2 Corintios 13 - Wounaan Meu

Pablo salud ãbmiecharam

¹ Mʉg petamua ya biek thãrjup pãar oon mawia chiraju. Mʉ barimaawai pãrau iek eudʉag wai nʉm khai, chi ootarr khʉʉn numí wa thãrjup khãijã nʉm dakhĩirta jaaubat.

² Ar nawe pekau wautarr khʉʉnag maimua thumaam khʉʉnagpa mua ũwaai pʉaba jaau chirʉm, ar ãbmiecha pãar oothuurwai mʉchdeu jaau chirarrjo: mʉʉta ũwaai pãar aar barju atheen, mua chan pãar dʉi ithũu iekhabaju.

³ Cristoouta mʉrʉg iekhapi sim khap am khõsi naawai maigta pãrau khaphʉ aju, chadcha ichdeuta mʉrʉg iekhapi sĩewaita mʉ mag iekha chirʉm. Pãrau Cristo khaphʉ nʉm, í mag sĩi kha thũuta sĩerrʉm khaba aawai irua chadchata pãrag ich juapá oopiejem.

⁴ Amau i thõowain chadcha juapadam theegjã chukhumjo pa gaai ʉdʉraa ich meerphepijim; pari magtarran ĩsin jũrr ich Ẽwandam jua theegauta phiriu auwia iiu sĩejem. Jãg kha thũu ʉdʉraa ich meerphepitarrjo mʉchjã agjo kha thũumjo ithũuta pãrag iekha chitʉm; pari agtha khaigba wenʉrraajem khʉʉnag ikhʉaba iekhaagan nem khĩir ubag chirʉm, Ẽwandam Cristo phiriu autarr ag juapaata wai chiraawai.

⁵ Pãachdeupai wir aig wajapha pãach oobat, pãachdeu Cristo iek ʉkhatarr gaai agtha ubʉ nʉm khap aag. ¿Pãrau khaphʉ naabá chadcha Cristo pãar thãar ee sim? ¿Wa ʉkhaba nʉmta sĩi par iiupaita i iek ʉkha nʉm aajẽwa?

⁶ Muan pãragan, jãg pãachig ikhʉaba iekha chirʉm gaaimua ĩchab mʉchta chadcha Cristo denkha chirʉm khaphʉ apim khõsi chirʉm.

⁷ Pari mag ikhʉaba iekhaju a chirʉmjã, pãar chadcha Ẽwandam dʉi ʉu wenʉrrʉmʉn, nem wajaug kherʉm. Ante pãach i dʉi ʉu wenʉrramkhĩirta warag mua pãar kõit irig jeeu chirʉm. Pari mag jeeu chirʉm chan pãar ʉu wenʉrrʉm oowia jũrr mʉch eugarta bigaaum khʉʉnag wajapha ig iyʉʉ amkhĩir khabam. Mua mag Ẽwandamag jeeu chirʉmʉn, pãachta i dau na wajapha wenʉrramkhĩrau. Mua pãachig jaaupʉi chirʉm ipierraa abarm gaaimua pãachig ikhʉaba iekhaju arrta ithũu iekha chirʉm õrau oobaawai, mʉ eugar Cristoou jʉr autarr chaar khaba aawaita mag iekha chirʉm awiajã, ideu mag sim.

⁸ Mʉ pãar aar barimaawai pãrau chadam iek Cristoou jaau sim ichaaur khaba nʉm ooimamʉn mua pãrag iek khẽgkha iekhabaju, pãar ya wajaphanaa warag ʉkha nʉmta mʉchdeujã oom khõsi chiraawai.

⁹ Maguata pãarta Cristo dʉi ubʉ naapim khõchgau mʉchta iek theeg chukhumjo aawaijã warag onee aajem. Mag onee chiraawai warag mua pãar kõit ich jãg jeeu chitaju, wajapcha nʉisimkhĩir.

¹⁰ Magua mʉchcha pãar aar barju nawe sĩi ẽsapta phã deepʉi chirʉm, ya pãrau mʉ barju khaphʉ naawai ag nawe pãach appai problema thum arreglaapʉimkhĩir; mag thum chi arreglaam aawai pãar aar barwiajã iek khẽgkha iekhaba aag. Magbamʉn mag iekhaju awiajã mʉʉn chadcha iek theeg chirʉm, ich maach Por Cristoouchata pãar khaibag wauba sĩi warag pãar ʉu amkhĩirta mag iek theeg apitarr aawai.

¹¹ Cristo gaaimua khodamnaan, ãbmiecha paawai mua pãrag magkhim: muan pãar oneeta wenʉrrapim khõsinaa pãach khaibag thum isegbapʉit a chirʉm, Ẽwandam dau najã wajaphata wenʉrraag. Magnaa ĩchab agdaujo dich hermanonaan wawí nʉm dʉi o ãba khĩirjunaa khõinaata abat. Pãrau magta amʉn magan mag dich khapeen kha khõsi apinaa maach khõinaa apiejem ag Ẽwandamta pãar dʉi sĩerraju.

¹² Pãach khapeen dʉi agdaujo kha khõsi saludaabat.

¹³ Mau Macedoniamua hermanonaan thum chi ʉkha durrum khʉʉnau pãrag salud aajem.

¹⁴ Muan ãbmiecha paawai maach Por Jesucristoogjã pãar ʉu wai chitapim khõsi, maach Ẽwandam thumaam khʉʉn kha khõsi aajemʉgjã pãar eeg oopim khõsi, maimua ich Ẽwandam Akhaar maach dʉi ogdʉba khitaajemʉgjã ich jãg pãar daumaai nʉrrapim khõsita chiraajem. Ayoo keena, Pablo