2 Corintios 2 - Wounaan Meu

¹ Mag mʉch barbaimaawai pãachta khĩir naauwia okhĩirjuu apimaaugauta agtha maba chirʉm.

² Mʉ mawia pãachig iekhabaimaawai pãar okhĩirjuu nʉisim oobaawai, ¿jãga mʉchjã onee abarju pãar dʉi? Maig chan maach thumaa onee aju arrta sĩi warag okhĩirjuuta nʉisiju.

³ Mag khĩirjuwiata ar nacha mʉchdeu pãrag ẽsap phã deepäaiwai ag gaai sĩi jaaupʉi chirajim, mʉch barju nawe pãach appai iekhawia mag khaigba aadep nʉm thumaa wajapha arreglaamkhĩir. Mua khaphʉ chirʉm mʉch onee aju, mʉ barju nawe pãrau mag problema arreglaapʉimʉn; mag amʉn mʉch appaijã khaba pãachpata dʉi onee aju.

⁴ Pari jãg ẽsap pãrag deepʉyaag phã chiraawai thumaa khĩirjuwia gaai machaaga aademua warag mʉchta bĩejeejim. Pari mʉch meerba chirʉm, mua ẽsap gaai pãrag jãg phã deepʉitarr chan sĩi pãar okhĩirjuu apieg khabajim. Magju khãai ante jãg phã deepʉitarran, mʉchdeu chadcha pãar khõsi chirʉm khap amkhĩir ajim. Mua pãar khõchkhaba chirakhiin, pãar jãjãgkhamjã mʉ gaai mas khaba chiraajeekham.

Ich bãaurr ũan wai sĩerr perdonaapi jaaupʉitarr

⁵ Pari iwiir ãbpaimua jãg mʉ okhĩirjuu apitarr chan mʉch appai khaba, jãan chi iglesia eem khʉʉndampata thum ich jãg okhĩirjuu apijim, ich jãg khaigba arr gaaimua.

⁶ Ya pãach khapanaam khʉʉnauta i castigaatarr aawai ya ich jãgpai ʉu sim.

⁷ Sĩi jãimua pãrau i perdonaawia i khĩir jãsenkhabat, eeu magba akhiin ich dʉi jãgtarr gaaimua warag okhĩirjug pooma aadeewai tag Ẽwandam dʉijã nʉrraju khĩirjuba khãijã adukham.

⁸ I magpim ugua warr pãachdeu i dʉi narrjo deeu ũmaai, “Marau agtha pʉ khõsi nʉm” abat irig.

⁹ Nawe mʉchdeu pãrag ẽsap deepʉitarr gaaijã ich mag mua pãrag jaaupʉijim, chadchata mʉchdeu pãrag nem jaau chirʉm ipierraa nʉ wa ipierraa khaba nʉ a khap aag.

¹⁰ Pãrau perdonaabarm woun muajã agjo i perdonaaju. Mag mua i perdonaabarmjã, chadcha ich khaibag isegbaawai i perdonaaju sĩerr khai, pãar gaaimuata Cristo dakhĩir mua i perdonaaju.

¹¹ Mag i perdonaaba akhiin, dosãtta jũrr maach gaai ʉ̃rpaju; ya maadeu i khaphʉm, í jãga sĩerrʉ́.

Corintopien khap jewaag Pablo Tito dʉi oom khõchag sĩerr

¹² Troas phobor ee Cristo iek jawaan a maawai maach Porou ich iek jaaumkhĩir sĩi phithurgjã chukhu mʉrʉg jaaupijim.

¹³ Pari mag mʉ barimaawai Cristo gaaimua mʉch eeum Tito ooimabajim Troas phobor ee. Magbaawai khakhaisamjo chichiir awia, aiguim khʉʉn hermanonaanag ayoo a pʉawia mua Macedoniaaga, Tito dʉi oog; í pãar aar udthurtarr aawai irig pãar khap jewaag awi mʉ Macedoniaag majim, i sĩerr aar.

Cristo dʉi khapeerkha nʉm gaaimuata thum podpʉpʉi aajem

¹⁴ Pari ʉu ajim a chirʉm Ẽwandamag, Cristo dʉi khapeerkha naawai nem phithurm nemjã i gaaimuata ʉu maach garmua podpʉpʉi aajem paar. Maguata ĩs maach wenʉrrʉmpierr Ẽwandam iek jaauwaijã, warpham magwe jʉ̃gdee thʉ̃ap wejomjo, jũrr maach gaaimuata õrag ich khaugpi sim.

¹⁵ Ẽwandamau oowai maach i iek jaau wenʉrrʉm khʉʉnan incienso warpham magwe thʉ̃ap wejomjota oojem, mag i iek aaidʉmkhĩir jaau wenʉrrʉmua. Mag nʉm gaaimuata chi peerdʉju khʉʉnan peerdʉ nʉm, maagwai chi peerdʉbaju khʉʉnan amachdeu khõs ʉkhaba awia sĩi okhoo thʉnʉm.

¹⁶ Chi okhooju khʉʉnagan, Ẽwandam iekta mag inciensojo warp thʉ̃ap aaidʉ wejomta warag am thõoju pakherjo sim, amachdeu ʉkhaba nʉm gaaimua. Pari jũrr chi ʉu ʉkhawia peerdʉju khʉʉn atheyan mag warpham magwe thʉ̃ap wejomta benhejo sim, warag am iiupi awaag. ¿Magan khaíuta mag Ẽwandam iek warpham magwe aaidʉmkhĩir jaau nʉrrʉmua warag õor iiupi awaag wa thõopieg khãijã jaau khaphʉ sĩ?

¹⁷ Ar pãar ee seukha nem jaaujem khʉʉn khabam. Ich Ẽwandamauta mag jaaupibam chan pod mag jaaubam. Magarrau maach ich Ẽwandamaucha jʉr autarr khʉʉnaun chadau mag jaauju aai nʉm. Marau chan mag am denjo sĩi phatkhon aum khõchgau maach khĩirjug eemuapaita Ẽwandam iek jaau wenʉrraba nʉm. Maragan ich Ẽwandamauchata ich iek jaaupi sĩewai i dau na nem jaau nʉmjã thum agchata jaaujem, Cristo dʉita khapeerkha naawai.