2 Corintios 11 - Wounaan Meu

¹ Mʉg mʉ iekhabaadem nau lokoom denjo pãach jʉ̃gaag khaba khãijã iekhabapʉimjã pãrau warag sĩi mʉ iek ũrkhiin ʉu akham.

² Ẽwandam dau na chikhamnag pãach khũgurpimaaugau pãach dʉi mʉ nem anem chitaawai muan pãragan, ãba ʉʉirau ich jaai auju dʉipai iek dee wai simjo Cristo dʉipaita nʉisit a chirʉm, mag ich dʉipai naawai pekau chukhu arrjo pãach ich aar phe aumkhĩir. Pãrau magta amʉn mʉchjã dʉi onee chiraju maach Por Jesucristo na.

³ Mua chan warrgarwe nemkhõriu Evaag seukhawia khũgur autarrjo pãarjã agjo sĩi parhoobam khʉʉnau nem jaau nʉm ʉkham khõchgau ʉdʉraa pãach khũgurpiwia jũrr pãach khĩirjug ãba Cristo gaai khĩirju nʉmta isegpimapha chirʉm.

⁴ Jãga jãg parhoobam khʉʉnau pãachig Jesús igwia i iek jaau nʉm anʉmta mua jaaujemjo khaba warag chaaurta jaau nʉmjã pãrau magʉmjã aba ʉkhanaa, Ẽwandam Akhaar mua jaautarrjã wai nʉmta makhʉʉnau jũrr i igwia chaauraa jaaubaicheewai majã ʉkha nʉ. Magnaa ĩchab jãga jãg maach peerdʉajem iek anʉmjã chadcha agjoojã khaba simta pãrau bʉ̃ʉrjã magʉmjã aba ʉdʉraa pãachig jaaupi nʉ.

⁵ Amachdeupain amta Jesuu jʉr autarr khʉʉn chaar aawai mʉ khãaijã ʉ̃rpai nʉm anaawai pãrau amau nem jaau nʉmta ʉkha naabma; pãrau am dʉi mag naab pari mʉ chan am khãyau sĩi eegpai khaba chirʉm.

⁶ Tale sĩi iekhaju aig chan nem meu khaug khãijã khaba chirʉm; pari mag awiajã Cristo iek jawaag chan amjo khaugba khaba chirʉm. Mua jaau chirʉm ũrwia ʉkhatarr khʉʉnauta jaauju aai nʉm, chadcha mua jaau khaphʉ chirʉ́ wa jaau meraa chirʉ́.

⁷ Mua oowai, jãg pãachta Ẽwandam dʉi wajapcha naamkhĩir mʉchta dau aphʉʉ parhooba phidkha khitʉmua sĩi ich jãg jeeujã jeeuba maach peerdʉajem iek jaau chitarrau warag mʉchdeupaita pãar khaibag waubarmjo ajim.

⁸ Chadcha sĩi ich jãg par pãrag jaaum khõchgau dewam iglesia eem khʉʉn jua eem phatkhonan mua aujim chadcha, mag athaawai jũrr pãragta jeeuba aag.

⁹ Mʉ jam pãar aar chiraawai iwiir ãbjã mua nem ig chirʉm gaaimua jũrr dau aphʉʉ aba aajeejim, hermanonaan Macedoniamua beetarr khʉʉnau mua nem ig chirarrjã mʉrʉg deechetarr aawai. Mʉ ich magta chitʉmta, mua chan sĩi mʉchig nem deepim khõchgau jũrr bigaaum khʉʉnta amachdeu nemdam ig nʉmjã chukhu apimapha chitʉm. Mʉ ich mag chitaawai mʉg atagjã ich mag chitaju, bʉ̃ʉrjã pãar jua eem nemdam jeeuba.

¹⁰ Pãrau khaphʉ nʉm, mua chadcha Cristo iek chaarta jaau chitʉm. Mag chitaawai khaphʉ abat ĩchab, ãbmua mʉrʉg, “Cristo iek jaau chitʉm paar phatkhon jeeub khaba jeeubá” awiajã mua chan jeeuba ich jãg parta jaau chitaju. Mʉch khĩrauta mag jaau chitaawai mʉchin onee chirʉm, phatkhon jeeuba awiajã.

¹¹ ¿Pãrau khĩirjuawai amau jaau nʉmjo pãar oomaaugauta mua mag pãar phatkhonjã aubam a iekha chirʉ́? Mag khabam. Ẽwandamau khaphʉ sim mua chadcha pãar jãsene chitʉm.

¹² Pari mua ichiita ich jãg phatkhon jeeujã jeeubata õrag jaau chitaju. Magba Cristo i jaau chitʉm paar mua am denjo jeeukhiin, magan mag oowai am onee aju, ya amach phidkha nʉmjota mʉchjã phidkha chirsim awia.

¹³ Pari jãkhʉʉn am jãg wenʉrrʉm chan ich Jesuucha ich iek jaaumkhĩirjã jʉr auba arrta sĩi amach iiupaita mag jaau wenʉrrʉm; mag nʉmta jãg õor khũgur wenʉrraajem.

¹⁴ Chadcha ich dosãt chaarjã Ẽwandam chog khĩir thegwia jãg nʉrraajeewai, chi wounaanjã jãg wenʉrrʉm oowai maach dauderraa aju khaba nʉm.

¹⁵ Ich chi mepeerjã í mag sĩerraawaita i igar thʉnʉm khʉʉnjã õor wajapham khʉʉnkha wenʉrraba aajeeb, dich khapeendampai khũguraag. Pari mag nʉrrjeem khʉʉnan, amach jãg nʉrrjeem paar Ẽwandamau am gaai jua khʉabaju.

Cristo gaaimua Pablo dau aug waaujerr

¹⁶ Na mʉchdeu jaau chirarrjo ũwaai pãrag mag chirʉm: mʉ chan lokoo khaba chirʉm. Pari pãachdeu oowai mʉ lokoomjo chirʉm khai, magan warag ideu lokoomjo mʉ iekhapibat; lokoom khʉʉn denjo wir aigpai mua mʉch tho iekha ookhim.

¹⁷ Mag mʉch tho iekhaagpam chan maach Por Jesucristoou mʉrʉg mag iekhapi sĩewaita mag iekhaagpamjã aba, sĩi mʉch lokoomjo iekha chirʉm gaaimuata mag iekhaagpam.

¹⁸ Jãg õor khapan sĩi amach nem wau nʉm igwiapaita amach tho nʉmjo muajã mʉchdeupai mʉch thokhim.

¹⁹ Pãran chadcha por opherm khʉʉn aawai nem thum khaphʉ sĩsidʉm; pari mag nʉmta magbamjo jũrr lokoo khitheem khʉʉn iekjã ũrm khõsita ũrnaa

²⁰ ar sĩi pãachta jũrr amach chognaan khapim khõsi aajem khʉʉnagjã pãrau bʉ̃ʉrjã magʉm aba aajerram. Ar sĩi pãach thachdam wai nʉmjã thum khopʉinaa warag nem jeeujem khʉʉnagjã magʉm aba pãach khũgurmaajem khʉʉnagjã pãrau bʉ̃ʉrjã magʉm aba nʉm. Ar amachta chi pornaan awi pãach serbiibag pheejem khʉʉnagjã magʉm aba, maimua pãach dʉi mag nʉm khʉʉnaupai amach iek ʉkhamkhĩir pãach phãrmam khʉʉnagjã pãrau bʉ̃ʉrjã magʉm aba aajem.

²¹ Chadcha mag iekhaju chigaa chirʉm; pari mua oowai mʉchigpain atcha ithũuta pãrag iekhaajeejim. Pari amau amachta Jesuucha jʉr aujim awia amachta tho nʉm khai, magan muajã ĩchab mʉch thoju aai chirʉm. Mag iekhabapʉim aig chadcha lokoomjota mʉ iekhabapʉim.

²² Pari amau amachta hebreonaan meu iekhaajem awia amach tho nʉm khai, muajã agjo iekhaajem. Amta israelnaan khai magan mʉjã ich aruu. Amjã jooi Abrán khararr ag chaain ewagam khʉʉn den khai, mʉjã ĩchab i chaain ewagam khʉʉn bi eemʉu.

²³ ¿Amta Cristo chognaan anʉ́? ¡Ih! Mʉ chará am khãaijã Cristo chog chaarcharau. Mua khaphʉ chirʉm, mag iekhabapʉim aig lokoomjota mʉ iekhabapʉim. Mʉchta am khãyaujã ʉ̃rcha phidkhawia chitʉm; Cristo gaaimua am khãaijã mʉchta ʉ̃rcha cárcel deg mawia chirʉm; wajap jʉ̃gad khierrjã khoodaar chitʉm; mʉʉn am khãaijã thõjuuta wau chitaajem, Cristo athee mʉch mag chitʉm gaaimua.

²⁴ Judionaanau wʉm cinco sĩi mʉ wʉ thʉnʉʉujem. Mag wʉ nʉmpierr jʉ̃ap ahaugmamua amach i aawai treinta y nueve aadeewaita tag wʉba ich maigpai sĩiujeejim.

²⁵ Biek thãrjup sĩi paau mʉ pogwʉ thʉnʉʉujierram; biek ãb mokoujã mʉ bar wai nʉʉ awi ya mʉ thõobapʉimpii ajierram. Biek thãrjup khoowia chirʉm biekkha chitʉmua; mag chitʉmua peer thõwia chirʉm. Biek ãb chará mag khoo ũrr chitʉmua khãaim ãb enter sĩi do eepai kheuwia edaarjã ich mag do eepai ãspa chirajim, phũas ee dojãrr.

²⁶ Biek khapan biekkhawia chirʉm; pari mag biekkha chitʉmʉn thõjuuta jʉr chitʉmjo aajem: dosĩg ee khodjorromua, khar sĩi nemjĩgmien dʉi thẽeuwai, mʉch meeunau, mʉch meeun khabam khʉʉnaujã agjo sĩi maach khaibag waum ig nʉmua peer thõwi chirʉm. Khar ĩchab phobor eejã õor phogdʉbaadeewai, sĩi õor chukag ee chitʉmua, phũas ee chitʉm aig maimua seukha sĩi amach iiupai jãg Cristo iek ʉkha nʉm anʉm khʉʉnaujã agjo maach thõojuuta ẽkhaajerram.

²⁷ Mʉʉta mʉg chitʉm aig wajappha phithurg aunaa dau augta wau chitaajeeba. Biek khapan bʉ̃ʉrjã khãijã khãiba sĩi dau khõreu ee chiraajem; jãdaúajã masnaa obichagjã jẽedʉ khitaajem; biek khapan sĩi Ẽwandam athee nem waum khõchgau wajappha jĩchagaujã masnaa khajũadam atheejã dau aphʉʉ khitaajem.

²⁸ Pari magʉm gaaimua mag dau aug wau khitaajeeb mamʉ, pãar chi iglesia ee thum chi ʉkha durrum khʉʉnta ʉ̃rcha ed eepierr khĩirju chitaajem.

²⁹ Mʉch mag chitaawaita ãb khãijã Ẽwandam iek gaai ubʉ khaba oowai mʉchta okhĩirjuu aadeejem; ãb khãijã deeum khʉʉnau pekau ee burrpiewain mʉchta gaai machaaga aadeejem.

³⁰ Mʉchpaita wir aig am denjo ig iyʉʉ aju akhiinjã, mʉchta wajapha chirʉm aju khãai, warag mʉch serbiibagta jaauju aai chirʉm.

³¹ Ẽwandaman thumaam khʉʉnauta ich mag tho iekhaju aai sĩerrʉm. Ichpaita ĩchab maach Por Jesucristo Ayau; magua irua khaphʉ sim, mʉ mag iekha chirʉmjã bʉ̃ʉrjã seukhabata iekha chirʉm.

³² Phobor Damasco anʉm ee mʉ udthuurwai rey Aretaau gobernadorrag jaaubaawai jũrr chi gobernadorrau judionaanag phobor duubjem ee puertdi nʉnʉidʉmpierr mʉ thʉapijim, mʉ pʉr awaag awia.

³³ Pari ʉu maachjo Cristo igar nʉm khʉʉnau mag khaug athaawai kolaauhi gaai jʉ̃gadau jʉ̃khanaa warre chi phobor igaau daaugajãr mʉ eeg jiir burrpʉijierram. Mag, am jua eemua ʉu mʉ peerdʉjim.