1 Tesalonicenses 2 - Wounaan Meu

Pablo phidag Tesalónica phobor ee

¹ Khodamnaan, pãrau khaphʉ nʉm, maar pãar aar udthuurwai ʉu parcha khabajim.

² Pãrau khaphʉ nʉm ĩchab, Filipos phobor ee naawai õrau maach khĩirchajã iekhanaa maar dʉi khaigba aajerr; mamʉ mag nʉm ãba ʉu Ẽwandamau maar eeg oowi maar juagjã oojim, mʉg iek phithurg aadephʉm eejã ogdʉba warag ichdeu maach peerdʉ aaujem iekta pãrag jaaumkhĩir.

³ Marau maachdeu jaau wenʉrrarr iek wajapha khaphʉ narr aawai, imeerkhawi seukhajã nem jaauba, ni juau ogthom chikham khũguraagpaijã khaba chadchata jaau wenʉrrajim,

⁴ ich Ẽwandamauta maar jʉr auwia ichdeu õor peerdʉ aaujem iekta jaaupitarr aawai. Maguata marau mʉg i iek jaau wenʉrrʉm. Mag jaau wenʉrrʉm chan mag sĩi õrag maach khõigpim khõchgaujã khaba, ich Ẽwandamau ichdeuta maach thãarjã khogreu jʉrmamjo thum khaphʉ sĩerrʉmua oowaijã magta ʉu sĩewaita mag jaau wenʉrrʉm.

⁵ Pãrau khaphʉ nʉm ĩchab, marau sĩi maachdeu jaau wenʉrrʉm iek ʉkhamkhĩirjã chadam iekjo pãar tho iekhaba, ni sĩi mag wenʉrrʉmua phatkhon aum khõchgaujã khábata mag jaaujeejim. Marau mag jaau wenʉrraajerr Ẽwandamaujã khaphʉ sim.

⁶ Marau mag sĩi õrau maachigta ee amkhĩirjã jʉrba, ni pãragjã maach igwia maarta tho iyʉʉ abatjã abajim.

⁷ Cristoou ich i jaaumkhĩir maachta jʉr autarr aawai chadcha iek theeg nʉm awia marau pãar dʉi maachdeu am aig aju aai naajim. Mamʉ magjã magba sĩi warag chaain daumeraamjo naajim pãar ee. Pãrau ooba aajẽ, jãga ʉʉirau bʉ̃ʉrjã ich chaain chig aba jãsene phe wai sĩejẽ.

⁸ Ich jãgta pãarjã marau daupii wai naabajieb; magua marau pãrag Ẽwandam iek jaaum khõchag naajim. Pari mag jaau nʉmpaijã khaba, ag gaaimua pãar kõit maar khechju arr akhiinjã ya nawe khechwia naakham, pãar daupigau.

⁹ Khodamnaan, pãrau khĩir eyaa nʉm, maar pãar ee udthuurwai jãga maar khajeeu durrum ãba phidkhaajeejĩ maach bidam athee. Ẽwandamau maach peerdʉ aaujem iek pãrag jaau wenʉrrʉmua edaram magwe maar phidkhaajeejim, eeu naspawia ãbmua khãijã maar jãhogam khõchgau ichta khojudamjã chukkhu chirajim am ugua.

¹⁰ Pãrau khaphʉ nʉm, Ẽwandam dau na maar bʉ̃ʉrjã khaigba khaba khajaphata wenʉrraajeejim. Magua pãar eem khʉʉnau ni ãbmuajã bʉ̃ʉrjã marag magʉm aba aajeejim. Maagjerr pãrau pãach daúa oowia ĩchab ich Ẽwandamaujã khaphʉ sim.

¹¹ Khĩir eyaa abat ĩchab, chi ayau ich chaain wawiejemjo marau pãach wawinaa pãach khĩir jãsenkhaajerr.

¹² Mag wawimamua marau pãrag “Chadcha Ẽwandam dau na wenʉrraju aai nʉmjota wenʉrrathʉ̃” aajeejim, ichdeu durr jʉ̃a sim gaai wenʉrramkhĩir ichdeuta maach thʉ̃r sĩewai.

¹³ Maguata maraun ich jãg Ẽwandamag ʉu ajim a durraajem. Marau Ẽwandam iek jaau wenʉrrarr pãrau ũurwai chadcha Ẽwandam iek aawaita pãrau ʉkhajierram. Jã chan sĩi khajap maach iekpaijã khabajim; jãan Ẽwandam iekhau. Magtarr aawai ichdeuta pãar wajaug paa arrum.

¹⁴ Khodamnaan, ar pãach durr eepai ãba naajem khʉʉnaupai pãar khaibag wawaag athee pãar ẽudee ẽkha naawai, Judea durrjã agjo Ẽwandam iek ʉkha durrum khʉʉn dʉi arrjota ajierram pãar dʉijã. Amjã pãarjo Jesucristo den aawai pãar dʉi arrjo amach durram khʉʉnaupaita am ẽudee ẽkhaajeejim.

¹⁵ Ich makhʉʉn judionaanauta maach Por Jesús thõopʉijierram, warrgarwe maach jooin Ẽwandam i jaau durraajerr khʉʉn kheechjerrjo. Mag i thõopʉiwia maarjã khaibag wawaag ẽkha nʉmua warag maar deeum durrag jʉr werppʉijierram. Jãkhʉʉnau chan Ẽwandam dau na bʉ̃ʉrjã nem wajapham wauba aajem. Amach mag nʉm gaaimua ni iwiir ãbam khʉʉnaujã Ẽwandam iek jaau nʉm igar khaba nʉm.

¹⁶ Maguata judionaan khabam khʉʉnagpa maach peerdʉajem iek jaaum iigwaijã magjã khõchkhaba nʉm. Amach mag nʉm gaaimua amachta warag Ẽwandam dʉi iekkhõr pooma naawai Ẽwandamau am gaai mas deeb khaba deeju.

Pabloou deeu Tesalónicapien oon mam khõchag sĩerr

¹⁷ Khodamnaan, pãar aig naawia ereu phobaadeeu tag marau pãar oobaa nʉisijim. Mamʉ magʉm ãba, marau ʉ̃iba pãar iigjeejim. Maguata pãar oon mam khõchaaga naajim.

¹⁸ Mag naawai wetju ẽkhajim; mʉchchajã maju ẽkhajim. Mamʉ dosãtau ideu mʉ mapibajim.

¹⁹ Pãade khĩirjubat: ¿Chijã khʉʉnta marau iigjem abarí? ¿Chijã khʉʉn gaaimuata maar oneenaa mʉg atagjã Ẽwandamau nem wajapham deebarm auju khĩirju nʉm khai? Pãar gaaimuama; pãarta marau iigjem. Maach Por Jesucristo beem edjã pãar gaaimuata maar onee aju.

²⁰ Pãar gaaimuata maar oneenaa mʉg atagjã maar ʉucha nʉisiju.