1 Tesalonicenses 1 - Wounaan Meu

¹ Mʉch Pabloouta Silvano dʉi Timoteopa ãba nʉmua mʉg ẽsap phã deepʉi chirʉm pãar Tesalónica phobor ee Cristo gaaimua maach ãba khodkha nʉm khʉʉnag. Mua khaphʉ chirʉm, chadcha pãar Ẽwandam chi Aai gaai ubʉ thierrkhanaa ĩchab maach Por Jesucristo dʉijã ubʉ nʉm. Marau Ẽwandamagta jeeu nʉm, pãar ʉuu wai sĩenaa ĩchab khõinaa wai sĩemkhĩir.

Jãga wenʉrrajĩ Tesalónicapien õor dau na

² Maran mau warp naab mamʉ, ed eepierr maachdeu Ẽwandamag jeeuwai irigta ʉu ajim a durraajem pãar kõit.

³ Mag pãar igwia irig ʉu ajim anʉm aig ĩchab marau khĩir eyaa aajem, jãga pãrau pãachdeu ʉkhatarr iek gaai bʉ̃ʉrjã iekcheba warag phidkham khõsi phidkha nʉ, maimua jãga mag maach Por Jesucristo beejujã khõsi nʉ nʉm gaaimua chikhamnau pãach dʉi khaigba aadep aawaijã ichdeu pãar eeg oojẽ, magʉm iekjã igba ãwat wenʉrramkhĩir. Marau khaphʉ nʉm, pãrau chadcha dich khapeen kha khõsinaa Ẽwandamjã khõsi naawaita jãg phidkha nʉm. Mag gaaimuata irig ʉu ajim a durraajem pãar kõit.

⁴ Cristo gaaimua khodamnaan, marau khaphʉ nʉm chadcha ich Ẽwandamauta pãar jʉr aujim. Magtarr aawai ichdeujã chadcha pãar khõsi sim.

⁵ Marau pãar aar Ẽwandam iek jaau wenʉrraawai sĩi maachdeu jaaum khõchgaupai khaba, ich Ẽwandam Akhaar ag jua theegau jaaupibaawai ajim; maimua mag nʉm dʉi ĩchab chadcharam iekkha sim maachdeujã khaphʉ nʉisiewai ajim. Pãrau khaphʉ nʉm, jãga pãar ee maar wenʉrrajĩ, pãach ʉu wajapha wenʉrramkhĩir.

⁶ Pãach daúa maar mag wajapha wenʉrrʉm oobaawai, pãrau maar wenʉrraajemjo awia ĩchab maach Por Jesús nʉrrarrjo ajierram. Ich ag gaaimua pãar phithurg aujierrab mamʉ, ich Ẽwandam Akharauta pãar thãar onee api sĩewai pãrau maach peerdʉajem iekjã onee ʉkhajierram.

⁷ Pãachdeu magtarr gaaimua Macedoniapienau maimua Acayapienaujã thum chi ʉkha durrarr khʉʉnau ʉu pãar agpierraa wenʉrrʉm oo nʉm.

⁸ Pãar aigmuata maach Por Jesucristo iekhan sĩi aaidʉbaadem. Mag aaidʉbaadem sĩi Macedonia durrpaijã khaba, ni Acaya durrpaijã khaba, durrpierrta aaidʉ joisim. Mag nʉm dʉi ĩchab pãachdeu Ẽwandam iek ʉkhatarrpai ogdʉba ʉkha nʉmjã thumaam khʉʉnau khakhapdo thʉnʉm. Mag khakhapdo wejom aawai marau tag pãar jaauju aai khaba nʉm.

⁹ Marau amachig jaauju nawe amach garmuata marag jaau nʉm, marau pãar oon weetwai jãga pãrau maar pãach ee baarpijĩ, maimua jãga parhoobam nemta pãach ẽwandamkha wai nʉnʉid arrjã isegmajierrá, jũrr Ẽwandam chaar chadcha iiu sĩejemʉgpaita jeeu wenʉrraag.

¹⁰ Ẽwandam Iewaa Jesús meewia iiu phiidʉtarr ʉ̃gtharmua deeu beeju pãrau nʉ nʉmjã mau marag jaau nʉm ĩchab. Magua maach Por Jesuugta ʉu ajim a chirʉm, ʉu i gaaimuata Ẽwandamau maach i agkham ed maach gaai jua khʉaba deeju arrjã maach peerdʉ autarr aawai.