1 Timoteo 3 - Wounaan Meu

Iglesia eem chi pornaan jãga wenʉrraju aai nʉ

¹ Mʉgʉm iek chan seukhaawai khabam keena: Ãb khãijã ichta Ẽwandam iek ʉkha thʉnʉm khʉʉn porkham khõsi khĩirju sim khai, magan agchata khĩirju sim, phidag ajapham gaaita pʉrju khĩirju sĩewai.

² Mag chi phidagjã ajapham aawai mag chi ʉkha durrum khʉʉn porkhajujã ĩchab woun parhoobam khábata ig sim. Magba akhiin, õor dakhĩir parhooba aawai jũrr ichigpata bigaaum khʉʉnau iekhakha aju. Mag am uguata mag chi porkha simʉn, ʉʉi ãbpaita paraa aju aai sim. Sĩi donjo parhoob nem wauba, khĩirjug paraanaa ajaphata nʉrraju aai sim, ich wau iyʉʉ am ugua. Magnaa ĩchab õor beewaijã ich deg jẽerpim khõsi jẽerpinaa Ẽwandam iek õrag jawaagjã nem jaau khaugta aju aai sim.

³ Chi porkha sim khʉ chan oob mag nag pignaa, ich khapeen dʉijã khujʉʉrnem aju khaba, ni sĩi nemdam bʉ̃rʉʉm wau nʉm paarjã ãba phatkhonta auju khĩirjubaju aai sim. Magju khãai, thumaam khʉʉn dʉi o ajaphanaa khõinaata nʉrraju aai sim, ni phatkhon ichdeu au sim atchajã warag paarpaju khĩirjuba.

⁴ Dich degam khʉʉn dʉi thum dich nempa ajapha aairaanaa dich chaainjã wawikhaju aai sim, dich ipierraanaa dich okho bãaumkhĩir.

⁵ Ãbmua khãijã pod ich chaainpaijã wawie meraa sim khai, magan ¿jãga õor khapanaa Ẽwandam iek ʉkha thʉnʉm khʉʉn ajapha wawí wai nʉrraju khai? Magʉm khʉʉnau pod Ẽwandamau ig simjo abaju.

⁶ Mag chi Ẽwandam iek ʉkha durrum khʉʉn porkhapieg chan ar ewaa Ẽwandam iek ʉkha sĩsidʉm khʉʉn jʉr auju khaba nʉm, eeu magba akhiin ichdeupai iita wajapcha chiraawaita i jʉr atham awia ich tho iekhadukham. Magbaawai mepeer atarrjo ichdeupaita Ẽwandamag wir aig ich khaibag waupiju.

⁷ Meperan ãba õrag pekau waupijuuta ẽkha sĩerraawai bʉ̃ʉr abarm gaaimua chi porkha nʉm khʉʉn eugarta Ẽwandam iek ʉkhaba aajem khʉʉnag khaigba iekhapim khõsi aajem. Maguata mag chi porkha nʉm khʉʉnan ar ʉkhaba nʉm khʉʉn daarjã agchata wenʉrraju aai nʉm.

Chi pornaan juag oojem khʉʉnjã jãga wenʉrraju aai nʉ

⁸ Mua ĩchab pʉrʉg jaaukhim, jãga aju aai nʉ chi pornaan juag oojem khʉʉnjã: Amjã ĩchab thumaam khʉʉn daar khajaphata wenʉrraju aai nʉm, amach eugar chikhamnau ĩgkham ugua. Iek ãbata aju aai nʉm, iwiir ãbamʉg nem mag awia jũrr deeumʉg khĩet jajaau aba. Magʉm khʉʉn chan ĩchab nag pigjã khaba, ni sĩi nemdam bʉ̃rʉʉm wau nʉm paarjã ãba phatkhonta auju khĩirjubaju aai nʉm.

⁹ Magju khãai maach peerdʉajem iek cha maadeu eeu khaugbarmta warag ogdʉba ʉkhanaa ĩchab Ẽwandamau nem waupi jaau simpai wau wenʉrrʉm aawai, gaai khaibagjã chukhu oneeta wenʉrraju aai nʉm.

¹⁰ Magua mua pʉrʉg mag chirʉm: Chi pornaan juag oomkhĩir õor ig nʉm khai, nacha amau wau nʉmjã oonaa thũr ajapha phaabarmjo begone bʉ̃ʉrjã khaigba khaba oberbaawaita mag chi pornaan juag oomkhĩirjã jʉr auju aai nʉm.

¹¹ Am ʉʉinjã ĩchab thumaam khʉʉn daar ajaphata wenʉrraju aai nʉm, seunem nem ĩgkhaba, ni nem waauwaijã sĩi don ʉʉinjo parhoob nem wauba. Ĩchab amach jaai appai oonaa, nem waubaademjã opʉiba ich mag werba sĩsiu aju aai khaba nʉm.

¹² Ar mag chi pornaan juag oo nʉm khʉʉnan ʉʉi ãbpaita paraanaa ĩchab amach chaainjã thum amach degam khʉʉnpa aairaa aju aai nʉm.

¹³ Pua khaphʉ sim, ar amach pornaan juag oo nʉm khʉʉnau ajapha am juag oowai, bigaaum khʉʉnagpa warag amach daupii apinaa ĩchab amachdeu ʉkha nʉm iekjã warag ogkhaba jaau khaphʉ õrag jaaujem.

Khan jawaagta Pabloou mʉg ẽsap phã deepʉijĩ

¹⁴ Timoteo, mua jopcha pʉ oon maju khĩirju chirʉm. Maagwai pʉrʉg khap amkhĩir mʉg ẽsap phã deepʉi chirʉm.

¹⁵ Mʉ da barba awiajã ya pua khaphʉ sim, jãga wenʉrraju aai nʉ Ẽwandam iek ʉkha khitheem khʉʉn. Mag i iek ʉkha durrum khʉʉnta thum maach Ẽwandam chi iwam chaainau. Mag amachta Ẽwandam chaain aawai, bithurgam khʉʉnagjã parhooba amach ichaaur jaaupimaaugau, chadam iek amachdeu ʉkha nʉmta ich jãg warm khʉʉnag amach ʉdʉʉr deeba jaau durraajem.

¹⁶ Mag iek warrgar thumaam khʉʉnau khaugba aajerrta ĩsin maadeu dawaa oo nʉm, ich Ẽwandamau maachig khaugpitarr aawai. Mag maachig khaugpitarr iekhan mʉgau: Cristo Ẽwandamkha simta maach thaabaajemjo mʉg jẽb gaai thaabachewia, maach wounaan khĩir thegwia, mʉg jẽb gaaim khʉʉnag ich oopien beejim. Maimua meewia Ẽwandam Akharau deeu i phiriu athamua chadcha í pekau chukhu khitʉm a khaugpijim õrag. Mʉg jẽb gaai sĩeichewia irua nem wautarr thum Ẽwandam chognaanau ʉ̃gtharmua oojierram. Maimua amach aar pabaimaawaijã sĩi onee amach jua ee baarpi aujierram. Magtarr, durr warpham magwe aaidʉ jaaupʉiwia meupierram khʉʉnau khakhapdo thʉnʉm dʉi ĩchab durrpierr i iek ʉkha durrum khʉʉn nʉnʉidʉm.