2 Corintios 1 - Wounaan Meu

Pablo salud

¹ Mʉʉn Pabloou, Ẽwandamau Jesucristo iek jaaumkhĩir ich Cristooucha jʉr autarr. Muata Timoteo dʉimua mʉg ẽsap phã deepʉi chirʉm, Grecia durr Corinto phobor ee Ẽwandam iek ʉkha durrum khʉʉnag maimua deeum phobordam nʉnʉidʉm eem magwe thumaa chi ʉkha durrum khʉʉnagjã agjo.

² Maach Aai Ẽwandamagjã jeeunaa maach Por Jesucristoogjã jeeu chirʉm, pãach ʉu wai nʉm dʉi ĩchab khõinaa wai wenʉrramkhĩir.

Khanthee Cristo gaaimua Pablo dau aug waaujeejĩ

³ Keena, maach Ẽwandamta ʉucha khitʉm. Ichpaita maach Por Jesucristo Ayau; ichta maach Aai aawai ichdeuta õor dau aug khaug paraanaa ĩchab maach khĩir jãsenkhaajem.

⁴ Ichdeuta maach gaai masi wa okhĩirjuu khãijã nʉm aigjã chadcha maach khĩir jãsenkhaajem, jũrr maach garmuajã agjo dich khapeen gaai masi wa okhĩirjuu khãijã oowai ich Ẽwandamau maach dʉi atarrjo ich agjo am khĩir jãsenkhamkhĩir.

⁵ Cristo gaaimuata maach ʉ̃rcha dau aphʉʉ wenʉrraawain ichdeujã ich agjo ĩchab maach ʉ̃rcha khĩir jãsenkhaajem.

⁶ Mʉg Cristo iek jaau nʉm gaaimua dau aug wau chitʉmʉn, Ẽwandamau mʉch peerdʉ autarrjo pãachjã khĩir jãsenkhawia pãach peerdʉ aumkhĩrau. Mʉg irua mʉ khĩir jãsenkha simʉn, jãan ich agjo pãachjã mʉjo dau aphʉʉ aphobaadeewai jũrr mʉch garmuata pãar khĩir jãsenkhaa khaphʉ amkhĩrau. Mag amʉn magan pãrau mʉ denjo ãwatimʉ ãwatju.

⁷ Mua khaphʉ chirʉm, pãarjã Cristo gaaimua mʉjo dau aphʉʉ naawai jãg ichdeu mʉ khĩir jãsenkhatarrjo pãarjã agjo irua khĩir jãsenkhaju.

⁸ Cristo gaaimua khodamnaan, tale pãrau khaphʉ nʉm, Asia durr mawia mʉ wajapha dau aug wautarr. Muan tag mʉchdeu ãwatbajupii aajeejim; magʉm gaaimua muan ya tag mʉch pãar khĩir chitabajupii chirajim.

⁹ Muan ya mʉch thõopäaigpampiita chirajim; pari jũrran mag wajap dau aug wautarr gaaimua ya mʉrʉg jaaubarmjota ajim, mʉchpai wir aig igju khãyau ʉ̃rcha Ẽwandam õor mee sĩsid arrjã phiriu aaujem gaaita khĩirjuju.

¹⁰ Mag, ʉu mʉ thõopiba Ẽwandamau mʉ peerdʉ aujim. Mua khaphʉ chirʉm ĩchab, ichdeu mʉ thʉa wai sim aawai mʉg atagjã irua ich jãg mʉ khaigper wai nʉrraju,

¹¹ pãrau mʉ kõit ich jãg pʉaba jeeu durrumʉn. Khapankham khʉʉnau mʉ kõit Ẽwandamag jeeu nʉmʉn, magan ich agjo ʉu irua mʉ wajapha wai chiraajem paarjã khapankham khʉʉnauta irig ʉu ajim ajurau.

Jãgwia Pablo Corintoog mabajĩ

¹² Mʉch wajapha chitanaa iekhaawaijã chadcharam iekta pãar ee Ẽwandam dakhĩirjã mʉch iekha chitaajem khap, mʉ onee chirʉm i dau na. Mʉ mag chitʉm chan sĩi mʉg jẽb gayam khʉʉn khĩirjug khaugau khaba, sĩi ich Ẽwandamau mʉrʉg magpi sĩewaita thumaam khʉʉn daarjã ʉu wajapha chitaajem.

¹³ Pãrau wajapha khĩirjumʉn mʉchdeupai mʉch igwia pãachig ẽsap gaai mag jaaupäaiwaijã pãrau khaphʉ aju, chadcha pãachdeu mʉ oojemjopaita mʉchdeujã mʉch jaau chitʉm. Jãg mʉchdeu phã deepʉi chirʉmʉn, sĩi mʉ gaaimua pãach onee aju aai nʉm wajapha pãachig khap amkhĩrau.

¹⁴ Ĩsin sĩi pãrau bʉchkhunpaita khaphʉ nʉm muata nacha pãachig Ẽwandam iek jaauchetarr, pari wajapcha khaphʉ aju bʉchkhun waaur nʉm. Maach Por Jesús pierrum edta pãar onee aju mʉ gaaimua, maagwai mʉchjã agjo onee aju pãar gaaimua.

¹⁵ Mag mʉch gaaimua pãach onee aju khaphʉ chiraawai nacha pãar aigta chiraimaju khĩirju chirajim, biek numí pãar oothuraag.

¹⁶ Mʉch khĩirjugan Macedoniaag mamuajã nacha pãar aigta jẽerimawi deeu ewag beewaijã ũwaai pãar aigta chiraicheju khĩirju chirajim. Mag, mʉ Judeaag maagpaawaijã ʉu pãrau mʉ juag oomjo mua nemdam igju thumaa mʉrʉg deepʉikham.

¹⁷ Pari magtarrta, jãgwia mʉ mabajĩ. ¿Pãrau oowai mua wajapha khĩirjubanaata pãrag maju a phã deepʉijĩ? ¿Wa mʉchta sĩi parhoobam khʉʉnjo ihãsisisdo chitaawaita nem mag aju atarrjã nʉʉpai awia deeu ũwaai mag khabam aajẽwa? Magjã khabam.

¹⁸ Ẽwandamaujã khaphʉ sim, i dau jam mua pãrag nem mag awia deeu ũwaai mʉchdeupai ich ag iek igwia mag khabam aajẽ. Mua mag nem jaauba chitʉm.

¹⁹ Silvano dʉi Timoteo maimua mʉchdeujã agjo maach thum Jesucristo Ẽwandam Iewaa iekta jaau wenʉrraajem. Ich Cristooujã nem mag awia deeu ich ag iek igwiapai mag khabam aba sĩerraawai maraujã pod magju khaba nʉm. Cristoou ichdeu mag abarmʉn ich magta nem wau sĩerrʉm.

²⁰ I gaaimuata Ẽwandamau maach dʉi nem magju atarrjã chadcha ich iekhatarrjo aajem. Maguata maach Ẽwandaman chadcha ich iekhatarrjã seukhaba sĩerrʉm aajem maadeu, Cristo gaaimua i tho iekhamamua.

²¹ Ich ag Ẽwandamauta pãragjã Cristo iek ʉkhapiwi mʉrʉgjã ʉkhapiwia maach ich dʉi ubʉ phe wai sim; maimua ichdeupaita maar mʉg chi Cristo iek jaau nʉm khʉʉnjã jʉr aujim.

²² Mag ichdeu maachig ich iek ʉkhapi atham aigta maach gaai ich dauchach phã sĩubarmjo ajim, magbarm aigmua ichdeu khõsimjo nem wau nʉm oowia õrag chadcha ich denkha nʉm khap amkhĩir. Mag nʉm dʉi ĩchab ich Akhaarjã deejim, mag gaaimua ʉ̃gthar paimaawai ichdeu mʉg atag maachig nem deeju anʉmjã chadcha deeb khaba deeju khap amkhĩir.

²³ Mʉ seukha chirʉm khai magan Ẽwandamau mʉ dʉi ichdeu ampierr aju aai sim; pari agtha mʉʉgwaiwe Corintoog pãar oon maba chirʉmʉn, sĩi pãachig ikhʉaba iekhabaimaawai warag pãach okhĩirjuu apimaaugauta maba chirʉm.

²⁴ Mʉ jam barwia mʉchdeu nem jaaubarmta pãrag ajués waupimapha chirʉm. Ya pãar pãachdeu Cristo iek ʉkha nʉm gaai ubʉ naawai pãrau khaphʉ nʉm, jãga aju aai nʉ mʉ barju nawe, maagwai magʉm athee chan ya pãrau wajap mʉ igba nʉm. Magarrau mua mʉchdeujã khõsi chirʉmʉn pãar onee apijuuta ẽkhaajem. Mua chan pãar okhĩirjuu apimapha chirʉm.