1 Pedro 5 - Wounaan Meu

Pedroou chi ʉkha durrum khʉʉn wawitarr

¹ Ãbmiecha paawai pãar iglesia ee jooin chi pornaankha nʉm khʉʉnagjã wawí iekham khõsi chirʉm. Ya mʉchjã ĩchab jooinau amjo. Mua mʉch daúa pakuls gaai Cristo dau aphʉʉ jochkherʉm oojim; mag Cristo deeu ich jua theeg thum beem edjã mʉchjã amjo ĩchab i dʉi chiraju. Mag am wawim ig chirʉmʉn mʉgau:

² Ich jãg pastorrou ajapha ich oveja thʉajemjo, pãach ee Ẽwandam iek ʉkha nʉm gaaimua i denkha durrum khʉʉndam pãachig jaautarrta ajapha oopaar abat. Mag am thʉa nʉmjã ajués bigaaum khʉʉnau jaauwai khaba, ich Ẽwandamau jaau simjo pãach khĩrauta i chaain thʉam khõsi thʉabat. Mag phidkha nʉm gaaimua phatkhon pom paarpajujã khĩirjuba, sĩi pãach thãrau waum khõsi aawaita waubat.

³ Pãachta chi pornaan awi sĩi amagpaita nem jajaau aba, pãachdeuta nacha audʉdʉ abat, amachig nem jaauwaijã dʉi khõsi waumkhĩir.

⁴ Magta pãrau am thʉa nʉmʉn, maach thʉajem chaar Cristo degolp thumaam khʉʉn Porkha dʉnʉʉubaicheewaijã pãarta irua ich aig thʉ̃rnaa ich garcha phe wai sĩsiju. Magbarm chan sĩi pamaarjo khũchpai ooimʉ thʉnaawi phuajem nem khaba aawai ich magta i dʉi nʉisim iekhau.

⁵ Ich agjo ẽwannaanagjã mua mag chirʉm: Ẽwandam iek ʉkha durrum khʉʉn ee pãach khãai jooinau pãachig iekhaawai, sĩi am ipeer ahau aju khãai, ʉdʉraa pãach wawipinaa warag am ipierraata abat. Thumaa agdaujo jũrr dich khapeen chogkha nʉmjota abat. Magbaju atheen Ẽwandamau ich iek gaai jaau simjo: “Ar mʉjã igba amach juapaaupaita wenʉrraajem aajem khʉʉn chan mʉchdeujã igba chitʉm” a sim. “Magarrau amach serbiibag khap mʉchdeu nem jaau chirʉm wawaagjã mʉch juapadam iigjem khʉʉnan chadau, mʉch garmuajã am dau ee aug khaaugjem” a phãpijim. (Pr. 3:34)

⁶ Maguata pãach serbiiba nʉm khap, pãach dau aphʉʉ aawaijã, magʉm igba, Ẽwandam chi jua thierrigta warag, “Ẽwandam, pʉchdeuta khap chirʉm” abat. Pãrau magta amʉn, mʉg atagta ichdeu khap irua pãach dau aphʉʉ apiejerr khʉʉn khãaijã jũrr pãachta ʉ̃rpai apiju.

⁷ Pãachdeu nem khĩirju nʉm thum ideu Ẽwandamagta deebat. Irua pãar khõsi aajeewai jãg pãar phithur nʉmjã sĩi oobamjoo abaju.

⁸ Khĩir khaphʉ abat: Meperan khumau nem pʉr aum ig sim aig sĩi jĩerrbʉgthʉ aadephʉmjota sim maach bigaau, maach pekau ee burrpiju ẽkhaawai.

⁹ Magua pãachdeu ʉkha nʉm iek gaaita warag ubʉnaa ʉdʉʉr pãach thʉ aum ugua, dʉi thethe thierrkhabat. Pãar dʉi jãjãgkham chan pãar dʉipai khaba, pãar denjo ʉkha durrum khʉʉnjã durrpierr ich jãg phithurg au nʉmta magbamjoo nʉm.

¹⁰ Khũchpai pãar mag dau aug wau dichdimaawai ich Ẽwandamauta pãar ajapcha ajaug paapʉiwi warag ubʉ apiju, ajap juapá jãp nʉisimjo nʉisiewai ich athee nem waum khõsi waumkhĩir. Ĩs pãar mag dau aug wau naab mamʉ, ich Ẽwandam maach daupii aajemuata maach peerdʉ awaag ich garmua maach jʉr autarr aawai Jesucristo dʉi ãba ich ajaug ich mag oo wenʉrrapiju.

¹¹ Magua irigta ee aju aai nʉm, ichdeuta mʉg atag pawiajã nem thʉnʉmʉn thum ich mag khap sĩerraju aawai.

Ãbmiecharam salud

¹² Keena, chadcha mʉchdeu oowai nem wawaag magʉm aba khitaawai maach hermano Silvanoogta jaaumajim, mʉg ẽsap phãmkhĩir, mag phãwi pãrag deepäaig. Mʉg cartadam bʉthʉ khitʉm gaai pãar wawí chirʉm, Ẽwandam maach thumaam khʉʉn daupii aajem dʉita ich jãg ubʉ naamkhĩir, bʉ̃ʉrjã ewag wetjujã khĩirjuba. Jãg pãach dau aug wau nʉm gaaimua irua pãar dʉijã ʉu aajemʉn, chadcha ichdeu pãarjã khõsi sim a khap apiewaiu.

¹³ Mau Babilonia iglesia eem khʉʉnaujã pãrag salud deepʉi nʉm. Amjã ĩchab pãarjo ich Ẽwandamauchata ich iek ʉkhamkhĩir jʉr autarr khʉʉnau. Mʉchdeu jaau chirʉm ũrwia ʉkhatarr gaaimua mʉ iewaa aajemuajã pãrag salud deepʉi sim, ajapcharan Marcoouma.

¹⁴ Cristo gaaimua pãach thum ãba khodkha thʉnaawai agdaujo pãach khapeen kha khõsi saludaabat. Pãarjã thum Cristo den aawai pãar kõit jeeu chiraajem, ich mag khõinaa wenʉrramkhĩir. Magdampai ajim keena, pãrag jaaum ig chirarr. Pedro