2 Corintios 6 - Wounaan Meu

¹ Mʉchjã Ẽwandam dʉita phidkha chiraawai irua pãach dʉi wajapha am khõsi sim mua jaau chirʉm chan oob pãrau par jʉ̃gʉupai ũrmiet a chirʉm.

² Ẽwandamau ich iek phã sim gaai jaauwai, “Mʉchdeu ũrju arr dʉicha jeeubaawai mua pʉ iek ũrjim” a sim; maimua “mʉchdeu õor peerdʉ auju edcha jeeutarr aawai ʉu pʉ khaigper aujim” a sim. (Is. 49:8) Magua ĩsta pãrau irig pãach peerdʉ aupi jeeumʉn, ĩsta chadcha irua pãar peerdʉ auju edau.

³ Mua chan bʉ̃ʉrjã iwiir ãbam khʉʉn dau najã nem khaigba wauba aajem, magʉm gaaimua ãbmuajã mʉg mʉchdeu jaau chitʉm iek isegam ugua.

⁴ Magpiju khãai mʉch nem wau chitʉmpierr nem wajaphata waaujem, magʉm gaaimua mʉch chadcha Ẽwandam chogkha chitʉm thumaam khʉʉnag khap amkhĩir. Mʉch dau aug wau chitʉmjã igba, mʉchdeu nem ig chirʉm chukhu aawaijã magʉm aba, sĩi phithurg au chirʉm paarjã magʉm aba, sĩi khĩuu ãwaatjem.

⁵ Chaaijo sĩi mʉch wʉ thʉnʉʉuwaijã khĩu ãwaatjem. Mʉchdeu jaau chitʉm gaaimua õor phogdʉwia mʉ ẽudeejã ẽkhaajem; khar cárcel degjã chiraajem; phidag theegjã phidkhaajem, maimua dau khõreu nʉm, jãsog ãwat nʉm, magʉm thum mua sĩi khĩu ãwaatjem.

⁶ Ĩchab chadcha mʉchta Ẽwandam chogkha chitʉmjã õrag khaphʉ apiejem: mʉch bʉ̃ʉrjã ʉʉin wauba chirʉm gaaimua, chadcharam iekta mʉchdeu khaphʉ chitʉm gaaimua, maach khapeen dʉijã khĩir thũunaa thumaam khʉʉn dʉijã o wajapha chitʉm gaaimua, mʉch gaai Ẽwandam Akhaar wai chirʉm gaaimua, chadcha thãraucha mʉchdeu pãar khõsi chitʉm gaaimua,

⁷ chadcharam iekpaita õrag jaau chitʉm gaaimua maimua ich Ẽwandam jua theegjã mʉch gaai wai chitʉm gaaimuajã õrag khaphʉ apiejem mag mʉch Ẽwandam chogkha chitʉm. Mag mʉch nem agcha wau chitʉm gaaimuata mʉch eugar iekhaajem khʉʉn dʉijã sĩi khajap jãau chaar jãau nʉmjo jũrr peermiepʉpʉigmamua mʉch garmua khĩupaa sĩiujem.

⁸ Khar am den maach khĩir onee iekhanaa khar jũrr maach khĩraajã iekhamaajem; khar maach wajapha ig iyʉʉnaa khar maach ãaukhajã iekhamaajem. Pari par am mag iekha naawiajã mʉʉn maach Por Cristo dʉita ich mʉg i chogkha chitaju. Chadam iek appai jaau khitaajemta am iek mag seunemjã chitʉm aajem.

⁹ Thumaam khʉʉnau mua Ẽwandam iek jaau chitʉm wajapha khaphʉ nʉmta, am den maach dʉi parhoobam khʉʉn dʉímjota aajerram. Thõju jʉr chitʉmjo aajemta, cha agtha am i ee pʉʉrba chitʉm; wajap mas aajeeb mamʉ, chi thõo chan thõoba aajem.

¹⁰ Amau oowai okhĩirjuumjo chiraajeeb mamʉ, onee chirʉmta jãg chiraajem; amau mʉ dau aphʉʉmjo oojeeb mamʉ, mag chirʉmuan jũrr õor khapan nem jua paraamjo apiejemta mʉg chirʉm; amau oowai mʉ bʉ̃ʉrjã nem inagdam chukhu chitʉmjo oojeeb mamʉ, bʉ̃ʉrjã augchee khaugba chitʉm.

¹¹ Khodamnaan Corintopien, chadcha mʉch thãraucha pãar khõsi chiraawai mua pãrag bʉ̃ʉrjã nem meerbata jaaubarm.

¹² Mʉch garmua chan mua bʉ̃ʉrjã pãar igbam aba chirʉm, mag khãai pãach garmuata mʉ igba nʉm khai mʉ igba nʉm.

¹³ Jooinau amach chaainag iekhaajemjo muan pãragjã, mʉchdeu pãar khõsi chirʉmjo pãach garmuajã ich agjo mʉ khõsi abat a chirʉm.

Maachin Ẽwandam diiu

¹⁴ Ẽwandam iek ʉkhaba thʉnʉm khʉʉn dʉi chan oob pamiet; magʉm khʉʉn dʉi chan phatkhonau phidkhaagjã oob sociokhamiet. Ẽwandam iek ʉkha sim, ʉkhaba sim dʉi ãba khaba sim. ¿Pãrau oowai khĩchag ararag dʉi ich agjoo sĩ? Ich agjoo khaba sim. Maach wounaanjã ich jãgta thʉnaabahab Ẽwandam iek ʉkhaba thʉnʉm khʉʉn dʉi oowai.

¹⁵ Cristojã pod mepeer dʉi khapeerkhaju khaba sĩewai i iek ʉkha durrum khʉʉnjã i iek ʉkhaba nʉm khʉʉn dʉi ich agjota nʉm.

¹⁶ ¿Khan gaaimua ãba nʉm aju aai sĩ, Ẽwandamag jeeu nʉm sĩi õrau juau wautarrta am ẽwandam anʉmʉg jeeu nʉm dʉi? Pãade pãach gaaita khĩirjubat: Maach mʉg Ẽwandam iek ʉkha nʉm khʉʉnta Ẽwandam chadcha iiu sĩerrʉm ag dikha naabahab, ich iek gaai jaau simjo. Ichdeu ich iek gaai jaauwai, “Mʉʉn am ee ich jãg chitʉmua mʉchta am Ẽwandamkha chitaju, maagwai jũrr amach mʉ phoborkha nʉisiju” a sim. (Lv. 26:12; Ez. 37:27)

¹⁷ Magua ĩchab ich ag iek gaaipai jaau simjo: “Ẽwandam chaar khabamʉg jeeujem khʉʉn eemua oberwia chaaug ereubaadet; oob am denjo mʉ dawag khaba maach inaam nem waumiet” a sim. (Is. 52:11) “Pãrau magta mʉ ipierraa amʉn mua pãar auju,

¹⁸ magbaawai mʉchta pãar Aaikha chirsiewai pãar jũrr mʉ chaainkha nʉisiju” a sim Ẽwandam maach Por chi jua thierriu. (2 S. 7:14; 1 Cr. 17:13; Is. 43:6; Jr. 31:9)