1 Timoteo 6 - Wounaan Meu

Chi chognaanau jãga aju aai nʉ amach patronnaan dʉi

¹ Ar sĩi chikhamnaan chogkha par phidkha nʉm khʉʉn, pãach patronnaan daupii abat, mag oowai bigaaum khʉʉnau Ẽwandam igwiajã khaigba iekhaba ni maachdeu nem jaau nʉm eugarjã khaigba iekham ugua.

² Pãach chi chogkha nʉm khʉʉnjã pãach patronnaan Jesucristo i ʉkhaajem khʉʉn khai, oob pãrau pãach odegpai, “Jãkhʉʉnan ĩchab Jesucristo iek ʉkhaajem khʉʉn aawai jãkhʉʉnau chan marag bʉ̃ʉrjã magju khabam” awia, “Marau am ogkhabam” a iekhamiet. Mag khãyau ante Jesucristo iek ʉkha nʉm gaaimua pãach khodnaan aawaita am athee ajapcha phidkhaju aai nʉm, amjã ĩchab Ẽwandamau daupii phe wai sim khʉʉn juagta pãrau oo naawai. Timoteo, amag cha mua pʉchig jaau chirʉmjota thumaam khʉʉnag jaaunaa pʉch ipierraa apibá.

Ẽwandam i khaphʉm anʉmta parhoob nem jaaujem khʉʉn

³ Ãbmua khãijã pãar aar barwia Ẽwandam i awia jaaubaimam, mamʉ mag irua jaau nʉrrʉm jũrr maach Por Jesucristo iek chi ajapcharamjoo khaba, ni maachdeu jaau wenʉrraajem dʉi arjoojã khaba sim chan,

⁴ magan mag wounau chan ichdeu jaau nʉrrʉmjã bʉ̃ʉrjã khaugba simta sĩi ich thowiata mag nʉrrʉm, ichdeu khaphʉ chirʉm amkhĩir. Mag wounan sĩi nem ieknemta sim. Mag gaaimua ãba sĩi õor dʉi magʉm iek igbaademjã pʉaba warag arpaita ijẽjẽbkhamua ichdeuta chikham podpʉiju khĩirjuajem, magʉm gaaimua amach agjom khʉʉn aphajã jũrr ichigta thumaam khʉʉnau ee apim khõchgau. Ya magbaademua ober nʉm: chikham dʉi khĩir khʉʉukha nʉm, chikham khĩir iekha nʉm, warmua dich dʉi chadcha magba sim khãijã dich garmuata chikham eugar khaigba khĩirju nʉm.

⁵ Magʉm khʉʉn chan meeukha chikham ipeer ahau khaphobaademjã pʉam igba, ich mag sĩerrjeem, ya am amachdeu mag nem parhoob khaugba jaau nʉmʉgta por aragpa nʉm gaaimua Ẽwandam iek chi ajapcharamta iseg wai naawai. Am khĩirjugan jãg Ẽwandam i awia, amachdeu jaau wenʉrrʉm gaaimuata sĩi phatkhon pom au wenʉrraju khĩirju thʉnʉm. Ar sĩi magʉm khĩirjug wai sĩsidʉm khʉʉn dʉi oob khapeerkha chitam.

Sĩi phatkhonagta ee aajem khʉʉn

⁶ Ẽwandam iek maachdeu jaau nʉm õrau ũurwai jãg chi ũrm khõsi ũr nʉm khʉʉnagan chadcha ʉuma; amagan mag ũrwia ʉkhaawai phatkhon pom au nʉmjota sim, majã ar amach nemdam wai nʉm dʉipai onee durrum khʉʉnau mamʉ.

⁷ Warr maach thaabaawaijã bʉ̃ʉrjã juagam nem chukhu maach ãdau maach thaabatarr aawai, juagam nem pom wai naawiajã maach meem ed pod maadeu bʉchkhunpaijã nem arrju khaba nʉm.

⁸ Mamʉ dich thach khojudam paraanaa khajũa jũajudamjã wai nʉmʉn, ya magdam dʉipai onee naaju aai nʉm.

⁹ Mamʉ magba ãaur khʉʉnan sĩi phatkhon pom paarpajuuta khĩirju thʉnʉm. Makhʉʉnaun phatkhonau aawai parhooba nem wau nʉmuajã chadcha amachdeu nem khõsim paarpajuuta ẽkhaajerram. Mag nʉm gaaimua wounagamjo ʉdʉraata nem parhoobamʉgjã amach bãyeu arrpi nʉm, mag phatkhonagta ee thʉnarr gaaimua naspawia amachdeupai wir aig amach khaibag waupimjo Jooirau amach isegjujã khĩirjuba.

¹⁰ Ar chadcha phatkhonag wʉrpa nʉm khʉʉnaun nem khaigbamta khĩirpierr waaujem, phatkhon paarpam khõchgau. Õor magʉm khʉʉn thʉnʉm. Ãaur khʉʉnau mag phatkhon paarpam khõchgau, nem parhooba wau nʉmuata warag maach Ẽwandam iek amachdeu ʉkha narrjã isegjierram. Amaun amach phatkhon paarpa phobaadeewai amach onee ajupii aajerram. Mamʉ magʉmjã ichiita ich mag onee khaba naajem.

Ajap chirá Timoteo

¹¹ Mamʉ pʉ Ẽwandam atheeta phidkha sĩewai, oob warm khʉʉnjo nem khaigba wauju khĩirju chitam. Magju khãai Ẽwandam dau na agchanaa irua khõsimpai waubá. Maadeu ʉkha nʉm iekta bʉ̃ʉrjã ogdʉba ʉkha chirʉm dʉi thumaam khʉʉn kha khõsinaa ithũu am wawibá. Mʉg iek gaaimua pʉch dau aphʉʉ awiajã ãwatnaa warag ogkhaba penaa.

¹² Timoteo, Cristo iek chaar maachdeu ʉkha nʉm gaaita ubʉnaa warag maach Ẽwandam iekta nem pʉa chʉuu jaaubá, sĩi khajap meeukha jãau nʉmjo. Tag maach meeba ich mag wenʉrraju aar barjuuta ẽkhabá, pʉch mam sĩeimamkhĩirta warrjã Ẽwandamau pʉch jʉr autarr aawai. Khĩir eyaa abá, ar pʉchdeu õor khapan thʉnʉm dakhĩir mʉg pʉchdeu ʉkha chirʉm iek chan ogdʉba ich jãg ʉkha chitaju a iekhatarr.

¹³ Ĩs mua mag chirʉm, Ẽwandam ichdeuta nem thʉnʉm thum iiupi wai sĩejem ag dau na, maimua ĩchab ar maach Por Jesucristo Poncio Pilato na thumaam khʉʉn jʉ̃g daar iita chadcha Ẽwandam Iewaau a jaautarr ag dakhĩirjã agjo mag chirʉm.

¹⁴ Cha mua pʉchig jaau chirʉm thum ipierraa abá ich Ẽwandamau khõsi simjo, bʉ̃ʉrjã nem chaauraapaijã jaauba. Ich magta ajapha chitá maach Por Jesucristo bee nʉm ora, ni iwiram ãbmuajã pʉchig pʉch khĩir naau iekham ugua.

¹⁵ Mag Jesucristo Ẽwandamau beepiju ed aadeewai thumaam khʉʉnag warre dau daau oopiju, ichdeuta ãba maach thumaam khʉʉn wai dʉnaajeewai. Ichta ĩchab mʉg jẽb gaai reinaan thum thʉnʉm khʉʉn Rey anaa ĩchab ichta ar õor thumaam khʉʉn porkha thʉnʉm khʉʉn Por charau.

¹⁶ Ichta ãba warrgarwe ich mag iiu sĩerrʉm, meejã meeba. Ichta sĩi atcha ich araragau pod õrau agʉg ooju khaba sĩi bʉ̃ʉmjo sim eeta sĩejem. Maach mʉg eegarm khʉʉnau chan ni ãbmuajã dich daujãdamau pod i oojã ooba, ni ooju aaijã khaba nʉm. Maguata ãba irigta maach thumaam khʉʉnau ich mag ee aju aai nʉm, ichta chi jua thierrkha sĩerraawai. Maata maach Ẽwandamau.

Jãga aju aai nʉ phatkhon paraam khʉʉnau

¹⁷ Ar phatkhon paraam khʉʉnag, amachta warm khʉʉn khãaijã ʉ̃rpai nʉm awia wir aig amach phatkhonta tho iekhapiba jaaubá. Phatkhon pom paraam khʉʉnjã bʉ̃ʉr abarm gaaimua deeu dau aug ee maju chan pom khabam. Maguata ãba aata khĩirjuju khaba nʉm. Mag khãai ãba maach Ẽwandampaita amag khĩirjupi jaaubá, maach ʉu wenʉrramkhĩir ichdeuta maadeu nem iigwaijã o ãkhãrag chukhu deejeewai.

¹⁸ Amag, bʉ̃ʉrjã amach phatkhon ĩgkhaba warag aguata nem ajapham waupi jaaubá, õor parhoobam khʉʉn dʉijã o wajapha.

¹⁹ Amau magta õor athee nem ajapham pom wau nʉmua gaai machag chukhu phatkhon dʉrrcha khãijã werbamʉn, magan mag nʉm aiguin warre mʉg jẽb gaaiwe ʉ̃gtharchata amach phatkhon ãkha phiemamjo nʉm, amachdeu õor dʉi mag nem wau nʉm jũrr Ẽwandamau par okhoopibaju aawai. Ajapcharan mag nʉm aiguin mag nem wau nʉmua tag maach thõjã thõba aajem aar wetwi naaimajuuta khĩirju nʉm.

Pabloou ãbmiecha Timoteo wawitarr

²⁰ Timoteo, ãbmiecha mua pʉrʉg jaaukhim: Ẽwandamau pʉrʉg ich iekta jaaupitarr aawai pʉ phidagan ãba i iek jaau nʉmʉu. Khĩir khaphʉ chitá. Oob sĩi jãg Ẽwandam i awia amach eepai bʉ̃ʉr abarm gaaimua iek phithurg aadep aajem khʉʉn dʉi sĩi par pʉch iphithur iyʉʉ chitam. Jãgʉm khʉʉnaun par khaugbamta khaphʉm khaphʉm awia jãg sĩerrjeem.

²¹ Ãaur ar chi mag wenʉrrʉm khʉʉn amachdeu mag parhooba jaau wenʉrrʉmʉgta ee am khõchgau Ẽwandam iek chaar amachdeu ʉkha narrta isegjierram. Mʉkhʉʉndam ajim pʉrʉg phã deepʉim ig chirarr. Pʉ kõit Ẽwandamagta jeeu chiraajem, pʉ ʉu thʉa wai nʉrramkhĩir. Ayoo kake, Pablo