1 Tesalonicenses 4 - Wounaan Meu

Ẽwandam oowai ʉuum nem

¹ Khodamnaan, maach Por Jesús iekta maach iek gaai thʉwi ĩs marau pãrag magam ig nʉm: Ich jãg maachdeu pãachig jaautarrjo, Ẽwandamag pãach ʉuu oomkhĩir, ar pãach nʉmjo ich jãg agpierraata wenʉrrathʉ̃.

² Maach Por Jesuu pãrag jaaupibaawai marau pãachig jaautarr ya pãrau khaphʉ nʉm.

³ Ẽwandamaun ãba ich atheepaita maachig nem wau wenʉrrapim khõsi sim; ni iwiir ãbjã dich õor khabam dʉi khapese aba.

⁴ Magju khãai sĩi agdaujo dich ʉʉi chaar aunaa, i dʉi agpierraanaa, aairaa aju aai nʉm, i dʉi dichdeu ampierr aba;

⁵ mag dich ʉʉi dʉi pawiajã, sĩi õor Ẽwandam khaugbam khʉʉnjo i dʉi khĩir lokoo khaba, sĩi i dʉi khapes ajupaijã khĩirjuba.

⁶ Ni ãbmuajã oob dich khapeen ʉʉin wau sĩsid amiet, ni magʉm gaaimuajã pãach khapeen khũgurmiet. Na maachdeu pãach khĩircha jaau narrjo, magʉm paran Ẽwandamaujã jua khʉaba deejem, ichdeujã jãg khõchkhaba sĩerraawai.

⁷ Ẽwandamau maach ich athee jʉr autarr chan sĩi parhooba pekau wau wenʉrramkhĩir khabajim. Magju khãai ichdeu khõsi simjo ich athee nem wajapha wau nʉmpai wau wenʉrramkhĩirta maach ich denkha aujim.

⁸ Magtarr aawai chamʉg nem wajapha wau nʉmta iseg sim wounaun chi jaau wenʉrrʉm khʉʉnta isegba, ich Ẽwandam ichdeu maachig ich Akhaar deejemchata iseg sim, chamʉg maachdeu jaau wenʉrrʉm iekjã i den aawai.

⁹ Mʉg Ẽwandam iek ʉkha nʉm gaaimua khodkha thʉnʉm khʉʉn aphajã warag chikham kha khõsi amkhĩir chan mua tag pãrag bʉ̃ʉrjã jaaupʉibam, ich Ẽwandamauchata ya pãar mag khõsi wenʉrraa khaugpi sĩewai.

¹⁰ Macedonia durram khʉʉn ʉu pãar thum agdaujo chikham kha khõsi wenʉrraajem chadcha; magʉm ãba mamʉ marau waragta jũrr agdaujo dich khapeen daupii abat anʉm.

¹¹ Khõinaa wenʉrrajuuta ẽkhanaa nem inagdam wauju aai nʉm khai, ag gaaipaita nʉisit. Pãach juadamaucha phidkhabat, nawe maachdeu pãachig jaaujemjo.

¹² Maagwai bithurgam khʉʉn Ẽwandam iek ʉkhaba nʉm khʉʉnaujã pãach mag oowai, pãar eugar khaigba iekhabaju; mag nʉm dʉi ĩchab pãach mag phidkhaawai pãachdeu nem ig nʉm atheejã pãar augchebaju.

Maach Por Jesucristo beeju Pabloou jaautarr

¹³ Khodamnaan, sĩi Ẽwandam iek ʉkhaba aajem khʉʉnjo pãach okhĩirjuu apimaaugau, marau pãrag jaaum ig nʉm, jãga aajẽ mʉg maach Ẽwandam iek ʉkha nʉm khʉʉn meewai.

¹⁴ Maadeu khaphʉ nʉm Jesús meewia deeu iiu phiidʉtarr. Magtarr aawai thãraucha i iek ʉkha nʉm otarr khʉʉnjã deeu ich Ẽwandamau phiriutkha auwia ich Jesús pierrum dʉi beejujã chadcha khaphʉ aju aai nʉm.

¹⁵ Magua maach Por Jesús iekta maach iek gaai thʉwi pãrag khap amkhĩir marau mag nʉm: Maach Por Jesús beem ed maach agtha chi iiu durrum khʉʉn chan maach na khechtarr khʉʉn na i khĩirphee pos aimabaju, maach nawe khechtarr khʉʉnta nacha phiidʉtkhaju aawai.

¹⁶ Maach Por Jesús ich beem edan ichta nem iek theeg beeju, Ẽwandam trompeta tẽe abarm dʉi Arcangelau i pierrum jaauwai äa abarm ee. Mag ʉ̃gtharmua pierrwai Cristo iek ʉkha nʉm meetarr khʉʉnta nacha iiu phiidʉtkhaju;

¹⁷ maimuata maach agtha chi iiu durrum khʉʉn sĩi ʉ̃gthaa edjã baug ee degolp jiirkha athamjo awi mag chi maach nawe meetarr khʉʉnpa ich mag i dʉi ãba nʉisiju.

¹⁸ Mag i dʉi ãba naaimaju aawai magʉm iek ig iyʉʉ nʉmuata warag agdaujo pãach khapeen khĩir onee apibat.