʉ ich mag pãar dʉi chitakham, mʉch thãar eeta pãach thum phe wai chitʉmjo aajeewai.

⁴ Pãrag mua bʉ̃ʉrjã nem meerba jaau chitʉm, magua pãar gaaimua mʉch onee chirʉmjã meerba jaau chitʉm. Chadcha jãg pãach wajapha wenʉrrʉm gaaimuata pãrau mʉ khĩir jãsenkha nʉmjo aajem. Mʉʉn chadcha phithurnaa dau augjã aaujeeb pari onee chirʉm.

⁵ Macedonia durr mʉch barchetarr aigmua chan bʉ̃ʉrjã jua ʉ̃yaa khaugba chiraajem, phithuurga aawai; mʉg iek jaau nʉm gaaimuajã õrau ideu maach khajap sĩuba aajem; mag nʉm dʉi ĩchab chikhamnau pãar dʉi jãga ajuutaa jãagjem khai a khĩirju chirʉʉ aajeejim.

⁶ Pari ich Ẽwandamauta õor okhĩirjuu khitheem khʉʉnjã deeu khĩirdam onee apiejeewai Tito barbaichem gaaimua Ẽwandamau mʉchjã agjo khĩirdam onee apijim.

⁷ Pari mag sĩi i barbaichem gaaimuapai khaba, mag nʉm dʉi ĩchab ichdeujã pãar oothurwia pãar igmamua maach jʉ̃gaagaa jaaubaicheewaita chadcha mʉ onee aadejim. I iek mag pãrau mʉ oom khõchaaga nʉm aajem. Mag nʉm dʉi pãachjã okhĩirjuu naajem aajem, pãach aar jãg problema wai narr gaaimua mʉjã mau okhĩirjuu chirarr ũrwia. Mag pãrau mʉ eugar iekhaajem khʉʉn dʉijã jũrr mʉ kõit iekhaajem aajem a jaaubaicheewaita warag mʉ oneeubaadejim.

⁸ Ar nacha mʉchdeu pãrag ẽsap deepʉitarrau chadcha pãar khĩir naaupiju khaphʉ chirarr aawai mʉchpa okhĩirjuu chirajim. Pãar chadcha khĩir naaujierrab mamʉ khũchpai ajim. Mamʉ ʉu pãrau mʉchdeu jaaupʉitarr ipierr pãach problema arreglaabarm anʉm ũrwia

⁹ ĩs deeu mʉchpa onee chirʉm. Majã mag pãar wajap khĩir naautarr gaaimua khabam; mʉ onee chirʉmʉn, mag pãach khĩir naaubaawai deeu Ẽwandam dʉi wajapha nʉisim anaawaita mʉ onee chirʉm. Mamʉ ĩs wajapha khĩirjuawai chan bʉ̃ʉrjã pãar khaigba khabajim; wajapcharan ʉu ich Ẽwandamauta mag ẽsap gaaimua pãar khĩir naaupijim, magbarmua ichdeu khõsi simjo amkhĩir.

¹⁰ Ar dich khaibag gaaimua Ẽwandamau maach okhĩirjuu api sĩeb mamʉ, warag irigta dich khaibag thum isegpi jeeuwain i dʉi khõinaa nʉisiejem. Magbarm aigmua khanthee tag okhĩirjuu aju. Pari ar sĩi amach khaibag gaaimuapai okhĩirjuu nʉmta ãsie ewag khĩirjuwia Ẽwandamagjã jeeubam chan pod peerdʉbam.

¹¹ Pãade oobat, jãg pãar okhĩirjuu narr jũrr jãgajĩ Ẽwandamau pãar dʉi: Warr pãrau jãg woun khaigba simjã oobamjo wai naajim; pari ĩs pãrau i dʉi sĩi par daúa ooba chi iekkhõr eudʉ auwia ya arreglaapʉijierram, pãachpata dʉi khaigba nʉm am ugua. Chadcha pãrau jãg khõchkhaba narr aawai dʉi khĩir mas chi iekkhõrjã eudʉ aujierram. Jãgbarm aig chadcha pãrau Ẽwandam okho nʉm anʉm. Chadcha mag pãach oon mapim khõsi narr aawai chi mag ich bãaurr ũan dʉi sĩerrjã mʉ barju nawe pãrau i dʉi sĩi par daúapai oobajierram. Pãrau i dʉi mʉgbarmua bigaaum khʉʉnaujã pod pãachdeujã pãach ipaarmua jãgpim khõsi narr aawaita jãg sĩi oo wai naajim aju khaba nʉm.

¹² Mua jãg pãrag ẽsap gaai phã deepʉitarr chan, jã chan sĩi chi mag ich bãaurr ũan dʉi sĩerr appaita ayudam khõchgau khaba ni chi aai atheepaijã khabajim. Mua jãg ẽsap phã deepʉitarran, jãan Ẽwandam dakhĩirjã chadcha pãrau mʉ iek ʉkhaju wa ʉkhabaju khap amkhĩir ajim. Magua mag phãawaijã, amau mʉ khõsi nʉmʉn mʉ ipierraa aju a chirajim, pãar igwia mʉch odegpai. Pari mua khaphʉ chirajim, pãrau chadcha mʉ khõsi naawai mʉch ipierraa aju.

¹³ Mag pãach garmuajã mʉ khõsi nʉm gaaimua chadcha mʉ onee chirʉm. Pari ʉ̃rcha mʉ onee arran, Titojã pãrau wajapha pãach ee wai naawia ĩchab i khĩir onee apitarr gaaimuata mʉchjã onee ajim.

¹⁴ Titoou pãar oon maju nawe pãar Ẽwandam dʉi wajapha nʉm ya mua irig jaau wai chirajim. Mʉchdeu irig jaautarrjo chadcha pãar ich mag wajapha nʉm anaawai ʉu pãrau mʉ khĩir naaupibajierram. Pãrau khaphʉ nʉm, mʉ pãar aar chiraajeewai warm khʉʉn igwiajã mua seukha nem jaauba aajeejim. Maagwaita pãar igwi mag mʉch onee chirʉm Titoog jaau chirarrjã chadcha ich ag ee oberjim.

¹⁵ Magtarr aawai mag mʉchdeu jaau chirarrjo ich daúacha oobathuurwaita pãar aarmua beeu i onee sĩeichejim. Jãg pãachdeu irua nem khõsimjota waum khõchgau ich dʉi wajapha arr khĩirju nʉm dʉi jãga ichdeu nem jaauwaijã pãachdeu i ipierraa naajĩ a khĩirjubaadeewaita ichjã warag ʉ̃rcha pãar gaaimua onee sĩejem.

¹⁶ Magua ĩs chadau pãrau chadcha mʉch khõsinaa mʉch ipierraa ab khaba ipierraa nʉm khaphʉ chiraawai chadcha mʉ onee chirʉm.