1 Pedro 2 - Wounaan Meu

¹ Mag ich iek ʉkhapi athamuata Ẽwandamau maach deeu thaabapibarmjo apiejeewai muan pãragan, pãachdeu nem khaigba khĩirjuajerr thum warre isegbapʉit a chirʉm. Oob chikham khũgurmiet; oob chad khabamta chadam iekjo iekhamiet; oob chikhamnau nem wai sĩsidʉmjã pãach den apim khõsi amiet, ni chikham eugarjã oob khaigba nem ĩgkhamiet.

^2-3 Magju khãai ya mag pãar eeu thaababarmjo naawai, ich jãg chaai eeu au khitʉmua jũd doog bĩe khitaajemjo, Ẽwandam iek warag khaugam khõchgauta do dom khõsimjo abat, mag khaugmampierr pãach thãar ajapcha paaukhamamkhĩir. Pãrau chadcha maach Por Ẽwandam pãach dʉi ajapha khitʉm khaphʉ naawai pãach ich aar phe au nʉm ora i iekta khaugam khõsi abat, mag khaug nʉmua warag ag iek gaaita ubʉ naag.

Cristo chi dihãd jãrram, õor iiupiejem

⁴ Mag i iek gaaita ubʉ naagan, Cristoouta ichjo maach ich mag iiupiejeewai, i bʉʉta ẽkhabat. ¿Pãrau khaugba nʉ, Ẽwandamau mag Cristo iek ʉkhapimampierr ich athee di eumamjota sim? Mag di eumamjo sim aig, Cristota mag chi dihãd jãrramkha sim; maagwai maach jũrr chi dipá chi daígkha nʉm. Õrau i isegjierrab mamʉ, Ẽwandamagan ichta dipá chi ajapcharam aawai ichta jʉr auwi chi dihãd chaarkhapijim. Ãba i gaaimuata ʉu maach Ẽwandam õorkha nʉm.

⁵ Mag pãrau Cristo iek ʉkha nʉmuata Ẽwandamau ich athee di eu arrumjo sim. Di chaar eu nʉm khabamta pari pãachta chi dipá daígkha nʉm, ajapcharan i õorma. Mag i õorkha naawai ãba irigpaita jeeunaa irigpaita ee aju aai nʉm, ichig magamkhĩirta maach ich õorkha wai sĩewai. Pari mag i athee nem ajapha wau wenʉrrʉm chan pãachta ajapha nʉm gaaimua khaba Jesucristo ajaug tho nʉm gaaimuata mag wenʉrraawai, Ẽwandamaujã ich dawagaata oojem.

⁶ Mag dibig igwiata Ẽwandamau ich iek phãpitarr gaai, “Pãade ũrbat: Mua mʉch phobor athee woun ãb pʉi chirʉm” ajim, “dibigjo chi ajapcharam mʉchdeu jʉr autarr ichta chi dihãd jãrram khamkhĩir. I gaaimua khabam chan pod iwiir ãbjã mʉ õorkhabaju. Magua i iek ʉkha sim woun chan naspawia parta i iek ʉkhajim abaju, mag mua pʉi chirʉm wounau i khũrgurbaju aawai” ajim. (Is. 28:16)

⁷ Pãar chi ʉkha nʉm khʉʉnagan Cristoon chadcha dibig ajaphamʉu. Mamʉ ar ʉkhaba nʉm khʉʉnagan maadeu nem igmaphamjota sim. Mamʉ mag i isegju igwi Ẽwandam iek gaai jaau simjo, “Di eu narr khʉʉnau dipá isegtarrta jũrr chi dihãd jãrramkha sĩsiju” a sim. (Sal. 118:22)

⁸ Maimua ĩchab ich ag woun igwiapai, “Jãg dibig gaaimuan õor bʉheu sub khaba bʉheu suwi burrju” a sim. (Is. 8:14) Mamʉ mag am bʉheu suwi burrju a simʉn, maach peerdʉajem iek jaau nʉm ũr nʉmjã amachdeu ʉkhaba arr gaaimua Ẽwandamau ich aar aubajuuta jaau sim, ich warrgarwe mag ich iek ʉkhabam khʉʉn dʉin ich magta aju arr aawai.

⁹ Pari pãar chan Ẽwandamau mag isegbam. Pãran ich Ẽwandamauchata ich chaain khamkhĩir ich garmua jʉr autarr khʉʉnau. Pãarta phadnaanau aajemjo õor kõit jeeujem khʉʉn khabahab, maach Rey Cristoou sĩi ich atheepai nem waumkhĩir jʉr autarr khʉʉn. Pãarta warr khĩchag eemjo naajerr khʉʉn Ẽwandamau ich iek ʉkhapi athamua araragag obeer autarr khʉʉn khabahab, mag pãach ararag ee obeer autarr Ẽwandam chadcha õor dʉi ajapha khitʉmta jũrr deeum khʉʉnagjã jaaumkhĩir ich õorkha autarr khʉʉn.

¹⁰ Warran chadcha pãran sĩi parhoobam khʉʉnkha thʉnaajim. Pari mag thʉnarr ĩsin ya pãran Ẽwandam õrau. Mag agtha i õor khaba thʉnaawai chan pãrau bʉ̃ʉrjã irua pãach dau aug khaaugjem khaugba naajim; mamʉ ĩsin chadcha pãrau khaphʉ nʉm, Jooirau pãach dau aug khaaugjem.

Ẽwandamaun ich ipierraa amkhĩirta maach ompaajim

¹¹ Keena, Cristo gaaimua khodamnaan, mʉ iek ũrbat: Maachin Ẽwandam dʉita durrkhaimaju khʉʉn aawai, mʉig mʉg jẽb gaai wenʉrrʉm aiguin sĩi dijã chukhu khũchpaim athee chikham durr gaaita wenʉrrʉmjo nʉm. Mag i dʉi naaimaju khʉʉn aawai oob sĩi pãach o khõchagpierr nem waum khõchgau Ẽwandamau khõchkhabam nemta waumiet. Jãgʉm nem wauju khĩirjugan maach burrpieg maach dʉi werbʉ nʉmjota nʉm.

¹² Ẽwandam iek ʉkhabam khʉʉn daarjã nem ajaphata waaujeet. Maagwai amau pãar eugar õor khaigbam khʉʉn eugarmjo iekhawiajã, Ẽwandam beem edjã chadcha pãrau nem ajapha waaujerr khĩirjunaa jũrr amau, “Jãgan chadcha amau nem ajaphata waaujeejiebma” aju.

¹³ Pãrau Cristo khõsinaa i ipierraa aajeewai mʉig eegarjã thum chi thethemnaan thʉnʉm khʉʉn ipierraa abat: Rey thumaam khʉʉn por aawai i ipierraa abat.

¹⁴ Reíu gobernadornaan khapitarr khʉʉnau nem mag aawaijã am ipierraa abat. Makhʉʉnauta õrau nem khaigba aawai pʉrnaa castigaamkhĩir wa õor nem ajapha wau nʉm khʉʉn igwia ajapha iekhamkhĩirta Ẽwandamau mag chi thethemnaankha wai sĩebahab, ichdeu khõsimjo.

¹⁵ Ẽwandamaun pãrau nem waauwaijã nem ajaphata waupim khõsi sim, mag nem wajapha wau nʉm gaaimua i iek khaugbagau sĩi khĩirjug chuk pãach eugar parhooba iekham iigjem khʉʉn warag khĩupaa sĩwaag.

¹⁶ Pãran Ẽwandam ipierraa aagta naawai irua khõsim nemen pãachdeu waum aig wauju aai nʉm; mamʉ mag pãachdeu nem waum aig wauju aai nʉm awi, oob sĩi Ẽwandam khaugbam khʉʉn denjo nem khaigbam wawaagta mag pãachdeu nem waum aig wauju aai nʉm amiet.

¹⁷ Agdaujo dich khapeen thumaam khʉʉn respetaabat. Cristo gaaimua pãach khodnaankha thʉnʉm khʉʉnjã daupii abat. Ẽwandamta thumaam khʉʉn khãaijã okho abat, maimua mʉig eegar ichdeu õor chi porkhapi nʉm khʉʉnjã ĩchab respetaabat.

Jãga aju aai nʉ Cristo gaaimua dau aug waauwai

¹⁸ Ar sĩi chikham chogkha nʉm khʉʉn, pãach patronnaan okhonaa amau nem jaau nʉmta ipierraa abat. Mamʉ mag nʉm chan sĩi pãach dʉi ajaphanaa agpierraa aajem khʉʉn dʉipai khaba, pãach dʉi athuucha aajem khʉʉn dʉijã ich agjo am ipierraa abat.

¹⁹ Ẽwandamau khõsi simjo pãachdeu mag am ipierraa nem wau nʉmta pãach dʉi athuucha nem khaibag aadephʉmjã khĩu jʉm nʉmʉn ʉu sim; magan maach Aai Ẽwandamauta pãar tho iekhaju.

²⁰ Mamʉ nem khaigba wau nʉm gaaimuata pãach gaai mag athuucha wau nʉmjã sĩi khĩu jʉm nʉm paar chan, oob Ẽwandamau pãach tho iekhaju amiet. Magarrau nem ajapha wau nʉm paarta warag pãach dau aug wau nʉmjã khĩu jʉm durrumʉn chadau, chadcha Ẽwandamau pãar tho iekhab khaba tho iekhaju.

²¹ Ich Cristooucha jaauwaijã, ichdeucha ich athee jʉr aumam khʉʉnan ichiita chikhamnau dau aug waub khaba dau aug wauju aajem, ich jãg ichjã maach kõit dau aphʉʉ arrjo. Wajapcharan mag chikhamnau dau aug waauwai jãga aju aai nʉ a khap amkhĩirta maachjo wounag pawi ichta nacha aphʉʉ ajim.

²² Cristo chan bʉ̃ʉrjã pekau wauba ni chikhamnag seukhajã nem jaauba khitajim, mamʉ mag khitarrta chadcha amau i thõojierram.

²³ Mamʉ mag i thõogpamua jũrram khʉʉnau ich khĩir iekha thʉnaawaijã, i iekkhõr chukhu chirʉmta i dʉi mag nʉm awi amach denjojã iekhaba, ni am dakhãujã dakhãuba, sĩi warag Ẽwandam thumaam khʉʉn dʉi nem agcha waaujemʉgta jeeu khitajim, ich dʉi mag nʉm khʉʉn dʉi ichdeuta khap amkhĩir.

²⁴ Maachta maach pekau gaaimua Ẽwandamau khechpʉiju aai naajim; mamʉ mag narrta Cristoouta jũrr maach kõit ʉdʉraa pakuls gaai ich meerphe thõopijim, magbarmua maach ich athee peerdʉ auwi ya tag pekau waujujã khaugba sĩi ich dʉipaita nem agcharam appai wau wenʉrramkhĩir. Magta Cristo dau aphʉʉ õor jua machgau bag kha ʉ̃ʉipa khitajim, maach pekau ee narrta ʉu peerdʉ awaag.

²⁵ Warr Cristo khaugba aajeewain sĩi oveja chaaindam pap chukhu okhoo wenʉrrʉmjota naajim; mamʉ ĩs ya i khaugwi i dʉita naawai, pastorrau ich nemchaain oopaar thʉa wai nʉrraajemjo, ichdeuta maach thʉanaa oopaar wai sim.