1 Juan 5 - Wounaan Meu

Jesús iek ʉkhaawain dich garmuata khaibag thum podpäaijem

¹ Jesuun chadcha Ẽwandamau ich Iewaa ichdeucha pʉitarr aawaita i dʉi ãba sim awia au sim wounan magan ya Ẽwandam chaairau. Magbarm aig agjo tagam khʉʉn Ẽwandam chaainkha nʉm khʉʉnaujã agjo i khõsi aju aai nʉm. ¿Jãgwi? Chi Aaijã khõsi naawaima; pod chi Aai appai daupiinaa chi chaain khõchkhaba aju aai khaba nʉm.

² ¿Jãga mag maadeu i chaainkha nʉm khʉʉnjã khõsi nʉm khap abarju? Chadcha ich Ẽwandamjã daupii naawai irua nem jaau sim ipierraa nem waauwaima. Mag i ipierraa wenʉrrʉmʉn, i chaainjã daupii wai wenʉrraju.

³ Chadcha Ẽwandam daupii nʉm anʉmʉn irua nem jaau sim thum i ipierraa nʉmʉu; mag irua maachig waupi jaau sim nem chan maadeu podbaju ayaam nem khabam.

⁴ Thum maach chi Ẽwandam chaainkha nʉm khʉʉnau chan pekaúg ʉdʉʉr dich deeba aajem, dich garmuata podpʉpʉi aajeewai.

⁵ Mag maadeu magʉm pekau pod nʉmʉn, Jesús Ẽwandam Iewaa ich Ẽwandam dʉi ãba sĩerrʉm iek ʉkha wenʉrrʉm gaaimuata mag podpäaijem.

Ẽwandamau ich Chaai khaugpitarr

⁶ ¿Pari jãga mag Jesús Ẽwandam Iewaakha sim maadeu khaphʉ nʉ? Jesús por choo nʉm aig ich Ẽwandamaucha ʉ̃gtharmua jaauwia pakuls gaai ya meemaa aawaijã agjo jaautarr aawaima. Mag nʉm dʉi ich Ẽwandam Akhaar chadcha nem jaaujemuajã khaphʉ apiejem, Jesús chadcha Ẽwandam Iewaakha sim.

^7-8 Aragan biek numí ich Chaai iche sim õrag ich iekcha ũrpijim ʉ̃gtharmua: i por choo naawai maimua ya thõopʉyaag pakuls gaai i wai naawaijã agjo ũrpijim. Maimua ĩs ewag pawiajã ich ag iekpaita Ẽwandam Akhaar maach thãar ee simuajã khaphʉ apiejem, í chadcha Ẽwandam Iewaakha sim.

⁹ Mʉig eegarm khʉʉnaujã maachig nem mag aawai maadeu ʉkhaajeewai ich Ẽwandamaucha Jesús igwia ich Chaai a jaau sim chará wajapcha ʉkhaju aai nʉm, ichdeuchata mag jaau sĩewai.

¹⁰ Chadcha chi Ẽwandam Iewaa iekta ʉkha simuan ich thãar ee khaphʉ sĩsim, chadam iekta ichdeu ʉkhabarm. Mamʉ mag Jesús igwia ich Ẽwandamaucha i Iewaa a jaau simjã ʉkhaba simuan warag ich Ẽwandamta seunemeg phe sim, irua jaau sim ʉkhabam gaaimua.

¹¹ Mag irua maachig jaau sim iekhan, maach ich denkha auwia ich mag ich dʉi wenʉrrapijuuta jaau sim; pari mag i denkhanaa i dʉi ich mag wenʉrrajuun, ãba ich Ẽwandam Iewaa gaaimuapaiu.

¹² Magua chi Ẽwandam Iewaata ich thãar ee au simʉn ĩchab warreta iiu sĩsiejem, i dʉi ich mag i denkha nʉrraag. Pari chi Ẽwandam Iewaata auba sim chan agtha i den khaba sim, i dʉi ich mag iiu nʉrraag. Magʉm khʉʉn pod i dʉi ich mag nʉrrabam.

Juanau ãbmiecha õor wawitarr

¹³ Keena, pãar Ẽwandam Iewaa iek ʉkhaajem khʉʉnagta mʉg ẽsap phã deepʉi chirʉm, ya pãar i denkha naawai chadcha pãach i dʉi ich mag wenʉrraju khap amkhĩir.

¹⁴ Maadeu khaphʉ nʉm ĩchab, ich Ẽwandamau khõsi simjo maadeu irig jeeuwain irua maach iek ũrb khaba ũurjem.

¹⁵ Mag ichig jeeuwai maach iek ũurjem khaphʉ naawai mag jeeubarmjã ya wai nʉmjota khĩirjuju aai nʉm, chadcha irua deeb khaba deeju aawai.

¹⁶ Ãbmua khãijã dich khaperau pekau wau sim oomʉn, i kõit Ẽwandamag jeeuju aai sim; majã juau ogthom khĩmie durr ich barpʉimkhĩirjo Cristo ichaaur nem jaau nʉrraba sim khai mamʉ. Mag i kõit jeeumʉn, Ẽwandamau iiupi auwia ich denkha auju, ich mag ich dʉi wai nʉrraag. Ẽwandamau podba aawai khabam, pari pogkha õrau pekau wau nʉm irua chugpaaba aajem, mag amach barpʉimkhĩirjo Cristo iek khaphʉ nʉmta juau ogthom i ichaaur nem jaau wenʉrraawai. Magʉm pekauta wau nʉm kõit chan mua pãrau jeeuju aai nʉm aba chirʉm. Magʉm paran pãrau parta jeeuju, ichiita Ẽwandamau isegju aawai.

¹⁷ Nem khaigbam thum pekaukha ober sim, pari magʉm Ẽwandamau chugpaabapäaiwai khĩmie durr maju arrjã maba aajem.

¹⁸ Maadeu khaphʉ nʉm, Ẽwandamta ich Aaikha wai sim woun chan ich mag ich pekau ee nʉrraba aajem, ich Ẽwandam Iewaauchata i thʉa wai sĩewai. Magua dosãtaujã pod pekau ee thʉ aum iek i thʉ auba aajem.

¹⁹ Maadeu khaphʉ nʉm, maach chadcha Ẽwandam denkha nʉm; pari khaphʉ nʉm ĩchab, mʉg jẽb gaai õor pom sĩi dosãtauta ich jua eegar phe wai sim.

²⁰ Maadeu khaphʉ nʉm ĩchab, Ẽwandam Iewaa maach ee beewiata maachig khĩirjug deechejim, Ẽwandam chaarta wajapcha khap amkhĩir. Mag gaaimuata maachin chadcha ich Ẽwandam chaar dʉita wenʉrrʉm, pari wajapcharan chi Iewaa Jesucristo dʉijã agjo naawai mamʉ. Mag Cristota Ẽwandam chaar anaa maach ich mag iiupiejemʉu.

²¹ Chaaina, ãbmiecha pãrag jaaukhim: Jãg Ẽwandam iek jaau nʉm anʉmjã Ẽwandam iek chaar khabamʉgta ee apiju ẽkhaajem khʉʉn dʉi khĩir khaphʉ abat. Magdam ajim pãrag jaaum ig chirarr. Ayoo keena, Juan