2 Corintios 3 - Wounaan Meu

Ẽwandamau iek iiur deetarr jaau nʉm

¹ Mag, muan nem jaauwaijã thum nem agchata jaaujeewai ¿pãar jʉ̃g ee mua mʉch wir aig thowiata mag iekha chirʉmjoo sĩ? ¿Wa mʉchjã warm khʉʉnjo pãar aar ẽsap dʉita maju aai chirʉ́wa? Mag khabam. Ẽsap chukhu mawiajã ya pãrau mʉ khaphʉ nʉm. Ni warm khʉʉnag mʉchdeujã Ẽwandam iekta jaau chirʉm a khap amkhĩirjã pãar jua eem ẽsapjã igba chirʉm.

² Mʉrʉgan, carta chaarta mʉch dʉi wai chitaju khãyau pãach chi ʉkha nʉm khʉʉnta carta chaarjo nʉm. Mua jaau chitʉm iek ʉkhawia Ẽwandam dau na pãar wajapha wenʉrrʉm oowiata carta gaai jaaupʉi nʉmjo õrau khaphʉ naabahab, chadcha mua wajapha Ẽwandam iek jaau chirʉm.

³ Chadcha amau wajapha oo nʉm akhiin, pãar khabahab ich Cristooucha carta phãtarrjo nʉm. Mag cartajo ichdeucha phãtarr aawai plumaau phãtarrjã khaba, sĩi ich Ẽwandam warrgarwe ich mag iiu sĩerrʉm ag Akharauta ẽsap gaai carta phãtarrjo sim. Mag phãkha sĩsimjã sĩi warrgar Moiseeg phã deetarrjo mokdau gaai khaba, pãar thãar eechata phãkha sĩsimjo ajim. Ajapcharan mʉrʉg ich iek jaaupi simua warre pãach thãrauchata ʉkhapijim.

⁴ Mua chadcha mag iekha chirʉm, Ẽwandamauta Cristo gaaimua mʉch iekha chirʉmjã khaphʉ api sĩewai.

⁵ Mag nʉm aig chan mag mʉchdeu nem wau chirʉmjã thum mʉch juapaauta wau chirʉm aba chirʉm. Mua khaphʉ chirʉm, mʉchdeu nem wau chirʉmjã Ẽwandamau juapadam dee simuata waaujem.

⁶ Ichdeuta mʉrʉg juapadam deejim, ich chogkhanaa ich garmua õor dʉi aju iek deetarr jaaumkhĩir. Pãrau khaphʉ nʉm, mag i iek iiur mua jaau chirʉm chan warrgar Moiseeu dau daau phã pʉatarrjo khaba aawai pãach thãar ee sĩeichemjã pãrau pod ooba aajem. Mag Moiseeu phã pʉatarran dau daau sĩejieb pari magua õor peerdʉ auba aajeejim. Mamʉ ĩs jũrr ag khãai Ẽwandam Akhaar maadeu ooba aajemuata õor peerdʉ aaujem.

⁷ Mamʉ Ẽwandamau mokdau gaai phãtarr iek Moiseeu waibeewai, sĩi ichta edau khĩirjo khĩir bʉ̃ʉmjo beetarr aawai, israelnaanau pod i khĩir eerpabajierram aajem, dau khakhaichgau. Mag beejieb mamʉ ich mag sĩerraag khaba arr aawai okhar magba pamamua tag bʉ̃ʉ khaba aadejim aajem i khĩir. Mamʉ pãade wajapha khĩirjubat. Mag ich Ẽwandamaucha mok gaai phã deetarr iek ajieb mamʉ maach peerdʉ aubaju iek ajim. Mag sim ãba jaaucheewaijã ich wajaugau sĩi mag Moisés khĩir bʉ̃ʉmjo apitarrta,

⁸ jãgwia ag khãyau atcha wajaug abaju sĩ ich Ẽwandamau ich Akhaar gaaimua õor dʉi deeu iek deebarmua am peerdʉ auju jaau nʉm.

⁹ Wajapcharan mag maach peerdʉ aubaju iek jaautarrjã wajapha arr khai, magan ich iek ʉkhabaadeewai Ẽwandamau maach kulp chukhu apʉiju jaau nʉmta ag khãai wajapcha sim.

¹⁰ Nacha mag mok gaai phã sĩerr ag ajaug chan ẽudee mag Ẽwandamau maach peerdʉ auju jaau nʉm iek dʉi bʉ̃ʉrjã barba sim.

¹¹ Mag iek phã deetarr wajaugau Moisés khĩir bʉ̃ʉmjo apitarrta õtdaujo okhar thõmamua chugpatarr khai, magan Ẽwandamau ich Akhaar gaaimua õor dʉi iek deetarrta wajapcha sim, ag khãyau bʉ̃ʉrjã chugpaa khaugba sĩerraawai.

¹² Mag i iek ʉkhabaadeewai Ẽwandamau maach kulp chukhu apäaijemjã wajapha khaphʉ chiraawaita, mʉchdeu jaaum aig warre i iek dawaata jaau chitaajem, iek wajapham aawai.

¹³ Moisés Sinaí durrsĩ gaai Ẽwandam dʉi iekha sĩi awia beewai ich khĩir sĩi bʉ̃ʉmjo thʉnarr okhar chugpamam israelnaanag oom ugua, ich khĩir gar putiu borr aaujeejim anaabá. Pari ewag paawai mag irua waiberr iek khãai jũrr chi iek iiur pierrumta wajapcha sĩewai mua chan mag i denjo meerba muan warre dawaata jaaujem.

¹⁴ Pari mag Moiseeu ich khĩir appai borr aaujerrta thum israelnaan khĩirjugpata Ẽwandamau mag put eegar borr athamjo ajim. Maguata ewag pawiajã par Ẽwandam iek thʉ̃r nʉmjã pod khaugba aajem, mag borr simjo sim khecheupʉiba sĩewai. Mag khĩirjugjã putiu borr simjo sim khecheupʉyaagan Cristo iekta thãraucha ʉkhaju aai nʉm.

¹⁵ Ĩs ewag pawiajã, mag sĩsidʉm khʉʉnau ich Moiseeu ẽsap phã pʉatarr gaai thʉ̃ʉrwai agtha amachdeu thʉ̃rmamjã khaugba nʉm.

¹⁶ Pari Ẽwandamag amach pekau chugpaapi jeeuwaita mag am khĩirjug putiu borr simjo simjã warre barbapʉimjo aajem.

¹⁷ Warran Ẽwandam warp narrta ya i dʉicha wenʉrrʉmjo nʉm, mag Moiseeu phã pʉatarrau tag phẽethʉgba naawai. Magua mag dich pekau chugpaapi jeeuwain warre ich Ẽwandam Akhaarta wai nʉisiejem.

¹⁸ Maguata maach i iek ʉkha durrum khʉʉn chan mag agtha putiu khĩir borr nʉmjo khaba aawai espheg dau wajapham ee oo nʉmjota ich Ẽwandam wajaugjã maach gaaita õrau oo nʉm, maach nem wajapha wau nʉm gaaimua. Mag nʉmua maachin waragta ich Ẽwandam Akharau wajaug paamaawai warag maach Por Jesujota paaukhamam.