2 Corintios 12 - Wounaan Meu

Ẽwandamau Pablo khãaipi auwi iek jaautarr

¹ Iin chadcha dichdeupai wir aig dich tho iekhaawai chan ʉu khaba sĩejem, pari mag nʉm ãba mua pãrag nem jaauju aai chirʉm. Maan ich maach Por Jesuuchata mʉ khãaipi aunaa mʉchig oopinaa jaaumatarrta jũrr pãrag jawaagpam.

² Mua woun ãb khaphʉ chirʉm, magua ĩchab Cristo iek ʉkhaajem. Ya catorce años sim mag woun ich Cristooucha ʉ̃gthar khãaipi autarr. Mag woun mʉchpaiu, pari mua khaugba chirʉm mʉ ich mʉg dau daauta mʉ arrjĩ wa sĩi mʉ akhaarpaita arrjĩ, mua khaugbam; ãba ich Ẽwandamaupaita khaphʉ sim.

³ Pari chi chadcha aan chadcha mʉ arrjim; maata chadcha cha mʉch iyʉʉ chirʉmchata irua mʉ arrjĩ wa sĩi mʉ akhaarpaita arrjĩ, mua khaugbam; ãba ich Ẽwandamaupaita khaphʉ sim.

⁴ Mag mʉ ʉ̃gthar arrwia mʉrʉg nem khĩir pogkhe jaaumajim ich igwia, mamʉ mag ichdeu jaautarr iek mʉg eegarm khʉʉnag bʉ̃ʉrjã jaaupibajim.

⁵ Sĩi bigaaum khʉʉnta mag warrtarr akhiin mua i tho iekhaju aai chirakham; mamʉ mʉch arr aawai mʉchdeupai chan pod mua mʉch thobam. Magju khãai mʉch igju akhiinjã sĩi warag mʉch serbiibagta ig iyʉʉ aju aai chirʉm.

⁶ Pari mua mʉch tho iekhakhiinjã, lokoo chiraawaita mag iekha chirʉmjã abaju, chadcha udthurtarrta jaau chiraawai. Pari ichiita mua mʉch thobam; magba akhiin mag ʉ̃gthar udthurtarr aawai mʉchta ʉ̃rpai chirʉm aju bigaaum khʉʉnau. Pari magju khãai mʉch nem wajapha wau chitʉm gaaimuata mʉ jãsene aju khai mʉ jãsene abat.

⁷ Mag Ẽwandamau ichdeu mʉchig nem oopitarr gaaimua wir aig mʉchdeupai mʉch thom uguata juau ogthomjo ʉdʉraa dosãtag mʉ dʉi mʉgpiwi miuta khagthʉgpʉpʉikhamjo agua dau aphʉʉ chitaajem.

⁸ Ya biek thãrjup maach Por Ẽwandamag jeeuwia chirʉm, agua mʉg mʉch dau aphʉʉ chitaajem chugpaapʉimkhĩir.

⁹ Pari mag ichig jeeuwai warag sĩi mʉrʉg, “Mʉ pʉ dʉi ogdʉba chitabahab, mua pʉ khõsi chitʉm. Jãg kha thũumjo nʉm gaaimuata mʉch juapá õrag oopiba aajeeb” a iekhaajem Ẽwandamau. Ichdeuta mʉ mag wai sĩewai ʉuta jãg mʉ serbiiba chitʉm, mʉch mag chitʉm gaaimua warag Cristo jua theegta õrau ooju aawai.

¹⁰ Magua mʉg mʉch serbiibanaa kha thũumjo chirʉm ãba, onee chiraajem, õrau mʉch khĩircha iekha nʉmjã igba. Mʉchdeu nem ig chirʉm chukhu awiajã magʉm aba, õrau mʉch pʉr auju ẽkhaajemjã igba, Cristo gaaimua mʉch dau aug wau chitʉm ãba mʉʉn onee chiraajem. Wajapcharan mʉʉn ar kha thũumjo chirʉm aigta Cristooujã warag mʉ juapá jãgpi simjo aajem.

Pabloou Corintoom iglesia khĩirju nʉʉ aajerr

¹¹ Amau jãg mʉ eugar khaigba iekha nʉm ũrwi pãrau mʉ igwia wajapha ig iyʉʉ aju aai naajim. Pari magarrjã pãrau bʉ̃ʉrjã magbajierram. Mag pãach warag sĩi khĩuu arr gaaimua pãachdeuta mʉrʉg mag iekhapi nʉmjo aawai chadcha mua lokoomjota mʉchdeupai mʉch jaau chirʉm. Mʉʉn chadcha baleeba chirʉm, pari mua ooba chirʉm, khan gaaimua jãg amach iiupai amta ich Jesuucha jʉr autarr khʉʉn charau aajem khʉʉn mʉ khãyaujã ʉ̃rpai aju aai nʉ.

¹² Pãar aar chiraajeewai phithurg au khitʉm ãba, maach Ẽwandam iekta ogdʉba jaau jẽedʉ khitʉmua i jua theegau mua õor dauderraa nem waaujerr gaaimua merag chukhu pãrau mʉ chadcha Jesucristo i jaaujemkha chirʉm khaphʉ naajim.

¹³ Ãba mua pãar ee aubajimjoo arran, tagam iglesia ee arrjo khaba pãar jua eem nemdamta mua bʉ̃ʉrjã aubajim, eeu degolp mʉ gaaimua jũrr pãachta augchem ugua awia. Mamʉ jãg pãach jua eem nem auba aajerr paar pãachdeujã dʉi mʉ jaauju khaphʉnaa warag dʉrrchata pãrag jeeupʉitarr amuan pãrau mʉ jãsenecha khãijã wai naakham.

¹⁴ Deeu pãar oon maag athee ya mʉ nem thum khĩir khaug wai chirʉm. Mʉg petamua ya biek thãrjupamʉu pãar oon mam. Maadeu khaphʉ nʉm, chaainau amach dennaan athee phatkhon jʉrba chi dennaanauta amach chaain athee nem inagdam jʉʉrjeewai, mʉg maaujã pãar juadam eem phatkhon chan mua igba pãachchata mʉʉn igmam, pãarta mʉch chaainjo wai chitaawai.

¹⁵ Mʉchdeu wai chirʉm thum mua gastaam khõsi gastaawia pãar daupigau mʉchjã mʉg pãar chogkha chitʉmua warag eeg pawiajã magʉmjã igbaju. Pãach garmua mʉ dʉi magcha khaba awiajã mʉch garmuata ʉ̃rcha pãar daupii chirʉm.

¹⁶ Pãrau pãachdeujã khaphʉ nʉm, mʉrʉg nem deem khõchgau jũrr pãachdeu nem ig nʉmta chukhu khaba aajem; pari magʉm ãba am iek mag sĩita mua pãar khũgur aujim aajem, mʉch atheeta jãg phatkhon jʉr phiepi chirajim awia.

¹⁷ Mag khai magan ar mua pãar aar õor pʉitarr khʉʉn gaaimuata mua pãar khũgurjima.

¹⁸ Titoogta mua pãar oon mapijim, dewam hermanodam dʉi. ¿Magan Titoouta pãar khũgurjĩ? Mag khabajim; Tito mʉ dʉi maach numiim khʉʉnau chan ni ãbmuajã maach khapeen khũgurju khĩirjuba aajem. Maach numiin maran ãbam khĩirjugpaita wai nʉm.

¹⁹ Pãrau khĩirjuawai sĩi mua iek thierrkha chirʉmpii khãijã aju; pari mag khabam. Mua khaphʉ chirʉm, mʉ chadcha Cristo denkhanaa ich Ẽwandamaujã mʉ iek ũr sim; magua mʉ pod seukhaju khaba chirʉm. Cristo gaaimua khodamnaan, mua mʉg mʉchpai jaau chirʉmʉn, Ẽwandam iek gaai warag ubʉ naapim khõchgauta mag jaau chirʉm.

²⁰ Mua khĩirju chirʉmʉn, mʉchdeu pãar ooimam khõsi chirʉmjo ooimabajuuta khĩirju chirʉm; wa magbam khai jũrr mʉch khãijã pãar jʉ̃gaag khaba khãijã iekhabaimaawai pãrau khõchkhabaju khãijã khĩirju chirʉm. Mua khĩirju chirʉm agjo eeu degolp pãar ee agtha dich khapeen dʉi khãijã iekkhõr wai naaju, chikham nem khãijã dich den apim khõsi thʉnʉm, meeukha khãijã nʉnʉidʉm, dich khapeen khãai iek theeg ʉ̃rpai aju khãijã ẽkha sĩsidʉm, chikham eugar khãijã seukha nem ĩgkha nʉm, sĩi chikham jaau nʉm, dichpai tho iekha nʉm maimua sĩi pappierr thʉnʉmjo khĩirjugjã ãba khaba sĩsidʉm khãijã khĩirju chirʉm.

²¹ Mua agjo khĩirju chirʉm ĩchab, eeu degolp pãar gaaimua khãijã Ẽwandamau mʉch khĩir naaupiju. Mag amʉn magan ar nawe pekau ee nʉmta jãg maadeu nem waumapham wau nʉmjã bʉ̃ʉrjã pʉabanaa, amach õor khabam dʉijã parhooba khapesnaa maimua warr amachdeu nem khaigbam waaujerrjã ogdʉba agtha wau wenʉrrʉm khʉʉn gaaimua Ẽwandamau mʉ wajappha bĩepiju.