1 Juan 4 - Wounaan Meu

Jãga khaphʉ aju õor chadcha Ẽwandam igar nʉmua nem jaau nʉm

¹ Keena Cristo gaaimua khodamnaan, ĩsin õor seunemkham khʉʉn neeme thʉnʉm; mag seukha wenʉrrʉmta amach iiupain Ẽwandamau jaaupitarr iekta jaau wenʉrrʉm aajem, sĩi magʉm gaaimua õor khũguraag. Oob jãg parhooba nem jaau nʉmta Ẽwandamau jaaupitarr iekta jaau wenʉrrʉm aajem khʉʉn iek ʉkhamiet. Amau jaau nʉm khap aag, ʉkhaju nawe ajapha khĩirjubat, chadcha Ẽwandam Akhaar chaar amach ee wai naawaita mag iekha nʉ wa sĩi dosãtauta mag iekhapi sĩ.

² Ẽwandam Akharauta mag iekhapi sim khap aag mʉgta abat: Pãachdeu ũurwai Jesucristoon chadcha ich Ẽwandam Iewaa chaarta parhoobam chaaidamjo thaabachewia sĩi ich mʉg wounkhata õor ee nʉrrajim a jaaumʉn, magan chadcha Ẽwandam Akharau jaaupitarr iekta jaau wenʉrrʉm.

³ Pari ar Jesús chan mag khábata beejim a jaau nʉm khʉʉnau chan Ẽwandam Akhaar charau jaaupi simjo jaaubata nʉm. Chi mag seukha nem jaau wenʉrrʉm khʉʉnaun Cristo oomaphanaa i igar khábata nem jaau nʉm. ¿Pãrau ũrba aajẽ mag anticristo beeju anʉm? Magtarr aawai jãg seukha nem jaau wenʉrrʉm khʉʉnaun i beeju nawe ya i iekta jaau wenʉrrabahab.

⁴ Keena, pãar chadcha Ẽwandam chaain aawai i Akhaar chaar sĩi dosãt mʉg jẽb gaai sĩejem khãaijã jua theeg ʉ̃rpai sĩerrʉmta wai nʉm; magua jãg seukha nem jaau nʉrrjeem khʉʉnagjã ʉu ʉdʉraa pãach khũgurpibajierram.

⁵ Jãg chi seukha nem jaaujem khʉʉnaun sĩi mʉig eegarm khʉʉn khĩirjugpaita jaau naawai Cristo ichaaurta jaau nʉm. Magua õrau am iek ũrm khõsi ũurjerram, amach khapeen iek aawai.

⁶ Pari maach agjo mʉig eegarm khʉʉnkha nʉmta jũrr Ẽwandam denkha nʉm. Maagwai chi Ẽwandam amach thãar ee wai nʉm khʉʉnaupaita maach iek ũrm khõsi ũurjerram. Pari Ẽwandam den khabam khʉʉnau chan bʉ̃ʉrjã maachdeu jaau nʉm iek ũrmapha aajem. Maguata ãbmua khãijã Ẽwandam iekta jaau nʉrrʉm anʉmta maadeu jaau nʉm ũrmapha simʉn magan maig merag chukhu sim, chadam iek jaauba sĩi chikham khũguraagta mag nʉrrʉm.

Ẽwandamau thumaam khʉʉn daupii aajem

⁷ Keena Cristo gaaimua khodamnaan, Ẽwandamau ich garmuata maach khõsi sĩewai maadeujã agdaujota jũrr dich khapeen kha khõsi aju aai nʉm. Thum ar agdaujo dich khapeen kha khõsi aajem khʉʉnan Ẽwandam chaainkhanaa ich Ẽwandam khĩirjugjã khaphʉ paaukhamam, ichdeu õor khõsi simjota amaujã khõsi naawai.

⁸ Mamʉ ar amach khapeenjã kha khõchkhaba nʉm khʉʉn chan warrcha amachdeu Ẽwandam amach thãar ee aujim anʉm edjã chadcha thãraucha ʉkhawia auba arr aawaita mag nʉm. Magba akhiin amau amach khapeen daupii aajeekham, ich jãg Ẽwandamaujã thumaam khʉʉn daupii aajemjo.

⁹ Mag ichdeu maach daupii sim khap apiegta Ẽwandamau ich Chaai ãbpai khitʉm mʉg jẽb gaai pʉijim, mag pʉiwia meebarmua maach ich denkha auwia ich mag ich dʉi wai nʉrraag.

¹⁰ Mag Ẽwandamau maach khõsi sim chan mag maachdeuta nacha maach garmua i khõchkhatarr aawai khaba, ich garmuata maach daupigau ich Chaai pʉijim, maach kõit ʉdʉraa ich thõopimkhĩir, mag ich thõopibarmua maach khaibag chugpaapʉyaag.

¹¹ Ẽwandamau mag maach khõsi aajeewai maachdeujã agjota jũrr dich khapeen kha khõsi aju keena.

¹² Mamʉ ¿jãga Ẽwandam maach dʉi sim õrau khaphʉ nʉ? Chadcha dau daau chan maadeu Ẽwandam ooba aajem; pari maadeu agdaujo dich khapeen kha khõsita wenʉrrʉmʉn, magan chadcha ich Ẽwandamauta amag dau daau ich oopi simjo sim, mag dich khapeen kha khõsi nʉm gaaimua. Wajapcharan mag nʉm aigta Ẽwandam maach dʉi sim, agtha ichdeu õor khõsi sim amag khap amkhĩir.

¹³ Mag maach Ẽwandam dʉi khapeerkha nʉm anʉmjã khaphʉ nʉmʉn, ich Ẽwandamau maach dʉi mag khapeerkham khõchgau ich garmua ich Akhaar maachig deetarr aawaiu.

¹⁴ Mag nʉm dʉi ĩchab chi Ayau ich Iewaag õor peerdʉ aumkhĩir pʉitarrjã marau maach daúacha ootarr aawaita mag khaphʉ jaau nʉm, chadcha Ẽwandam maach dʉi khapeerkhaju aai sim õrag khap amkhĩir.

¹⁵ Maadeuta Jesuun chadcha Ẽwandam Iewaa aawai ich dʉi ãba sim awia i aumʉn, magan maachin Ẽwandam dʉita khapeerkham iek khapeerkha nʉm.

¹⁶ Mag Ẽwandam maach dʉi sĩewaita maadeu khaphʉ nʉm, chadcha irua maach khõsi sim. Ẽwandamau thumaam khʉʉn daupii aajemjota dich khapeenjã daupii simʉn, magan Ẽwandam dʉi khapeerkha sĩewaita mag ich khapeen daupii sim.

¹⁷ Mag maach khõsi sim khaphʉ naawaita warag maach garmuajã ʉ̃rcha maadeu i khõsi nʉm. Mag, õor i agkha nʉm edjã i ogkhaba naaju, mʉig eegar nʉwejã Ẽwandamau ich Iewaa khõsi aajemjo maachjã irua khõsi sim khaphʉ naawai.

¹⁸ Ẽwandamau chadcha maach khõsi sim maadeu khaphʉ nʉm aig i ogkhaba aajem; magju khãai dich khõsi sim khaphʉ naawai bʉ̃ʉrjã dich dʉi khaigbajujã khĩirjubaju. Maadeu i ogkha nʉmʉn, magan dich khaibag khãijã wauju khĩirjuwiau. Magua, Ẽwandamau õor i agkham ed maachjã irua khaigba aju khĩirju nʉmʉn, magan agtha wajapcha maach khõsi sim khaugba naawaita mag khĩirju nʉm.

¹⁹ Ich garmuata nacha maach khõchkhatarr aawai ĩsin maachdeujã maadeu i khõsi nʉm.

²⁰ Ãbmua khãijã, “Mua Ẽwandam khõsi chitʉm” a sim; pari mag simta dich khapeenjã kha khõchkhaba simʉn, magan maan sĩi seukhaawaita mag iekha sim. Chi mag iekha simua ich khapeen dʉi khĩircha oo simta mag kha khõchkhaba sim khai, jãga mag Ẽwandam ichdeu bʉ̃ʉrjã ooba aajemta irua khõsi abarju.

²¹ Jesucristoou maachig jaau pʉatarr maadeu khaphʉ nʉm. Mag irua jaau pʉarran mʉgau: “Pua chadcha Ẽwandam khõsi sim khai, magan pʉch khapeenjã ich agjo kha khõsi abá,” a sim.