1 Pedro 1 - Wounaan Meu

Salud

¹ Mʉʉn Pedroou, Jesucristooucha ich i jaaumkhĩir jʉr autarr. Pãar pãach durr chaaur parhooba aaidʉ durrum khʉʉnag muata pãrag mʉg ẽsap phã deepʉi chirʉm: Ponto anʉm durram khʉʉnag, Galaciapienag, Capadociapienag, Asiapienag maimua Bitiniapienagjã agjo; ajapcharan maach meeun thum maach peerdʉajem iek ʉkha nʉm gaaimua durr chaaur dʉr durrum khʉʉnagma.

² Hermanonaan, õor jua okgau pãar mag chikham durr dʉr durrab mamʉ, pãarjã agjo ich Ẽwandamaucha jʉr autarr khʉʉn khabahab, ichdeu warrgarwe khĩirju wai sĩerrjo chadcha pãar peerdʉ autarr aawai. Magtarr aawai pãarta ich Akharag ich athee khĩet phe aupijim, Jesucristo meewai bag ãrtarrau pãach ajaug paabapäaiwai ich ipierraa wenʉrramkhĩir. Ẽwandamau warag pãar ʉu eeg oonaa khõinaata pãar wai sĩepim khõsi chiraajem.

Jesucristo dʉicha naaimajuuta khĩirjuajem

³ Mua ʉu ajim a chirʉm maach Por Jesucristo Aai Ẽwandamag, ʉu ichdeuta maach dau aug khaugwi maach akhaar dich pekau ee chi khechamjo narrta ʉu peerdʉ auwi ich chaainkha autarr aawai. Mag i chaainkha nʉmʉn, ʉu Jesucristojã deeu phiidʉtarr gaaimuata mag i chaainkha naawai,

⁴ jãg nʉʉ awi ich Ẽwandamau ich sim aar maach phe auju jaau simjo ich dʉi chadcha wai joothʉjujã khaphʉ nʉm. Mam paaukhabaimam chan tag meejã meeba, khaibagjã chukhu, ni jooiraa paajã khaugba ich magta nʉisiju.

⁵ Pãraujã pãach thãrauchata Ẽwandam iek ʉkha naawai irua ich jua theegauta pãar thʉa wai sĩeju, mʉg atag deeu Cristo beewi maach ich aarcha phe arr nʉm ora. Mag pãar phe athaadem edta pãachdeu nem ajapham paarpaju khĩirjuajerrjã thumaa chadcha pãrau wai nʉisiju.

⁶ Maguata pãar pãachdeu ʉkha nʉm iek gaaimua gaai machgau okhĩirjuu aju awiajã maan khũchpaiu. Magwiajã chadcha Ẽwandamau pãach dʉi mag ajapha aju khaphʉ naawaita magʉmjã igba chadcha pãar onee nʉm.

⁷ Mamʉ mag pãar phithurg au nʉmʉn, phĩr chaar khap aag õtdau ee chach oojemjo, pãrau chadcha ich iek thãraucha ʉkha nʉ a khap aagau. Mag phithurg au nʉmjã i isegba ʉu ãwat nʉmʉn, magan maata phĩr chaar khãaijã ʉ̃rcha balee sim, phĩr awiajã mʉg atag chukhu aadeju aawai. Mamʉ mua jaau chirʉmjo mag ãwat nʉmʉn, magan deeu Cristo beem edjã ich Jooirauchata khapanag dakhĩir pãar tho iekhaju, mag ʉu ãwattarr jũrr.

⁸ Pãrau mʉ denjo Jesucristo khĩircha oobajieb mamʉ, pãrau i khõsinaa i iekjã ʉkha nʉm. Maguata atcha oneg nʉm iekhau pod pãrau pãach onegjã jaauju khaugba nʉm, jãga naaimaju khai ya ich dʉicha naaimaawai.

⁹ Mag pãrau pãach daúa i ooba naab mamʉ, jãg i iek ʉkha nʉm chan par khabam. Jãg ich iek ʉkha nʉm gaaimuata ʉu irua pãar peerdʉ aubajieb.

¹⁰ Warrgarwe Aai i jaaumienau jaaujeejim, jãga Ẽwandamau mag õor peerdʉ auju. Mamʉ mag ajap estudiewi dʉrrcha ag iek ig iyʉʉ aajerrjã ich maagwaiwe chan mag amachdeu jaau nʉmjã pod ajappai khaugba aajeejim, jãga Ẽwandamau magju.

¹¹ Mamʉ ich Ẽwandamau ich Akharagta amag nem jaaupiejerr aawai chadcha chi Akharauta mag Cristoou õor peerdʉ awaan beeju nawejã i igwi, “Woun ãb beewi õor ee aphʉʉ abarmuata nem thum podpʉiwi ichta ʉ̃gthar mawia thumaam khʉʉn khãai chi jua thierrkha sĩsiju” a jaaujeejim amag. Amachdeu mag ũrbaawai warag ajapchata khaphʉ am iigjeejim, chijãg wounchata mag beeju a jaau sĩ maimua mag pierrwaijã jãagwaichata barcheju a khap aag.

¹² Mamʉ mag nʉm ee ich Ẽwandamau amag khaphʉ apiejeejim ĩchab, mag amau woun beeju jaau nʉmjã amach daúa oobaju; ajapcharan maach ĩs ewagam khʉʉn athee beejuuta mag jaaujeejim. Maagjerr aawai ĩs maach peerdʉajem iek jaau nʉm khʉʉnaujã, ich ag Ẽwandam Akharauta maachig jaaupibaawai, ich mag woun beeju jaaujerr iekta maraujã jaau wenʉrrabahab. Ĩsin mag õor peerdʉ aaujem iek maadeu khaphʉ nʉm ee, Ẽwandam chognaan angelnaanaujã agtha khaugba naawai, amau khaugam khõchaaga aajem, jãga mag Ẽwandamau õor peerdʉ aaujẽ.

Ẽwandamau khõsi simjota wenʉrraju aai nʉm

¹³ Maach Por Jesucristo mag chi jua thierr aawaita muan pãragan, ichdeu pãachig nem mag aawai i ipierraa aagta khĩir khaug nʉisit a chirʉm, ichdeu pãach jʉraan beem ed Ẽwandamau pãach dʉi ajapha aju khĩirjugjã ogdʉba, ni Ẽwandamau waupiba aajem nemjã wauju khĩirjuba.

¹⁴ Ya pãar Ẽwandam ipierraa aagta i chaainkha naawai oob ʉdʉʉr warrgar pãachdeu i khaugju nawe nem khaigbam waaujerragta deeu pãach gaai ʉ̃rpapimiet.

¹⁵ Magju khãai maach Por Jesucristo gaaimua maach peerdʉ autarr Jooijã pekau chukhu sĩerraawai pãarjã pekau wauba pãach wenʉrrʉmpierr ãba i atheepaita nem waubat.

¹⁶ Khĩir eyaa abat, Ẽwandamau ich iek gaai, “Mʉjã pekau chukhu chitaawai pãarjã mʉjo pekau chukhu abat” a sim. (Lv. 11:44-45)

¹⁷ Khaphʉ abat agjo, Ẽwandamaun mʉig eegar amachdeu nem waaujerrjota aju thumaam khʉʉn dʉi. Mag simʉgta pãrau Aai iche naawai mʉig eegarmua ʉ̃gthar wetju khĩirju durruwe i dau na nem khaigbam wauju okho abat.

¹⁸ Warran chadcha pãrau pãach jooin i maadeu igba simʉgta ʉ̃rcha ee aajeejim, pãach dennaanau pãachig jaau bãautarrjo. Pari maagjerr ya ĩs Ẽwandamauta ich athee pãar peerdʉ atham. Pãrau khaphʉ nʉm, mag pãar peerdʉ awaag, phĩriujã phagba ni phatkhonaujã phagbajim, jãgʉm nem ãrb khaba ãarjeewai.

¹⁹ Jãgʉm nemeu phagju khãai, ich jãg warrgar Ẽwandamau õrag corderodam chi ajapcharamta jʉrwia ichig ofrendakha thõonaa deepiejerrjo, jũrr ich Iewaa Cristo bʉ̃ʉrjã pekau chukhu khitʉmta maach kõit thõopijim. Mag i thõopitarran i bag phĩr dʉi phatkhon khãaijã ajapcha sim ãrbarmuata maach khaibag eemua ober awaag ajim.

²⁰ Mag Cristo õor kõit thõopijujã ich Jooirau mʉg jẽb ompaaju nawe ya khĩirju wai sĩejim. Magtarr aawai pãar dau aug khaugwi ĩs mʉg jaarta chadcha pãrag ich khaugpibarm.

²¹ Ich mag Cristo khurauta ʉu pãrau Ẽwandam iek ʉkha durrum. Mag Cristo thõowaijã, ich Ẽwandamauta ʉu i phiriu auwi, ich aar auwi, ich dʉi jua theeg ãba apijim. Maguata chadcha pãrau pãach thãraucha i iek ʉkha durrum, ich jãg Ẽwandamau Cristojã phiriu auwi ich aar autarrjo pãachjã agjo ich aar auju khaphʉ naawai.

²² Mag nʉm dʉi ĩs maach peerdʉajem iek chaar Cristoou jaau sim pãachdeu ʉkha nʉm gaaimua, ya pãar irua ajaug paabapʉim, pãach wir aigjã agdaujo dich khapeen dʉi daupii wenʉrramkhĩir. Ya mag i jua ajaug paapʉitarr khʉʉn aawai par iiupai khaba thãrauchata pãach khapeen daupii abat, dich khapeen eugar parhooba khĩirjuba.

²³ Magaag ya pãar warr pãach naajerrjo khaba nʉm, mag Cristo iek ʉkhawi ajaug paapʉitarr gaaimua eeu thaaba nʉmjo pekau chukhu i chaainkha naawai. Mamʉ mag pãar deeu thaabatarr chan pãach ãd bi eemua khaba, ich Ẽwandamau ich iek ʉkhapi athamuata mag eeu thaababarmjo apijim. Ajapcharan i iekhauta maach ʉ̃gthar oberpiejem. Mag iek chan bʉ̃ʉrjã chugpaa khaugba ich magta sĩerrʉm.

²⁴ Maguata ich iek phã sim gaaijã ich iek ich mag chugpaa khaugba sĩerrʉm igwi magjim: “Sĩi ich mag eumee wenʉrraag khaba aawai mʉig eegarin õran sĩi pabʉ kher khukhuur thʉnaawi khʉibaadeejemjota nʉm. Par amau wir aig amach thoo aawaijã sĩi mag pabʉ khũchpai maar bau thʉnaawi deeu khiugphe khʉibaademjota aajem, ya meebaadeewai.

²⁵ Magarrau mʉ iekhan chadpama, bʉ̃ʉrjã chugpaa khaugba ich magta sĩerrʉm” ajim maach Por Ẽwandamau. (Is. 40:6-8) Mag iekta maach peerdʉajem iekhau. Ich mag iekta pãragjã jaaubajieb.