2 Corintios 5 - Wounaan Meu

¹ Keena, maach mor mʉg simʉn sĩi khũchpaim athee di eu sĩutarrjota sim. Pari maadeu khaphʉ nʉm, mʉg jẽb gaai aawai maach mor mag dijo sim jẽeubaadeewai jũrr ʉ̃gthar Ẽwandamau maach athee bʉ̃ʉrjã jẽeuba aajem diita wai sim. Mag di chan sĩi õrau eutarrjã khabam.

² Mag khĩirjubaadeewaita mag mor dijo sim aum khõchkhabaadeejem. Jãga akhiin meejã meeba mʉiguim mor sĩi isegpʉinaa ich mʉgta warre mag ʉ̃gthar Ẽwandamau maach athee mor iiur wai simta athaimakham.

³ Wajapcharan maach meewai maach akharan di chukhumjota aadeejeewai sĩi ich mʉg bʉ̃ʉrjã meebata mag mor iiurta sĩi khajũajo theg jũapʉim khõchkhabaadeejem, magbaawai sĩi di jooi garmua di iiur deg dʉrbabaademjo aag.

⁴ Mʉg jẽb gaaita maach eu eepai wenʉrrʉm aiguin thõmapha sĩi warag maach mor mʉg sim ʉ̃rpaita mag Ẽwandamau maach athee mor iiur wai sim anʉmjã jũapʉim khõchkhabaadeejem; magbarmua maach mor mʉg dajẽkhu khitʉmta jũrr dajẽgba ich mag sĩsimkhĩir.

⁵ Magaag atheeta warre Ẽwandamau maach ompaawaiwe dajẽgba aajem mor khĩirta deejim; pari magtarrta pekau gaaimuata maach mʉg dajẽkhu khitheem. Mamʉ magʉm ãba deeu mag mor iiur maachig deeb khaba deeju khap amkhĩir ich Akhaarjã maachig deejem.

⁶ Ich Ẽwandamauta mag sĩewai chadcha ich mag aju khaphʉ chirʉm. Maachta mʉig eegar agtha maach eu ee wenʉrrʉm aiguin maachin Ẽwandam warp deeum durr nʉmjota wenʉrrʉm,

⁷ chadcha daúacha i ooba naawai. Pari magʉm ãba ichdeu maachig deeju a jaau sim chadcha deeju khaphʉ i iek ʉkha naawaita

⁸ thõjujã khĩirjuba chirʉm. Mag mʉ meewiajã ichiita maach Por Cristo aar i dʉita ãba chiraimaju khaphʉ chirʉm.

⁹ Maguata, agtha mʉg jẽb gaai chitaju wa jopcha i aar maju awiajã, mʉig eegarweran ãba i dawagaata nem wauju khĩirjuajem.

¹⁰ Ichiita maach mʉg thʉnʉm khʉʉnan thumaa Cristo ich porkhau pom sim gaai oo sim khĩirphee wetab khaba wetju. Maigta mʉg jẽb gaai naajeewai dichdeu i athee nem waaujerr paarjã jũrr ich garmuajã agpierr deemaju.

Cristo iekta jaaujem i dʉi khõinaa amkhĩir

¹¹ Mʉchdeu Ẽwandam okho chitʉm khap, tagam khʉʉnagjã i ogkhawia i dau na nem khaigba waupim ugua, i iek ʉkhapi aujuuta ẽkhaajem. Mʉ mag agcha chitʉm Ẽwandamau wajapha mʉ khaphʉ sim, maagwai pãraujã mʉ khaphʉ nʉm mua nem agchata wau chitʉm.

¹² Mag nʉm aig chan mag mʉchdeupai wir aig mʉch thowiata mag iekha chirʉmjã aba chirʉm. Mua mag chirʉmʉn, mʉch mag agcha nem wau chitʉm oowai mʉ gaaimua pãach chigaa am uguata mag chirʉm; maagwai ar amachdeupai amach tho iekha nʉrrjeem khʉʉnau pãach dakhĩir mʉ eugar khaigba iekhaawaijã jaau khaphʉ amkhĩir. Chadcha Ẽwandam daar amach thãar khaigba nʉmta magba nʉmjo amachdeupain amachta tho iekhapim khõsi aajem.

¹³ Õrau oowai mʉ sĩi lokoomjota phithurg au chitʉm oojem khai, mʉ gaai mas khaba sim; mʉ mag oo nʉmʉn jãan Ẽwandamau jaau simjo ipierraa am khõchgauta õrau mʉ jãg oojem. Pari lokoo khaba sĩi mʉch khĩir ich mʉg chirʉmʉn, jãan pãachig wajapcha i iek jawaagau.

¹⁴ Cristoou mʉch daupii aajeewaita muajã mʉchdeu nem waum khõsimpai wauba, ãba i iekta mʉch khapeenag mʉg jaau chitaajem. Mag ãb maach gaaimua meetarr aawai ya maach thumaam khʉʉnta khechphobaademjo ajim, tag dichdeu nem khõsimpai wauba aag.

¹⁵ Chadcha Cristoou thumaam khʉʉn kõit ʉdʉraa ich thõopiwia deeu iiu phiidʉjim, mag ich iek ʉkha nʉm gaaimua ichdeu iiu aumam khʉʉnag amachdeu khõchagpierr nem wau wenʉrraba sĩi ich atheepaita nem wau wenʉrramkhĩir.

¹⁶ Warran muan chadcha Cristo sĩi parhoobam khʉʉnjopaita simpii chirajim, pari ĩs ya i iek ʉkha chiraawai mua khaphʉ chirʉm, í chadcha Ẽwandam Iewaau. Magua warramjo khaigba khĩirjuba chitaawai mua chan sĩi parhoobam khʉʉnau iekhaajemjo õor eugar “Jãkhʉʉnan magta sĩerrjeem” a jaauba chitʉm.

¹⁷ Ya Cristo dʉita sim wounan warr ich sĩerrjo khaba, woun chi iiurigta pa sĩsimjo sim. Magbarm aigmua warr nem khaigba waaujerr khĩirjug thum isegpʉiwia sĩi khĩirjug iiurta wai sĩsim.

¹⁸ Mag simʉn thum ich Ẽwandamauta mag khĩirjug iiurig paapʉimaajem Cristo gaaimua. Ich Cristo gaaimuata ĩchab ich dʉi tag iekkhõr chukhu khõinaa wenʉrrapinaa maachigpaita tagam khʉʉnag jãga amjã agjo Ẽwandam dʉi khõinaa wenʉrraju aai nʉ a jaaupi jaaujim.

¹⁹ Wajapcharan Cristo gaaimuata mʉg jẽb gayam khʉʉn thum Ẽwandamau ich dʉi khõinaa naapiju aai apijim, ich iek ʉkhamam khʉʉn pekau perdonaawia tag magʉmjã igba; pari ichdeu õor dʉi mag sim khap amkhĩir maragta mag ich iekjã jaaupijim.

²⁰ Magua maarta Cristoou ich jũrr chogpʉitarr khʉʉn aawai maarta i iek jaaujem khʉʉnau. Magua marau i iekta maach iek gaai thʉwi mag nʉm: I iek ʉkhawia pãach khaibag irig chugpaapi jeeubat, Ẽwandam dʉi khõinaa wenʉrraag.

²¹ Cristo chan bʉ̃ʉrjã pekau wauba khitajim; pari mag khitarrta, Ẽwandamau ʉdʉraa i thõopijim maach thumaam khʉʉn kõit, ichta mag pekau wauwia chi ikhʉ arrjo; i dʉi magbarmua jũrr maach denta chugpaabapäaiwai pekau chukhu narrjo nʉisimkhĩir.