1 Timoteo 4 - Wounaan Meu

Ãaur khʉʉnau Ẽwandam iek amachdeu ʉkhatarrjã isegju

¹ Mamʉ Ẽwandam Akharau khapeenag jaaupibaawai jaautarr gaaimua pua khaphʉ sim, mʉg atag paawai ãaur khʉʉn i iek ogdʉba ʉkha wenʉrraju aajerr khʉʉnta mʉg iek ajapham isegwia jũrr parhooba dosãtau nem jaaupi sim jaau nʉmʉgta ee ajurau.

² Magphobaademʉn ajapha Ẽwandam iek jaau nʉm anʉmta amachdeu jaau nʉmjojã khaba, sĩi parhoob nʉm waunaa seukha nem ĩgkha sĩerrjeem khʉʉn iekta ũrm khõchkhakha ajurau. Mamʉ ar mag seukha nem jaau wenʉrrʉm khʉʉnaun khaphʉ nʉm, amachdeu chadcha nem agcha jaauba nʉm. Mamʉ ich mag jaau khaug naawai amachdeu mag seukha nem jaau wenʉrrʉmjã am gaai mas khaba nʉm.

³ Chi mag parhooba nem jaau wenʉrrʉm khʉʉnaun ʉʉi aupiba jaaunaa ʉʉinagjã jaai aupiba jaau nʉm dʉi ĩchab nem parhoobajã khoju khabam a jaaujem; majã parhooba khomkhĩirta Ẽwandamau nem thum wautarr aawai maach mʉg chadam iek khaphʉnaa ʉkha durrum khʉʉnaun warag irig agʉm paarjã ʉu ajim anaa khoju aai nʉmta mag jaau nʉm.

⁴ Ẽwandamau nem wautarr thum ajaphamʉu. Maguata maadeu Ẽwandamag jeeuwia, irig ʉu ajim anaa, bʉ̃ʉrjã nem isegba khoju aai nʉm.

⁵ Mag ichdeu nem khomkhĩir deetarr thum ichdeujã chi ajaphamʉu a jaautarr aawai, inag awia khobaju aai nʉmjã aba, warag irig ʉu ajim anaata khoju aai nʉm.

Jesucristo chog chi ajapcharam khamkhĩir Timoteo wawitarr

⁶ Timoteo, maach khodnaanag pua magta jaau chitʉmʉn, pʉ Jesucristo chog chi ajaphamkha chirʉm. Mag amʉn, pʉʉn ĩchab jua theeg chirsiju, iek ajapham pʉchdeu ʉkha chirʉm jaau nʉmta thach kho nʉmjo pʉaba jaau chitʉm gaaimua.

⁷ Oob sĩi jãg warrgar amach jooin nem ĩgkhaa aademjã maadeu khaugba warag pʉa chʉuu aajem khʉʉn iek ũr chitam. Mag khãai Ẽwandamau pʉchig nʉrrapi simjota agcha nʉrraju ẽkhabá.

⁸ Sĩi khapá jãpaagpai nem wau nʉmʉn ʉu sim. Mamʉ Ẽwandamau nem khõsimpai wau nʉmta nem thumaam athee ajapcha sim. ¿Khan jãgwi mua mag chirʉ́? Mua mag chirʉmʉn, mʉg jẽb gaai nʉwejã irua nem khõsim waauwai maach khĩir onee apinaa ĩchab mʉg atagjã maach khĩir meeupiju aawaita mag chirʉm.

⁹ Cha mua mag chirʉmʉn chadcharam iekhau. Maagwai thumaam khʉʉnau ʉkhakhiin ʉu akham.

¹⁰ Mag mʉg jẽb gaai nʉwejã Ẽwandamau maach dʉi ajapha aju khaphʉ naawaita, ich jãg thet jaau nʉmua, i iek õrag ʉkhapiju ẽkha durrumua, ĩchab chikhamnau maach ĩgkhabaadephʉmjã magʉm igba, warag pedurraajem. Chadcha Ẽwandamta ãba thumaam khʉʉn peerdʉajemʉu, pari ajapcharan ar ich iek ʉkha durrum khʉʉn denpai mamʉ.

¹¹ Cha mua pʉchig jaau chirʉm iek amag mʉ imeerba jaaunaa ĩchab pʉchdeu jaau sim ipierraa apibá.

¹² Pʉch ẽwanaa chiraawai jooinagpa pod mag jaauju khaba chirʉm awia, oob ʉdʉʉr amag pʉch kha isee apim. Mag pʉch kha isee apim ugua, thumaam khʉʉn daar agpierraa chitá; maagwai chi ʉkha durrum khʉʉn eejã jooinaupa pʉch mag oowai ĩchab jãgata amjã wenʉrraju aai nʉ a khap aju. Magnaa thumaam khʉʉn kha khõsinaa Ẽwandam iek pʉchdeu ʉkha chirʉmjã ogdʉba ʉkha chitá. Ĩchab pʉch iekhaawaijã, nem agchata iekha chitʉm dʉi pʉchdeu nem jaau chirʉmjã sĩi par iiupai khaba pʉchdeu jaau simjota abá thumaam khʉʉn dakhĩir. Oob pʉchdeu nem jaau chirʉm ichaaur nem bʉ̃ʉr abarm gaaimua khãijã pekau paarpa chitam.

¹³ Mʉ bar nʉm ora, thumaam khʉʉnag amach jʉ̃gʉucha ũrmkhĩir, Ẽwandam iek phã sĩsidʉm gaai ʉ̃iba thʉ̃rbá. Mag thumaam khʉʉn jʉ̃g daar thʉ̃rwia ich ag iekhaupai am wawimamua amag ajapha jaaubá.

¹⁴ Pʉchig mag phidkhamkhĩir khabajieb, ar nacha Ẽwandamau khapeenag jaaupibaawai makhʉʉnau pʉ igwia jũrr chi pornaanag jaautarr. Magbaawai ajim, ar amau pʉ ʉ̃r jua ausĩubarmua Ẽwandamau ich jua theeg pʉrʉg deetarr. Mag phidkhamkhĩirta mag jua theeg pʉchig deetarr aawai oob sĩi ich jãg par wai chitam.

¹⁵ Timoteo, Ẽwandam iek jaau nʉm gaaita warag pʉch thierrpamam thumaam khʉʉnau oomkhĩir, cha mua pʉchig jaaubarm thum khĩirjunaa ag gaaipai chirsí.

¹⁶ Pʉchdeu jaaumaajem iekpai ajapha khĩirjunaa khĩir khaphʉ chitʉm dʉi warag ich ag iek gaaipai ʉkha chitʉmua ubʉ chitá. Pua chadcha cha mua jaau chirʉmjota amʉn, magan pʉch peerdʉ chirsim dʉi ĩchab bigaaum khʉʉn ar pʉch iek ũr durrum khʉʉnjã ʉu pua am peerdʉpi auju.