1 Pedro 4 - Wounaan Meu

Cristoou dichig juapá deemarrpierr agua nem ajapha aju aai nʉm

¹ Mag, Cristojã maach gaaimua õrau mas wautarr aawai pãarjã agjo i gaaimua dau aphʉʉ aag magʉm abaju aai nʉm. Cristo gaaimua dau aug wau nʉmjã magʉm aba, waragta i ipierraa jʉmpʉpʉikhamʉn, pekaujã maach dʉi jua theeg chukhuta aadeejem,

² magbaadem aigmua chan ya tag dichdeu nem khõchagpierrta nem wauba, ãba Ẽwandamau khõsimjota nem wawaag.

³ Chadcha warrgarin Ẽwandam iek ʉkhabam khʉʉnau nem waaujemjo pãraujã pãachdeu am aig aajeejim. Maguata pãrau am denjo parhooba dich õor khabam dʉijã khapes am khõsinaa tagam nem khaigbamjã waum khõchkhaajeejim; nagjã doojeejim; phiesta pomjã waunaa, donaa sĩi khech thʉnʉisip aajeejim. Mamʉ magpaijã khaba, chadcha Ẽwandamau magpiba simta pãrau nem parhoobam waunaa ẽwandam awi magʉmʉgpata jeeujeejim.

⁴ Maagjerrta ĩs ya pãrau Cristo iek ʉkha nʉm gaaimua mag tag amach dʉi parhooba nem wauba sĩi warag amachig oobamjoo aphobaadem oowi, pãar denjo ʉkhaba nʉm khʉʉnau pãar eugar parhooba iekhaajem.

⁵ Amau pãar eugar mag naab mamʉ, ichiita jãg nʉʉ awi Ẽwandamau jũrr amag magʉm iek eudʉb khaba eudʉju. Mag edan nachgarwe otarr khʉʉn awiajã deeu ichdeu thumaa phiriutkha auwi agtha iiu durrum khʉʉn dʉi ãba amagjã amach khĩircha jaauju, jãga aju am dʉi amach khaigba wenʉrrarr paar.

⁶ Magju aawaita mag meewi jẽb ee durrum khʉʉnagjã, agtha am dau phuu nʉwe, ich iek jaaupijim, ʉkhamkhĩir. Mag ʉkhatarr akhiinjã, eumee deeba arr aawai, ichiita maach chi ʉ̃rʉmʉn ich jãg meekham. Mamʉ mag amachig jaaubaawai ʉkhatarr amuan, ich Ẽwandamjo am akhaarjã ich mag ich dʉita nʉisimkhĩir ajim.

⁷ Ya Ẽwandamau mʉg durr i agkhaimʉʉ pam. Mag maach oju gayaa pamaawai sĩi donnaanjo nem parhoob wauba, ãba Ẽwandamagta jeeu nʉʉ abat.

⁸ Pari ʉ̃rcha dich khapeenta daupii abat. Mag chadcha am daupii wai nʉm chan, maach dʉi biek khapan khaigba awiajã, am dʉi magʉm iek igba sĩi warag am perdonaaju.

⁹ Pãach aig õordam beewaijã, bʉ̃ʉrjã iek chigaa iekhaba, pãach aig jẽerpim khõsi jẽerpinaa nem khoojem nemdamjã o ãkhãrag chukhu deebat.

¹⁰ Cristoou ichdeu khõsimjo nem wajapha waumkhĩir pãachig ich juapá deemarrpierr ich agua agjo pãach khapeen dʉi pãachdeu khaphʉgpierr abat, magamkhĩirta pãrag ich jua theeg deetarr aawai.

¹¹ Ãb khãijã Ẽwandamau ich i jaaujemkhapi sim khai, ich Ẽwandam jua theeg dichig deetarrauta magʉm phidagjã waubá. Nem thum Ẽwandam athee waauwaijã, maach Jesucristo denkha nʉmua mag wau nʉm oowia bigaaum khʉʉnagpa Ẽwandam tho iekhamkhĩirta nem wauju aai nʉm. Pãar Jesucristo denkha naawaita magmʉn ʉucha sim. Ich Jesucristota mʉg atag pawiajã ich mag jua theeg sĩerraju aawai irigta maach thumaam khʉʉnau ee aju aai nʉm.

Cristo iek ʉkha nʉm gaaimua dau aug wau nʉm

¹² Keena, Cristo gaaimua khodamnaan, pãran chadcha dau aug wau nʉmuata thũr ajapha oberju khap aag õtdau ee phaa oo nʉmjo aajem. Mamʉ Ẽwandamau ʉdʉraa mag pãach dau aug waupiewai, oob “¿Khan jãgwiata pua ʉdʉraa mʉg maar dau aug waupi chirʉ́?” amiet. Pãar jãjãgkham chan pãach appai khabam.

¹³ Magju khãai mag pãach dau aug waauwai warag onee abat, Cristojã maach gaaimua aphʉʉ arr khaphʉ nʉm gaaimuata mag naawai. Pãrau magta amʉn, mʉg durr gaai ich Cristocha thumaam khʉʉn Porkhanaa õor dʉi ichdeu khap aag beem edjã warag atchata pãar onee aju ich dʉicha.

¹⁴ Mag dau aug waauwaijã, ich Ẽwandam Akharauta warag ich Ẽwandam tho iekhapiegjã juapá deejeewai, ãbmua khãijã pãachdeu Cristo iek ʉkha nʉm gaaimua pãach khĩir iekha thʉnʉʉuwaijã warag onee abat. Ẽwandam Akhaar chan pãar dʉi ogdʉba ich mag sĩejem.

¹⁵ Mag chadcha chikhamnau pãar jaauju awiajã, õor thõotarr gaaimua khaba, nem jĩgkha nʉm gaaimua wa parhooba nem khaigbam wau nʉrrʉm gaaimuajã khaba, ni dich dʉi khabamta dich gaai paa auwia iekkhõr paarpatarr gaaimuajã khábata mag pãach jaaupibat.

¹⁶ Cristo iek ʉkha nʉm gaaimuata chikhamnau pãach jaau nʉm khai, oob khĩir naaumiet. Khĩir naauju khãai, warag Ẽwandamagta ʉu nʉm abat, i chaainkha nʉm gaaimuata õrau pãach dʉi mag naawai.

¹⁷ Khaphʉ abat, maach mʉg nʉm aig maachta nacha Ẽwandamau dau aug waupi sim, ich chaain ãba. Mamʉ mag maach dau aug waupi simʉn, magʉm gaaimua warag ich dʉita ajaug paaukhamamkhĩrau. Ẽwandamau maach ich chaain dʉijã magta sim khai, ¿jãgaju khai ar maach peerdʉ aaujem iek bʉ̃ʉrjã ʉkhaba mee nʉm khʉʉn gaai?

¹⁸ Ẽwandamau õor dʉi magju igwi, ãbmua i iek phã sim gaai, “Mag chi ajapha ʉkha sim wounjã ajap phithurg auwiata ʉu peerdʉ sim khai, magan ¿jãga peerdʉagáwa” ajim, “ar bʉ̃ʉrjã maach Por Ẽwandam ipierraa khaba nʉm gaaimua amach pekau ee mee nʉm khʉʉn?” (Pr. 11:31)

¹⁹ Magua pãade khĩirjubat: Ichiita Ẽwandamau ich gaaimua mʉig eegar pãrag magta dau aug wau wenʉrrapi sim khai, warag nem ajaphamta i athee waunaat, pãach dʉi chikhamnau mag nʉmjã igba. Pari magaagjã, ich maach ompaatarr Jooiragta pãach thʉapibat. Pãar akhaarta jãg Jooi jua ee pam chan chig abam.