2 Corintios 4 - Wounaan Meu

¹ Magua mʉch chan khuseukhaba chitʉm, Ẽwandamau ich garmuata mʉch dau aug khaugwia ichdeuta mʉrʉg mʉg phidagjã deetarr aawai.

² I ipierraa am khõchgau meraa nem wauwia deeu agʉm gaaimua mʉch khĩir naauju ayaam nemjã mua bʉ̃ʉrjã wauba chitʉm. Mua chan sĩi jãg khaphʉm anʉmta ar parhooba nem jaau nʉrrjeem khʉʉn khaba aawai õor khũgurwia maach Ẽwandam iek phã sim gaai chaauraapaijã jaauba chitʉm. Ẽwandam dau na magju khãai muan ãba nem agcha jaaujuuta ẽkhaajem. Mua mag nem jaaunaa wau chitʉmjã chi mʉ oojem khʉʉnau ni ãbmuajã meraa khaba nʉm.

³ Mua mʉg Ẽwandam iek jaau chitʉmjã õrau pod khaug auba nʉm khai, magan makhʉʉnan agtha putiu dau eu ʉ̃r borr nʉmjo naawaita amach okhoo nʉm gaaimua mag khaugba nʉm.

⁴ Ich chi dosãt mʉg jẽb gayam khʉʉn ẽwandamkha sĩerrʉmuata am dau khĩpi wai sim dʉi am khĩirjug ʉ̃rjã putiu borr wai simjo sim, maach Cristo thumaam khʉʉn khãai ʉ̃rpai sim iekta ʉkhapimaaugau. Mag Cristo iekhaupaita õtdau bʉʉg nem oowai khaphʉ aajemjo maachig khaphʉ api sim, Cristo gaaita ich Ẽwandam khĩir theg sim.

⁵ Mʉ chan pãrag wir aig mʉchta pãar porkha chirʉm a jaauba chitʉm, muan Jesucristota õrag amach porkhapimkhĩir jaau chitaajem; í khabahab chadcha maach Por. Mʉch garmuajã Jesucristo khõsi chirʉm gaaimua, mʉg i iek jaau chitʉmua mʉʉn sĩi pãar chogkhata chitʉm.

⁶ Ar mʉg durr ompaa naawaijã sĩi ich iekhaupai khĩchag eemua ararag ompaa autarr ich ag Ẽwandamaupaita ich iekhau maach khĩirjug aardʉ athamjo ajim, magbarmua maach Ẽwandam thumaam khʉʉn khãai wajaug sĩerrʉmta Jesucristo gaaimua khaphʉ nʉisimkhĩir.

Dau aphʉʉ awiajã Ẽwandam maach dʉi sim khaphʉ nʉm

⁷ Pari mag Cristo iekta phatkhon khãaijã ʉ̃rcha balee simta sĩi maar mʉg dau aphʉʉ durrum khʉʉnauta jaau wenʉrraajem. Pari mag Ẽwandamau maar mag khitheem khʉʉnagta ich iek jaaupi sim chan maachta wajaug nʉm amkhĩir khaba, sĩi ich Ẽwandam jua theegauta mag wau nʉm a khap amkhĩrau.

⁸ Maguata mʉʉn mʉg chitʉmʉn, nem khĩirpierramuata chachmamjo aajeeb pari warag magʉmpaita khĩirju chirʉʉjã aba chitʉm. Khar mag dau aug waauwaijã magʉm igwia warag nem wauju khaugba aadeejeeb mamʉ, magʉm gaaimua okhĩirjug poomajã aa khaugba chitʉm.

⁹ Õraun mʉ khaibag wawaag mʉ ẽudeejã ẽkhaajem; pari jũrr amau mag nʉm ee Ẽwandamau mʉ kha ogdʉba ichdeuta mʉ thʉa wai nʉrraajem; thõoju ẽkha nʉmua mas deejeeb pari warre thõo chan thõoba aajem.

^10-11 Jesujã juauta am den i thõopʉitarr aawai mʉjã agjo mʉch chitʉmpierr i gaaimua thõjuuta jʉr chitʉmjo aajem, mag dau aug wau chitʉm gaaimua õrau oowaijã chadcha ich Jesús mʉ thãar ee iiu simuata mʉch thʉa wai nʉrraajem khap amkhĩir.

¹² Mag i iek jaau chitʉm gaaimua mʉchin chadcha thõjuuta ẽkha chitʉmjo aajem, pari mua mag jaau chitʉm gaaimua ʉu pãar chi ʉkha nʉm khʉʉnan jũrr iiuta iiu nʉm, i iek ʉkha nʉm gaaimua.

¹³ Pari chadcha Ẽwandamau mag mʉch thʉa wai sĩeju khaphʉ aawaita David khararrau iekhatarr iekhõoin, “Mʉch oomapham khʉʉn jua eemua Ẽwandamau ʉu mʉch chig apiba obeerpiju khaphʉ chiraawaita warag i iekjã ogkhaba jaau chitaajem.”

¹⁴ Mua khaphʉ chirʉm, Ẽwandamauta maach Por Jesús meetarrjã deeu phiriu aujim. Magtarr aawai ichdeupaita ĩchab mʉchjã Jesús phiriu autarrjo phiriu auwia pãar dʉi ãba ich sim aar maach phe arrju.

¹⁵ Mag mʉch dau aug waaujem thum pãrag jaau chirʉmʉn, jãan mʉch mag chitʉm gaaimua pãachta ʉu amkhĩrau, magʉm gaaimua ĩchab Ẽwandamaujã dʉrrcha pãar dʉi wajapha aajeewai ich agjo ĩchab õor khapankham khʉʉnauta ʉkhawia irig ʉu ajim anʉmua i tho iekhamkhĩir. Magamkhĩirta mag mʉch dau aug waaujem pãrag jaau chirʉm.

¹⁶ Mag Ẽwandamau mʉch phiriu auju khĩirjubaadeewaita warag khĩirdam ubʉ ich jãg phidkha chitaajem. Maach mor mʉg chi ʉ̃rʉmʉn chadcha jooiraa pamampierr warag serbiiba pamáma, pari jũrr mag sim maach akharan edau ãspapakhampierrta warag jua thierrpapagmam, Cristo gaaimua.

¹⁷ Mʉig eegar aawai año khapan mʉg dau aug wau chitawiajã mʉg atag ya Ẽwandam dʉi ich mag ogdʉba chiraimanaa oowain sĩi khũchpaita mag aphʉʉ chitarrjoo aju, magʉm thum ãwattarr jũrr Ẽwandamau mʉch wajapcha wai sĩsiewai.

¹⁸ Chadcha agtha mʉchdeu ooba chirab mamʉ, magtarr jũrr Cristoou mʉch dʉi ajapha aju khĩirjubaadeewaita mʉg jẽb gaai sĩi chikham jua machgau aphʉʉ chitawiajã magʉmjã igba chitʉm. Mʉg eegar aawai maadeu nem wajapham oo nʉmʉn jopcha thum chi matarrjã khaugba aju; pari ʉ̃gtharm nem chan chugpaajã khaugba ich mag sĩerrʉm iekhau, oojã khaugba.