2 Corintios 10 - Wounaan Meu

Pabloou ich iek theeg sim jaautarr

¹ Mʉʉn Pablota pãar dʉi iekha chirʉm. Mʉ pãar dʉi meeukhajã meeukhaba, sĩi Cristoou api simjota ithũu pãrag iekha chirʉm. Am iek mag pãar okgauta pãar dʉi ãba chirʉm aiguin sĩi imaa chitʉm aajem; pari jũrr warpmua ẽsap phã deepäaiwaita pãrag iek theeg iek khẽgkhata jaaupäaijem aajem.

² Am iek mʉ mag Cristo igar khaba chirʉmjo chitʉm anʉm, mamʉ oob am iek asekasmiet. Pãrau mʉrʉg magʉm iekta jaaumʉn pãach aar baarwai magʉm khʉʉn dʉi oowaijã sĩi par iekhaupai chan mua chan am ogkhabaju chirʉm.

³ Maachin chadcha thum ãba wounaankha thʉnʉm; mag naab pari mua chan Cristo iek serbiibag pheejem khʉʉnagjã sĩi mʉch iekhaupaita meeurrau sĩuba aajem.

⁴ Mua jierrnem wai chirʉm chan sĩi mʉg jẽb gaaim jierrnem khĩir khabam. Mʉ jierrnemen ich Ẽwandam jua theegau. Mag Ẽwandam jua theegauta muan par am jãg amach khĩirjug khaug thowia maach peerdʉajem iek wau iekhaajemjã mʉch garmuata podpʉpʉi aajem.

⁵ Maimua thumaam khʉʉnag khap apiju, ar amach khĩirjug khaug thowia iek theeg nʉm aajem khʉʉnau chad khabam iekta jaau nʉm. Magbaawai pod amau mag amachdeu seukha nem jaau nʉmta chadam iek gaai thʉju khaba nʉisiju.

⁶ Ya magbaawai ar pãach pekau isegwia chadam iekta wajapha ʉkha nʉisim ee iwiir ãbam khʉʉnau khãijã amach khaibag pʉaba nʉmʉn, muan jerrba ikhʉaba iekhamamuata khajapham jierrnem denjo am gaai mas deeju chirʉm.

⁷ Pãach daúgpai chan ooba pãach khũgurpimiet. Ãbmua khãijã iita chadcha Cristoou jʉr autarr a khĩirju sim khai, magan ĩchab khaphʉ aju aai sim, mʉjã agjo Cristoou jʉr autarrkha chirʉm.

⁸ Khar pãar daar mua mʉch tho iekha chirʉmjoo aajem, maach Por Jesuu juapá deetarrta ig iyʉʉ aawai. Mag irua mʉrʉg juapá deetarr chan sĩi pãar khaibag waumkhĩirjã khaba, warag mʉchdeu jaau chirʉm gaaimua ich iekta khaugamkhĩir ajim. Chadcha mag iekhawiajã mʉ chigaa aju khaba chirʉm, mʉchta thoba Cristo jua theegta tho chiraawai.

⁹ Oob pãrau sĩi mua pãar jãphierrpiegta ẽsap gaai jãg phã deepäaijem a khĩirjumiet.

¹⁰ Am iek mag ẽsap gaai aawaita mua sĩi pãrag iek khẽgkha phã deepäaijem aajem; pari mag chirʉm pãar dʉi khĩircha oowai chan bʉ̃ʉrjã magba ni ãbmuajã ogkhabaju ayaa chirʉmta jãg chirʉm a jaaujem.

¹¹ Pari chi mag iekha simuan khaphʉ aju aai sim, ich jãg mau warpmua par iekhaupaijã jaaupʉinaa ẽsap gaaijã mʉchdeu jaaupʉi chirʉmjo, ya khĩircha pãar dʉi ãba chiraimaawaijã ikhʉa iekhabaju.

¹² Chadcha mua chan ar amach wir aigpai thoojem khʉʉn denjo wir aig mʉch thoba chitʉm. Pari mag amachdeupai amach tho nʉmua amach lokoomjo nʉm chan khaugba nʉm.

¹³ Chadcha mua mʉch tho iekhamjo chirʉmʉn, ãba Ẽwandamau mʉchig phidag deetarrpai wau chitʉm igwiata mag iekhaajem. Mua mag am denjo chikham phidagta mʉch denkha aumaajem wounjã khaba chitʉm. Ẽwandamau mʉchig jaaumampierrpaita nem wau chitaajeewai ichdeuta jam pãar aarjã ich iek awaan mapibaawai pãar aar jaauthurjim.

¹⁴ Mag ichdeuta mʉrʉg ich iek pãar aar jawaan mapitarr aawai agtha pãar khĩir okhooba chirʉm. Pãade khĩirjubat, ¿khaíuta nacha pãar ee Cristoou maach peerdʉ aaujem iek jaauwimajĩ? ¿Mʉchdeu khabajĩ?

¹⁵ Mua chan chikham phidagta mʉch denkha auwia jũrr mʉch gaai thʉ auba, ni sĩi chikhamnag pãar ee phidkhapimaaugaujã khabam; mamʉ ichiita pãar eeta warag phidkhaju khĩirju chirʉm, jãg pãachdeu Cristo iek ʉkha nʉm gaaita warag ubʉ paaukhamamkhĩir.

¹⁶ Mag nʉm dʉi ĩchab pãar nʉm aigmua warag atag maach peerdʉajem iekta jaau nʉmua aaidʉpʉim khõsi chirʉm. Pari mag jaauju awiajã ya chikhamnau jaautarr khʉʉn ee chan tag jaaubaju; magba akhiin amau jaauwia ʉkhatarr khʉʉnta jũrr mua mʉch thowi mʉch denkha atham aju. Pari Ẽwandam iek phã sim gaai jaau simjo,

¹⁷ “Ãbmua khãijã ichdeupai wa chikhamnag khãijã ich tho iekhapim khõsi sim khai, magju khãai maach Por Ẽwandamagta ich thopibá ich nem wajapha wau sim gaaimua.” (Jr. 9:24)

¹⁸ Dichdeupai dich igwia nem wajapha waaujem a jaau nʉm chan bʉ̃ʉrjã baleeba sim; mag khãai ich maach Por Ẽwandamauchata maach kõit mag simʉn chadcha balee sim.