1 Pedro 3 - Wounaan Meu

Jãga apim khõsi sĩ Ẽwandamau dich õor dʉi

^1-2 Ʉʉin, pãarjã agjo ĩchab chi jaainpan, pãach jaainagta ʉdʉraa pãach phẽethʉgpibat; pãach jaainau Ẽwandam iek ʉkhaba aajem khai, pãachdeu Ẽwandam okhonaa i ipierraa am khõchgauta ʉdʉraa pãach phẽethʉgpibat, amach dʉijã mag ajapha nʉm oowia amachig Ẽwandam iek jaaujã jaauba sĩi pãach oowiapai khãijã pãach denjo ʉkhamkhĩir.

³ Chihoowaijã oob sĩi athuu chihoomiet, nem atcharag õor dauderraa por megba, chihoo phĩr den wa khajũa parhẽpagkham khãijã jũabaawai magʉm gaaimua pãachig eerpapa am ugua.

⁴ Mamʉ mag chihoo nʉmuata pãach ooimʉ oopiju khãai, pãach thãarta Ẽwandam dau na wajapha apiju ẽkhabat. Ajapcharan pãach jaain dʉi khĩir machagjã chukhu, am iek dʉi ʉkhapʉpʉijã aba wenʉrrʉmuata pãach ajaug oopibat. Magʉm nemen chadau sĩi chihoo mor gaai jũajemjo thʉrrdʉwi okhoojem nem khaba aawai ich Ẽwandamaujã dawagaata pãar gaai ooju.

⁵ Ich magta warrgarm ʉʉin Ẽwandam iek ʉkhanaa i atheepai nem waaujerr khʉʉnjã mag amach jaain ipierraanaa amach phẽethʉgpi nʉmuata ajap chihoo nʉmjo amach at aba oopiejeejim.

⁶ Khĩir eyaa abat, jãga Saraaujã ich jaai Abrán ipierraanaa warag irig i por aajeejĩ. Pãraujã pãach jaain dʉi Ẽwandamau khõsimjo ajaphata nem wau nʉmʉn, magan ʉu pãraujã Saraau ʉkhaajerrjo Ẽwandam iek ʉkha nʉm.

⁷ Mamʉ pãach chi emkhooin chi ʉʉinpanaujã agjo pãach ʉʉin ajaphata aairaa abat, ich Ẽwandamau am dʉi magta apim khõsi simjo. Mamʉ mag nʉm chan mag ʉʉin aawai pãach khãai juapá eegpai khithee aawaipai khaba, amjã pãachjo ĩchab ich Ẽwandamau ich aar phe auju jaau sĩewaita am chig aba warag jãsene abat. Eeu magba akhiin, mag khaigba aadephʉm gaaimua ãba ohoodonaa Ẽwandamag jeeum khõsi jeeuba adukham.

Jãga aju aai nʉ nem agcha wau nʉm gaaimua dau aug waauwai

⁸ Maimua ãbmiecha deeum khʉʉn dʉijã jãga aju aai nʉ a khap amkhĩir pãrag jaaukhim: Cristo iek ʉkha nʉm gaaimua thum pãach khodkha thʉnʉm khʉʉn dʉi o ãba abat, Ẽwandamau khõsimjo aag. Pãach ee ãb khãijã gaai masi wa okhĩirjuu khãijã aawai pãachta mag nʉmjo dʉi gaai masi abat, agdaujo dich khapeen kha khõsi chadcha khodkha nʉm khʉʉnjo. Agdaujo chikham dau aug khaug paraata abat, dichta warm khʉʉn khãaijã ʉ̃rpai nʉm a khĩirjuba.

⁹ Chikhamnau pãach dʉi khaigba aawai agjo aju awi oob am khaibag waumiet. Pãach ãaukha thõp iekha thʉnʉʉuwaijã oob am eugarjã amach denjo amiet. Magju khãai mag pãach dʉi khaigba aajem khʉʉn kõitjã warag Ẽwandamag am eeg oopita jeeubat, magamkhĩirta warrjã pãar ich denkha autarr aawai. Magbaawai pãachpata Ẽwandamau ajapha wai sĩeju.

¹⁰ Mag dich dʉi khaigba aajem khʉʉn dʉi ajapha aju aai nʉm a khap amkhĩir, Ẽwandamau ichig phãpibaawai jooi Davidau, “Ich magta onee nʉrram khõsi sim khai, pʉch meukhĩir thʉwaau athá” a phãjim, “nem khaigba wa seukha khãijã iekhamaaugau.

¹¹ Chikham dʉi khaigba aju khãai, õor dʉi nem ajapha waujuuta jʉrnaa khõinaa ajuuta ẽkhabá.

¹² Maach Por Ẽwandam dau na nem agcha waaujem khʉʉnan ichdeuta thʉanaa, amau ichig jeeuwaijã ʉu am iek ũurjem” a phãjim. “Mamʉ ich dau na nem khaibag waaujem khʉʉn dʉin khĩir masita sĩerrʉm” a phãjim. (Sal. 34:12-16)

¹³ Ẽwandam mag sĩerraawai ichdeu magpibam aig chan i dau jam õrau pãar chig abarju, nem ajapha wau nʉm paar.

¹⁴ Ichiita mag nem ajapha wau durrum paar amau pãach dau aug wauwiajã onee abat; pãar mag aphʉʉ abarm paarjã Ẽwandamau sĩi par okhoopiba nem ajapham deeb khaba deeju. Magua amau warag pãach dakhãauwaijã oob am ogkhamiet, ni atcha okhĩirjuujã amiet.

¹⁵ Magju khãai warag pãach odegpai, “Maach Por Cristoouta khap chirʉm” awi, ãba irigpaita jeeubat. Ãbmua khãijã pãachig, “¿Khan jãgwiata jãgcha pãrau Cristo iekta ʉ̃rcha ʉkhanaa i dʉi khĩircha oojuuta khĩirjuajerráma?” a jeeuwai, amag jawaagjã ag nawe pãach iekhaju khĩirju wai nʉisit, degolp ãbmua jeeuchewiajã agcha jawaag. Mamʉ mag jaauwaijã sĩi ithũu amag jaaubat, chadcha Ẽwandam okho aajem khʉʉnjo.

¹⁶ Pãach iekhaajemjota õor dakhĩir nem waauwaijã ajapha nem waubat, pãach khĩir parhooba iekhaajem khʉʉnaujã pãach mag Cristo iek ʉkha nʉm gaaimua ajapha wenʉrrʉm oowi deeu amach iekhatarrpai khĩirjunaa amachta chigaa amkhĩir.

¹⁷ Ich Ẽwandamaujã magta api sim khai, nem ajapha nem wau nʉm gaaimua dau aphʉʉ nʉmta nem khaigbam wau nʉm gaaimua dau aug wau nʉm khãaijã ajapcha ober sim, magʉm thum ʉu podpʉitarr paarjã Ẽwandamau sĩi par okhoopibaju aawai.

¹⁸ Pãrau khaphʉ nʉm, Cristojã maach khãai ajapha khitarrta, jũrr maach Ẽwandam dʉi iekkhõr pom narr khʉʉn kõit ʉdʉraa ich dau aphʉʉ apijim. Pari mag i meetarran, warr õrau amach pekau athee ʉ̃iba nemchaain thõojerr khĩir khaba arr aawai, mag biek ãbpai meebarmua maach chi khaibagnaan Ẽwandamau ʉu maach auju ayaa amkhĩir ajim. Í woun arr aawai chi meen chadcha meejim; mamʉ í ĩchab ich Aai gaaimua Ẽwandam arr aawai mag meetarrjã ich mag iiu sĩsijim.

¹⁹ Mag Aai gaaimua Ẽwandam arr aawaita, ĩchab mag ich thõobaawaijã, meetarr khʉʉn Ẽwandamau preso phe wai sĩerr aar ya ichdeu nem thum podbapʉim jawaan majim.

²⁰ Mag preso thʉnarr khʉʉn warr jooingarwe Ẽwandam ichaaur arr khʉʉn ajim, Noé barco wau sim jaar Ẽwandamau õrag ich iek ʉkhamkhĩir Noeeg jaaupibaawai parii jooirau jaau jochkherʉʉ aajerrjã ʉkhaba arr khʉʉn. Ich mag jaar mʉg durr thum dohãdau ierrpawi õor pom wejorr ee ochopaita peerdʉjierram aajem, chi Noé ich chaain dʉipai.

²¹ Ich jãg Noé ich chaain dʉi mag dohãd eemua peerdʉtarrjo, maachjã agjo do ee por choo nʉmuata maach peerdʉ nʉmjã õrag khaphʉ apiejem, Jesucristo iiu phiidʉarr gaaimua peerdʉ naawai. Pari mag doou por choo nʉm chan maach mor chi ʉ̃rʉmta ʉpʉyaag khaba, Ẽwandamag dich thãarta ajaug paapi jeeunaa ichdeu khõsimjo wenʉrraagta mag por choojem.

²² Mag iiu phiidʉtarr Cristota ʉ̃gthar mawi, thumaam khʉʉn khãaijã ichta Ẽwandamau ich dʉicha ich juachaar gar juppiwi, ʉ̃gtharm magwe ich chognaan thum chi thethecharam khʉʉnagpa iita ogkhawi i ipierraa apijim.