1 Timoteo 5 - Wounaan Meu

Jãga aju aai nʉ Cristo gaaimua maach khodkha nʉm khʉʉn dʉi

¹ Pʉch khãai jooinag oob meeurrau iekham. Amag meeurrau aju khãyau, pʉch ayagta iekha chirʉmjo ithũu iekhamamua warag am wawibá. Pʉchjo chaainpaim khʉʉnjã pʉch khodnaan khaba awiajã pʉch eeugpeen khʉ ãbam khʉʉnjo jãsene abá.

² Maimua ũanaan dʉijã pʉch ãd dʉímjo anaa chi daupeen dʉijã pʉch ʉ̃phʉʉin khʉ ãbam khʉʉn dʉímjota abá, bʉ̃ʉrjã am dʉi khĩirjug chaauraa aju khĩirjuba.

Iglesiaau jãga aju aai sĩ khoopaa ʉʉin dʉi

³ Ar khoopaa ũanaan chadcha dau aphʉʉ igju chukhu khitheem khʉʉn dʉi o ajaphanaa amau nem ig nʉmdam au dedee abá.

⁴ Mamʉ khoopaa ũan ãb khãijã chaain paraanaa yẽtonaan khãijã phe wai sim khai, magan chi chaainauta khap aju aai nʉm, amachdeuta nacha irua nemdam ig sim audeeg garpapa aag. Amau khaphʉ aju aai nʉm, ich jãg jooinau amach dau aphʉʉ bãaupʉitarrjo, ya amach dennaan dau aphʉʉ paawai jũrr ĩchab amach chi chaainauta amach dennaan chaain dau meraamjo oo wai wenʉrraju aai nʉm. Dich dennaan dʉi magta amʉn, Ẽwandamau oowaijã nem ajaug sim.

⁵ Ʉʉi ar chadcha thãraucha Ẽwandam iek ʉkha simta khoopawia ich appai igjujã chukhu sĩsiewain, “Igjujã chukhu ʉrraawai tag khai jua nʉbarju” awia, ãba Ẽwandamagta edaram magwe jeeu khitaajem ichdeu nemdam ig sim athee. Pãach ee khoopaa ʉʉin magʉm khʉʉnagta nem deeb khaba deeju aai nʉm.

⁶ Mamʉ ar khoopaa ʉʉi mag Ẽwandamag jeeubanaa sĩi warag Ẽwandam iek khaugbamjo parhooba ichdeu nem khõchagpierr nem wau simʉg chan, parhoob nem deeju khaba nʉm. Mag simʉn Ẽwandamau oowai meeba simta chi thõmjo sim, ich pekau gaaimua.

⁷ Ar Ẽwandam iek ʉkha nʉm khʉʉnag thum cha mua jaau chirʉmjota apibá, amach dennaan dʉi. Maagwai am eugar chikhamnau jaau jaau abaju.

⁸ Ãbmua khãijã dich khodkha simta dau aphʉʉ khitʉm oo simjã mag oowai warag gaai mas khabamjoo sim wounan dʉrrchata o ãkhãraa chirʉm. Mamʉ athuucha khaigba nʉmʉn, ar amach chaain wa amach dennaan khãijã dau aphʉʉ khitʉm oo nʉmta warag oobamjo nʉm khʉʉnau. Magʉm khʉʉnau chan cha maadeu Ẽwandam iek jaau nʉm ʉkhaba nʉmta amach iiupaita ʉkha nʉm anʉm. Mag nʉm khʉʉnan ar bʉ̃ʉrjã ʉkhaba nʉm khʉʉn khãyaujã atchata khaigba nʉm Jooi dau na.

⁹ Mua pʉrʉg jaaukhim, chijãgʉm khoopaa ʉʉinagta pãach thumaam khʉʉnau nem deeg am thʉ̃r pãach ẽsap gaai phã sĩuju aai nʉ. Pãrau nem deeju khʉʉnan mʉgau: Khoopaa ũanaan sesenta añomua ʉ̃gthaagam khʉʉn ar warrcha amach jaai autarr dʉipai khoopawia tagjã jaai auba nʉm khʉʉnpaiu.

¹⁰ Magnaa ĩchab amau nem ajapham waaujemta ooju aai nʉm, khan nem agá: ¿Amach chaain ajapha bãaukhapʉiwia jooin ee agpierraa wenʉrrʉ́? ¿Õordam parhoobam khʉʉn amach aig beewaijã, amach deg jẽerpim khõsi jẽerpinaa, am dʉi o ajaphanaa, amach khapeen Ẽwandam iek ʉkha nʉm khʉʉn atheejã bʉ̃ʉrjã nem waumapham aba sĩi nem par daúa ooba khithee aajẽ, ya “Maar jãgʉm athee khaba nʉm” a iekhaba? ¿Õor khamor masi wa gaai masi khãijã aawai, dau aug khaugwi dʉi nem par daúa ooba aajẽ? Magʉm appaijã khaba, ¿tag nem parhoobamdam wau nʉmua õrau am eugar ajapha ig iyʉʉ aajẽ? Magʉm nem thum chadcha waaujem pãachdeu khaphʉ nʉm khai, magan amau nemdam ig nʉmjã oob sĩi par daúa oomiet.

¹¹ Mamʉ ar khoopaa ʉʉin agtha sesenta añojã barba nʉm khʉʉn thʉ̃r chan oob jʉchag pãach ẽsap gaai phãmiet; am agtha kha chaainaa sĩsid aawai eeu deeu ũmaai emkhooin khĩirju phobaadeewai jaai jʉrdukham, Cristo athee nem wau wenʉrrʉm gaaipai wenʉrraju a iekhatarrjã khĩirjuba.

¹² Magbaawai amachdeupaita Ẽwandamag amach khaibag waupimjo waupijurau, tag jaai jʉrba ãba Cristo atheepai wenʉrraju a iekhatarrta jaai jʉrbarm gaaimua.

¹³ Chaainaam khʉʉn thʉ̃rpa pãach ẽsap gaai phãkha sĩumʉn, amachig sĩi nem dedee aju khaphʉ aphobaadeewai, sĩi warag khuseugau dikha phobaadeewai, dipierr ober ober aphobaadem dʉi ĩchab khuseugau dikhaju. Mamʉ sĩi magpaijã khabam. Magphobaadem dʉi warag nem ieknem nem ĩgkhanaa, õor amach ap iekha nʉmjã amach dʉita iekha nʉmjo bigaau naawia chikham ipeermie athaadephʉm dʉi, iekhaju ayaa khabampata õor jʉ̃g daar iekhaa khaugjurau.

¹⁴ Ãb khãijã mag nʉrram ugua, ar jaai auju ayaam khʉʉnan muan waragta jaai jʉrpim khõsi chirʉm. Magbaawai chaain paarpawia, ich jaaijã ichdeuta khaphʉnaa, degam nemjã ichdeu thum khaphʉ sĩsiewai, tag mag sĩi parhoobam khʉʉnjo nʉrrabaju. Magta apim khõsi chirʉm, maach kha ukhurm khʉʉnagjã am eugar khaigba ĩgkhapimaaugau.

¹⁵ ¿Khan jãgwia mua mag chirʉ́? Mua mag chirʉmʉn, cha mʉchdeu jaau chirʉmjo aba awia ya ãaur khʉʉnau Cristo ipierraajã khaba sĩi dosãtau khõsi simjo wenʉrraawaita mag chirʉm.

¹⁶ Pãar ee Ẽwandam iek ʉkha nʉm khʉʉn khod ʉʉi ãb khãijã khoopawia khitʉm khai, magan amach chi khodnaanauta wa chi chaain khʉʉnau khãijã sĩi amach paarmua bithurgam khʉʉn juata nʉju khãyau, amachdeuta mag ũanau nemdam igbarm thum audedee aag khap aju aai nʉm. Magba akhiin, iglesiaauta mag igju paraam khʉʉnagpa oowai, jũrr ar khoopaa ʉʉin chadcha igju chukhu khitheem khʉʉndamta ajappai aair aba, amau nemdam ig nʉmjã pod thum dedee abaju.

Jãga aju aai nʉ dich iglesia eem chi pornaan dʉi

¹⁷ Ar ajapha chi ʉkha durrum khʉʉn porkhanaa Ẽwandam athee phidkha nʉm khʉʉnan maadeu daupiinaa amau nem ig nʉmjã khap aju aai nʉm, sĩi ich jãg par phidkhapiba. Mamʉ ʉ̃rcha mag daupiinaa amag phagju aai nʉmʉn, ar Ẽwandam iek jaaujem phidag wai nʉm khʉʉnagta ʉ̃rcha phagju aai nʉm.

¹⁸ ¿Khan jãgwia mua mag chirʉ́? Mua mag chirʉmʉn, Ẽwandam iek phã sim gaaijã, “Pʉch nemjĩir dau bibthʉg deemkhĩir phak emkhoi phidkhapi wai chirʉm aig, nemjĩir dau khom ugua awi, oob i i khõorjʉ̃ sĩum” a jaau sĩewaita mag chirʉm. Maimua ich ag Ẽwandam iek gaaipai ĩchab agjo mag sim: “Ar phidkha nʉm khʉʉnagan, ichiita am phidkha durrum paar phagab khaba phagju aai nʉm” a sim.

¹⁹ Pʉ chirʉm aig woun ãb beewi maach chi ʉkha durrum khʉʉn pornaan igwia iwiir ãbam eugar khãijã khaigba nem ĩgkhacheewai oob ʉkham. Ʉkhaju awiajã amach chi ootarr khʉʉnauchata numiim khʉʉnau wa thãrjupam khʉʉnau khãijã beewia jaaubaicheewaita ʉkhabá.

²⁰ Mamʉ ar warr amach wenʉrraajerrjo agtha amach pekau ee wenʉrrʉm khʉʉnag chan oob ikhʉa iekham. Magʉm khʉʉnagan, thumaam khʉʉn ãbam aig biirdʉnaa mag thum thʉnʉm dakhĩir ikhʉaba iekhamamua am wawibá, mag oobaawai tagam khʉʉnaujã ogkhawia warm khʉʉnjo pekau ee burrm ugua.

²¹ Maach Ẽwandam dau na maimua maach Por Jesucristo dau na muan pʉrʉg magta abá a chirʉm. Ẽwandam chognaan angelnaan ichdeucha jʉr autarr khʉʉnaujã mua pʉrʉg mag chirʉm khaphʉ nʉm. Cha mua jaau chirʉmjo, chi mag pekau wau nʉm khʉʉnjã oob sĩi par daúa oom. Pʉch dʉi khapeen ajapham khʉʉnag awiajã inag chukhu iekhabá amag.

²² Ĩchab mua pʉrʉg jaaukhim: Pãach ee ãb khãijã chi porkhamkhĩir jʉr awaagpaawai, oob sĩi ajapha ʉkha sim awia, parhoobam khʉʉn ʉ̃r jua ausĩunaa i kõit Ẽwandamag jewam, eeu magba akhiin meraa pekau ee ich burrtarrjã jaauba, naspawiata khaug athaawai, jũrr pʉch gaaipata chikham pekau thʉdukham. Magam ugua, chi porkhamkhĩir õor jʉr awaagpaawai ajapha oo nʉʉnaata i ʉ̃r jua ausĩunaa Ẽwandamag jeeubá i kõit. Naspawia khaigbajim am ugua ajapha khĩirjunaata nem waubá.

²³ Mua mag chirʉm aig chan mag sĩi bʉ̃ʉr abarm gaaimua chikhamnag pʉch jaaupim ugua awi pod vinodamjã doba, pʉ sĩi ich jãg do appaita do chitaju aai sim aba chirʉm. Mua khaphʉ chirʉm, bi machgaujã ʉ̃iba agagai aajem. Pʉch jãgbaadep aajem ʉupamkhĩir, do appai doba ĩchab vinodamjã bʉchkhun dobarphʉ chirá.

²⁴ Pua khaphʉ sim ĩchab, khar maach khapeen amach nem khaigba wau nʉm gaaimua, amachig jeeubamta warre merag chukhu amachdeucha jaau nʉmjo, dawaa deeum khʉʉnau oojem. Mamʉ khar chan am mag amach pekau ee wenʉrrʉmjã bigaaum khʉʉnau chan khaugba, mʉg jẽb gayan ich mag sĩsiejem. Mamʉ ichiita mʉg atag Ẽwandamau thumaam khʉʉnag khap apiju.

²⁵ Ich jãgau ĩchab nem wajapham wau nʉmjã. Maadeu dau daau nem wau nʉm, wa mag dau daau nem wauba awia khãijã, ichiita Ẽwandamau thumaam khʉʉnag khap apiju mʉg atag.