1 Timoteo 2 - Wounaan Meu

Jãga aju aai nʉ Ẽwandamag jeeu nʉm aig

¹ Keena, mua pãrag jaaum ig chirʉmʉn mʉgau: Õor thum mʉg jẽb gaai thʉnʉm khʉʉn kõit Ẽwandamag jeeubat. Mag jeeumamua nem thumaam paarjã ĩchab irig ʉu ajim abat.

² Presidentenaan kõit jeeunaa ĩchab tagam khʉʉn thum chi thethemnaan maach porkha thʉnʉm khʉʉn kõitjã Ẽwandamag jeeubat, maach thum ãba khõinaa wenʉrraag. Mag warag maadeu jeeumamua irig: “Ẽwandam, pua amag khĩirjug khaphʉ apibarju, nem ajapha waumkhĩir” a jeeuju aai nʉm. Pãrau magta jeeumʉn, Ẽwandamau amag khĩirjug ajapha deebaawai maach thumaam khʉʉnta onee nʉm dʉi khõinaa wenʉrraju, Ẽwandamau khõsim nemjã maachdeu waum aig wauju ayaa. Maagwai mag Ẽwandamau khõsim nem waauwaijã bigaaum khʉʉnau magʉm abaju.

³ Pãrau mag thumaam khʉʉn kõit jeeu nʉmʉn magan ʉu kherʉm. Mua pãrag mag jeeupi chirʉmʉn, Ẽwandam maach peerdʉajemuajã ich magta ichig jeeupiejeewaita mag jaau chirʉm.

⁴ Iruan thumaam khʉʉnag chadcha ichdeu maach peerdʉ aaujem iekta khaphʉ apim khõsi sim, mag khaphʉ nʉisiewai thumaam khʉʉnau amach peerdʉju aai nʉm a khap amkhĩir.

⁵ Mamʉ mag maach thumaam khʉʉn peerdʉ awaag ichta Ẽwandam ãbpai sĩerraawai ĩchab maach dich pekau gaaimua Ẽwandam warp narr khʉʉnta deeu ũmaai i dʉi khõinaa wenʉrrapiejemjã agjo ãbpai sĩerrʉm. Mag woun ich Jesucristoou.

⁶ Mag thumaam khʉʉn peerdʉ awaagta ʉdʉraa ich thõopijim, magbarmua Ẽwandam dʉi mag pekau gaaimua iekkhõr pom narr thum ichdeupai phag obeerpʉyaag. Mag Jesús thõotarr gaaimua maadeu khaphʉ nʉm, chadcha thumaam khʉʉnta Ẽwandamau peerdʉ aum khõsi sim.

⁷ Ich magtarr jaaumkhĩirta ichdeucha mʉ jʉr aujim, ich iek jaaujemkha awaag; mag jaau chitʉmua judionaan khabam khʉʉnagta jãgata chadcha Cristo maach thumaam khʉʉn kõit ich thõopitarr aawai maadeu i iek ʉkha wenʉrraju aai nʉm a jaaumkhĩir. Mag chadcha i iek ʉkha chiraawai bʉ̃ʉrjã seukhaba mag iekha chirʉm.

⁸ Maguata muruan chi ʉkha durrum khʉʉn nʉnʉidʉmpierr Ẽwandamag jewaag ʉ̃gthaag jua jʉrkhaawai chi emkhooinauta Ẽwandamag iekhamamua jeeupi chirʉm. Mamʉ mag Ẽwandamag jeeu nʉmua ʉ̃gthaag jua jʉrkha nʉm khʉʉnjã pekaúa jua phʉis meu sĩsidʉm khabam; agtha dich khapeen dʉi khãijã meeukha nʉrrjeenaa dich khapeen dʉi ipeer ahaujã khábata Ẽwandamag jeeubat.

⁹ Ʉʉinagjã mua mag chirʉm: Pãach chihoowai oob athuu chihoomiet; agpierrpaita chihoobat. Oob sĩi nem atcharag õor dauderraa por megmiet. Oob chihoo ooimʉ sĩi phuphup phĩr denpa khãijã por ee phĩkha jũamiet; oob khajũa khãijã nem parhẽpagkham jũamiet, magʉm gaaimua õrau pãachig eerpapaad am ugua.

¹⁰ Magju khãyau chadcha ʉʉin Ẽwandam iek ʉkhanaa irigpai jeeu wenʉrraajem khʉʉnau aajemjo, nem ajapha wau nʉmuata pãach igpiju awiajã pãach eugar ig iyʉʉ apibat.

¹¹ Ʉʉinan culto ee weetwaijã, Ẽwandam iek jaaubaadeewai sĩi khĩuuta ũr ohoodo aju aai nʉm, amachdeuta jaau nʉmjo sereubaadep khaba.

¹² Mua ʉʉinag chan culto ee õor khapanag ee Ẽwandam iekjã jaaupiba, ni amachta emkhooin khãaijã ʉ̃rpai apiba chirʉm. Magju khãai sĩi warag khĩuuta Ẽwandam iek ũr ʉrrjee awi oberju aai nʉm.

¹³ ¿Khan jãgwia mua mag chirʉ́? Mua mag chirʉmʉn, warrcha maach ompaawaijã Adanta nacha Ẽwandamau ompaawia jũrr ẽudeechata ʉʉi ompaatarr aawaita mag chirʉm.

¹⁴ Maimua ĩchab khĩir eyaa abat khaita nacha dosãtau khũgurjĩ: Adán khabajim. Chi nacha khũgurwia pekau ee burrtarran Eva ajim.

¹⁵ Ichta nacha mag pekau ee burrtarr gaaimuata Ẽwandamau irig, “Pʉ chaai oogpaawai ich jãg pʉ gaai machag ãwat ʉrraju” ajim. Magjieb mamʉ irua Ẽwandam iek thãraucha ʉkha ʉrrʉmʉn, ijã ĩchab emkhooijo peerdʉju. Mamʉ mag nʉm dʉi thumaam khʉʉn kha khõsinaa, Ẽwandamau khõsi sim nempaita waunaa, ĩchab ich ʉrrʉmpierr agpierraa ʉrraju aai sim.