1 Tesalonicenses 3 - Wounaan Meu

¹ Mag pãar jãga nʉ a khap am khõchag chirʉmjã pod maba aawai Atenas phobor ee mʉch appai thʉbawi

² jũrr maach khodam Timoteota mua pʉijim, ĩchab Cristo iek jawaag Ẽwandamau ichig nem mag aawai bʉ̃ʉrjã i ichaaur magʉm aba khitaawai. Iita mua pʉijim, pãar oon mawia pãachdeu ʉkha nʉm iek gaai ubʉ naamkhĩir warag pãrag jaaumkhĩir,

³ maagwai jãg phithurg aadephʉm gaaimuajã ni iwiir ãbjã deeu ewag mam ugua. Pãrau khaphʉ nʉm, maachin ich jãgta Ẽwandamau ich gaaimua phithurg ãwat wenʉrrapim khõsi sim.

⁴ Maach ipaarmua nawejã marau pãrag, ichiita maachin ich jãg õrau maach dʉi khaigba nʉm gaaimua okhĩirjugjã ãwatab khaba ãwat wenʉrraju a jaau naajim. Magtarr aawai chadcha ag ee oberjim. Majã pãrau khaphʉ nʉm.

⁵ Mag pãar jãga nʉ a khap am khõchag chirʉm tag mʉchdeu ãwatba aadeewaita mua Timoteo pʉijim, jãga pãrau Ẽwandam iek pãachdeu ʉkhatarr ee wenʉrrʉ́ a khap jeeumkhĩir. Mua pãar khĩirju chirajim, eeu degolp dosãtau khãijã pãrag nem khaigba waupibarm gaaimua deeu khãijã ewag ereu phobaadeewai sĩi parta maach phidkhabarmjo aju khĩirjuwia.

⁶ Mamʉ ya ʉu deeu Timoteo Tesalónicamua barbaichem, pãar oothurwia. I iek mag pãar Ẽwandam iek gaai ubʉnaa pãach khapeenjã agdaujo khõsi nʉm aajem. I iek mag ĩchab pãach garmuajã maar khĩir eyaanaa maar oom khõchag naajem aajem, ich jãg maraujã pãar oom khõchag naajemjo.

⁷ Khodamnaan, maguata mʉg phithurg aadephʉm dʉi gaai machagjã aadep ab mamʉ, maar dʉrrcha onee naajem, pãrau pãachdeu ʉkhatarr iek gaai ogdʉba agtha pedurraawai.

⁸ Mag maach Por Jesucristo dʉita pãar ubʉ nʉm a ũurwaita maachpajã warag khĩirdam ubʉ aphobaadeejem.

⁹ Jãga akhiin mʉg pãar gaaimua Ẽwandam na maach onee nʉm paar agpierr irig ʉu ajim abpʉikham.

¹⁰ Edaram magwe Ẽwandamag jeeu durrumua deeu ũwaai pãar dʉi khĩircha oobarkhiina a durraajem, mag ãba nʉisiewai agtha pãrau khaugba nʉmdam jaaubarmua khaugbaawai warag ubʉ nʉisimkhĩir.

¹¹ Ẽwandam maach Ayau maach Por Jesús dʉimua maar pʉikhiin ʉu akham a durraajem, pãar oon wetaag.

¹² Mag dʉi ĩchab maach Por Jesuugjã pãar kõit jeeu nʉm, ich jãg maachdeujã pãar khõsi nʉmjo pãarjã warag agdaujo thumaa jũrr chikham kha khõsi apimkhĩir.

¹³ Ichdeuta pãar thãarjã ãba ichigta khĩirjupinaa bʉ̃ʉrjã pekau chukhu wai sĩepim khõsi nʉm maach Aai Ẽwandam na, deeu ũwaai thum ich igar ʉkha thʉnʉm khʉʉn dʉi bee nʉm ora. Ich mag maachdeu jeeu nʉmjo akhiin ʉu akham keena.