1 Timoteo 1 - Wounaan Meu

Salud

¹ Mʉʉn Pabloou, Jesucristoou ich i jaaumkhĩir jʉr autarr. Ẽwandam maach peerdʉ aumieu Cristo dʉimua chogpʉitarrauta pʉ athee mʉg ẽsap phã chirʉm Timoteo.

² Mag Jesucristo cha mua jaau chirʉmuata mʉg atagjã ʉu maach khĩir meeupiju. Maachdeu i iekpai ãba ʉkha wenʉrrʉm gaaimua pʉʉta mua mʉch chaaijo ʉ̃rcha ig chitʉm. Maach Aai Ẽwandamag jeeunaa maach Por Jesucristoogjã jeeu chirʉm, pʉ dau ee aug khaug paraanaa ʉuu wai nʉm dʉi pʉ khõinaa wai wenʉrramkhĩir.

Chad khabam iek jaau nʉm gaaimua Pabloou iek theeg jaaupʉitarr

³ Ar na mʉch Macedoniaag maagpaawai mʉchdeu pʉrʉg jaau chirarrjo, ich jãig Efeso phobor eepai chirsí, jãg sĩi seukha nem agchajã khaba jaau wenʉrrʉm khʉʉnag tag jãgʉm iek jaaupiba aag.

⁴ Oob sĩi jãg amach jooin igwia amau waaujerr igphobaademjã warag ag gaaipai par amach iphithur pʉa chʉuu apim amag. Jãgʉm iek jaau nʉmuan sĩita warag õor ee iek pom maadeujã khaugbata apʉi sim. Sĩi õor khũgur phe wai nʉmua warag õrag Cristo iek ʉkhapi aujujã khĩirjubata nʉm, Ẽwandamau maachig jaau simjo amachigjã agjo jaau simjã khaugbamjo.

⁵ Mua pʉrʉg mag jaaupʉi chirʉmʉn, ich mag wenʉrraju khãyau warag chikham kha khõsi amkhĩirta mag am wawibá a chirʉm, magbaawai amau agdaujo o ajaphanaa nem khaigba waujujã khĩirjuba sĩi thãrauchata Cristo iek ʉkhamkhĩir.

⁶ Mamʉ ar chi seukha nem jaau nʉm khʉʉnau magba, warag khĩirjug chaaur khĩirjuwia sĩi parhooba maadeu nem igmaphamʉgta ee thʉnarram.

⁷ Mag wenʉrrʉmta amaun õraujã amachig amta Moiseeu phã pʉatarr iek jawaagjã chi machnaanau apim khõsi nʉm. Mamʉ mag amachdeupaijã nem jaau khaug nʉm anʉmta, amachdeu jaau wenʉrrʉmjã khaugba nʉm.

Chijã khʉʉn atheeta Ẽwandamau ley deejĩ

⁸ Jãg Ẽwandamau Moiseeg ley phãpitarran chadcha chi ajaphamʉu. Mamʉ ĩchab maadeu khaphʉ aju aai nʉm, chijã khʉʉn atheeta Moiseeu mag phã pʉajĩ.

⁹ ¿Pãrau khĩirjuawai nem ajapha waaujem khʉʉnag tag nem waupiba aagta Moiseeu mag ley phã pʉajĩ? Mag khabam. Moiseeu mag Ẽwandam ley phã pʉatarran, ar nem jaau nʉmjã ũrba warag chaaur ʉkha ʉkha sĩerrjeem khʉʉn atheyau: nem khaibag sĩi pekau waujupai khĩirjuajem khʉʉn athee; ar Ẽwandam ogkhabanaa i iekjã ʉkhaba, warag i wau iekhaajem khʉʉn athee; ar amach dennaanjã wir aig thõojem khʉʉn athee; maimua ar thum chikham juau thõojem khʉʉn atheeta phã pʉajim.

¹⁰ Lein ĩchab ar dich õor khabam dʉita khapes aajem khʉʉn atheeu; ar dich khamannaan appaita ʉʉin dʉímjo, wa ʉʉin khãijã amach appaita emkhooin dʉímjo aajem khʉʉn athee; ar ajués õor pʉrnaa amach athee phidkhamkhĩir dʉr arrjem khʉʉn athee; seunemkham khʉʉn athee, maimua ar chad khabam nemta chadam iek gaai thʉ iekha sĩerrjeem khʉʉn atheeta phã pʉajim. Ajapcharan lein ar thum Ẽwandamau ich iek gaai nem ajaphamta waupi jaau sim ipierraa khaba, warag nem parhooba wau wenʉrrʉm khʉʉn khaibag waumkhĩirta phã pʉajim.

¹¹ Mua mag nem ajaphamta waupi sim a chirʉm chan mʉch iekpaijã khaba, jãan ich Ẽwandam õor dʉi ajaug khitʉmuata mʉrʉg jũrr jaaumkhĩir jaautarrau. Magua mua maach peerdʉajem iek jaau chitʉmpierr ich magta jaau chitʉm.

Ich peerdʉ autarr paar Pabloou Ẽwandamag ʉu ajim atarr

¹² Maach Por Jesucristoou ich i jaaumkhĩir mʉch jʉr autarr paar irig ʉu ajim a chirʉm. Ichdeuta ʉu mʉ juapá jãppibarmjo abarm mag ich iek jaaumkhĩir. Irua oowai mua ich phidag gaai ogdʉba chitaju khaphʉ sĩerr aawai mʉg phidag mʉrʉg deejim.

¹³ Muan warran Cristo eugar khaigba iekha chitajim; magnaa i iek ʉkha nʉm khʉʉn khaibag wawaag am ẽudeejã ẽkhanaa ich Cristo thʉ̃rcha thʉ̃rthʉ̃rnaajã ĩchab i wau iekhakha aajeejim. Mag chitarr ãba, Ẽwandamau mʉ dau aug khaugjim, agtha i iek ʉkhaba chirʉm gaaimuata mʉch mag chitʉmjã khaugba chitaajerr aawai.

¹⁴ Jũrran mag chitajieb mamʉ, maach Por Ẽwandamau ʉu magʉmjã igba mʉch khaibag thum chugpatarr aawai ãba Jesucristo iekpaita ʉkha chitʉm. Magua ĩsin mua i khõsinaa mʉch khapeenjã thum ãba daupii chitʉm, ar chadcha i iek ʉkha nʉm khʉʉnau aajemjo.

¹⁵ Dich in iekhõoin thumaam khʉʉnau khaphʉ aju aai nʉm: “Jesucristo mʉg jẽb gaai beewain pekau paraam khʉʉn peerdʉ awaanta beejim.” Ma chan seukhaawaijã khabam. Warran mʉʉn mʉchta ʉ̃rcha pekau pom chitajim, tagam khʉʉn khãaijã.

¹⁶ Mamʉ mag mʉchta atcha nem khaibag chitarr aawaita Ẽwandamau warag mʉ dau aug khaugam khõsi dau aug khaugjim, mʉ magbarm gaaimua thumaam khʉʉn nem khaibag sĩsid awiajã magʉm igba, Ẽwandamau amagjã “Mua pãar mʉchig beeta oo chirʉm pãar peerdʉ awaag” a sim khap amkhĩir. Magua ewag pawiajã amau mʉ denjo ʉkhamʉn, ʉu peerdʉ nʉisiewai Cristo dʉi amach ich mag nʉisiju khap aju.

¹⁷ Maguata thumaam khʉʉnau Ẽwandampaita tho iekhaju aai nʉm, ichta ich mag Rey chaarkha sĩerraawai. Ichta ãba thõjã thõba, ich mag sĩerrʉm warrgarwe. Í pod maadeu ooba aajem. Ichta ãba Ẽwandam charau. Ichdeupaita nem thum khaphʉ sĩerrʉm. Maata maach Ẽwandamau.

¹⁸ Ajap chirá Timoteo. Pʉʉta mʉch chaaijo wai chitaawai mua pʉrʉg jaaukhim: Na ar Ẽwandamau khapeenag iekhapibaawai pʉ igwia jãga pʉ phidkhaju aai chirʉ́ a jaautarrjo, ich jãg Cristo iek maachdeu ʉkha nʉm gaaita ubʉnaa, nem khaigba waujujã khĩirjuba, warag maach Ẽwandam iekta jaaubá, sĩi meeukha jãau nʉmjo nem pʉa chukhu.

¹⁹ Pua khaphʉ chirʉm, maach khapeen ãaur khʉʉnau amachdeu nem ajapham wauju aai nʉm khaphʉ narrta warag chaaur khĩirjuwia ya ĩs parhoobata wenʉrrʉm.

²⁰ Magta ajierram maach khapeen Imeneo Alejandro dʉi. Maguata amau deeu ewag khĩirju nʉm ora mua warag meperagta am thʉsĩebapʉim, am dʉi ichdeu ampierr amkhĩir; amach dʉi jãgbaawai ẽudee tag sĩi Ẽwandam dʉi ibʉʉr wau nʉmjo i dʉi jãgam ugua.