1 Juan 3 - Wounaan Meu

Ẽwandam chaainkha nʉm khʉʉn jãga nʉ

¹ Keena pãade khĩirjubat jãga Ẽwandamau maach khõsi sĩ: mag ich garmua maach khõsi sĩewai irua maachig ich chaain a thʉ̃rju aai sim, maach chadcha ich chaain aawai. Sĩi ar parhooba i iek ʉkhaba nʉm khʉʉnau chan ich Ẽwandam Iewaa mʉg jẽb gaai sĩethuurwaijã pod i khaug auba arr aawaita ĩs mʉg maach Ẽwandamau ich chaainkha wai simjã pod khaugba nʉm, jãga awia mag nʉ.

² Cristo gaaimua khodamnaan, ya maachin chadchata Ẽwandam chaainau. Mʉʉgwaiwe chan maadeu khaugba nʉm, jãga nʉisiju khai mʉg atag pawiajã; ãba maadeu khaphʉmjo nʉmʉn, Cristo dʉnʉʉubaichem ed maach ichjo aphobaadejupaita khaphʉ nʉm, ya mag edan dau daau khĩirchata i oophobaadeju aawai.

³ Pari thum mag amach daúacha i ooju khĩirju nʉm khʉʉnan mʉʉgwaiweta wajapha naaju ẽkhaajem, ich jãg Jesucristojã khaibag chukhu wajaphata sĩerrʉmjo.

⁴ Ẽwandamau oowai nem khaigbam thum pekau aawai thum ar nem khaigbamta waaujem khʉʉnan pekauta wau nʉm.

⁵ Pãrau khaphʉ nʉm, Jesucristo mʉg jẽb gaai beewai mʉig eegarm khʉʉn pekau chugpaaju jʉraanta beejim, ichjo pekau chukhu paapʉimaag. Maadeu khaphʉ nʉm, í bʉ̃ʉrjã pekau chukhu khitʉm.

⁶ Magua ar i dʉita ich mag khapeerkha wenʉrrʉm khʉʉn chan ich mag pekau ee wenʉrraba aajem. Pari magba ar agtha amach pekau eeta ich mag wenʉrraajem khʉʉnaun bʉ̃ʉrjã i khaugba naawaita mag wenʉrraajem.

⁷ Chaaina, ni iwiir ãbamʉgjã ʉdʉraa pãach khũgurpimiet: Õor wajapham khʉʉnaun nem agchata waaujem, ich Cristojã woun wajapham aawai;

⁸ pari magba ar pekauta wau nʉm khʉʉnan mepeer den aawaita mag nʉm, ich chi mepeerjã ich warrgarwe ich mag pekau wau sĩerraawai. Wajapcharan ich Ẽwandam Iewaa mʉg jẽb gaai beetarran, mag meperau õor khũgur wai simua pekau ee preso phe wai sĩerrjo narr khʉʉn i jua chaaur weeukhapʉyaanta beejim, tag meperagta maach ʉ̃rpai apimaaugau.

⁹ Chadcha Ẽwandam Akhaar atham gaaimua ũwaai thaabatarrjo aadem chan tag ich mag ich pekau eepai nʉrraba aajem, ya ich Ẽwandamau deebarm khĩirjugta wai sĩewai. Wajapcharan mag Ẽwandam chaaikha sim aawaita ya tag ich pekau ee nʉrraba aajem.

¹⁰ Ar nem wajapham wauba ni dich khapeenjã kha khõchkhaba sim chan Ẽwandam den khaba sim. Mag gaaimua ĩchab khaphʉ aajem, chijã khʉʉnta Ẽwandam chaainá maimua chijã khʉʉnta mepeer chaainá.

Agdaujo dich khapeen kha khõsi nʉm

¹¹ Keena, warrcha pãrag maach Por Jesucristo iek jaauwai pãrau ũrtarran agdaujo dich khapeen kha khõsita api jaaujim; ma ajim pãrau nacha ũrtarr iek.

¹² Magua maach chan pod Caínjo khaibag aju khaba nʉm. Cainau mepeer igarta sĩerr aawai ich eeum thõopʉijim. ¿Khan jãgwi irua mag ich eeum thõojĩ? Ichdeu nem khaigba wau sim daar ich eeumua ich khãai nem wajapha wau sim Ẽwandamaujã wajapha oo sĩerr gaaimuama.

¹³ Cristo gaaimua khodamnaan, jãg Cainau ich eeum oomapha arrjo Ẽwandam iek ʉkhaba nʉm khʉʉnau jũrr pãachdeu ʉkha durrum gaaimua pãach oomapha aawai, oob magʉm gaaimua warag, “¿Jãgwia jãg maach oomapha nʉ?” amiet.

¹⁴ Mag khãai warag dich khapeenta kha khõsi abat, ich Cristoou jaautarrjo. Dich khapeenta kha khõsi amʉn, maadeu khaphʉ nʉm, chadcha chi okhoomkha narrta ich dʉi wenʉrramkhĩir ich denkha wai sim, Cristoou. Maimua khaphʉ nʉm ĩchab agjo ar dich khapeen kha khõchkhaba simʉn, maan agtha okhoo nʉrrʉm gaaimua Cristo den khaba sĩewaiu.

¹⁵ Ar Cristo gaaimua dich khodkha kherʉmta kha isee simʉn magan maguan õor thõojemua khĩirjuajem dʉi ãbata khĩirju sim. Pãrau khaphʉ nʉm, õor thõojem khʉʉnau chan ãbmuajã Ẽwandam ich thãar ee chukhu sim.

¹⁶ Jesucristoou maach kõit ich thõopitarr gaaimuata maadeu khaphʉ nʉm, khan agá dich khapeen kha khõchag. Mag maach daupigau ich thõopitarr aawaita maachdeujã agjo Cristo gaaimua dich khodkha durrum khʉʉn kõit am daupigau dich thõopiju akhiinjã agjo ʉdʉraa dich thõopiju aai nʉm.

¹⁷ Pari ãb phatkhon paraa simua khãijã Ẽwandam iek ʉkha sim a simta ich khapeenau nemdam ig nʉm khaphʉ simjã oobamjoo sim, jãga mag wounau Ẽwandam thumaam khʉʉn daupii khitʉmta ich thãar ee wai chiraawai iruajã agjo õor daupii chirʉm abarju.

¹⁸ Chaaina, maadeu sĩi dich khapeenag par iiupaita “Muan pʉ khõsi chirʉm” aju khaba nʉm; mag khãai chadcha am athee nem wajapha wau nʉmuata amag khaphʉ apiju aai nʉm, maadeu chadcha am khõsi nʉm.

Jãga khaphʉ aju aai nʉ maach Ẽwandam denkha nʉm

¹⁹ Mag dich khapeen thumaa kha khõsi wenʉrrʉmʉn chadau maadeu khaphʉ nʉm, maach Ẽwandam iek chaarta ʉkha naawai i igar nʉm; mag nʉm aiguin chadau ʉkhaa chaarta ʉkha nʉm aju aai nʉm.

²⁰ Mag ʉkhaa chaar ʉkha nʉmta nem khaigba waauwaijã maach khĩirjugaupai maachig jajaaukhamjo akhiinjã, maach khĩirjug khãaijã ʉ̃rpai sim wai nʉm: ma Ẽwandamau. Iruata nem thum khaphʉ aajeewai maadeu i dau na nem agcha wauju ẽkha nʉmjã irua khaphʉ sim.

²¹ Khodamnaan, pari maach nem khaigba wauba naawai maach khĩirjugjã khõinaa simʉn, magan Ẽwandamag jeeuwaijã maadeu inag chukhuta irig jeeuju aai nʉm.

²² Magta irig jeeu nʉmʉn, maadeu ichig jeeubarm thum irua maachig deeju, ichdeu oowai maadeu i ipierraanaa irua nem khõsimpaita wau naawai.

²³ Irua maachig waupi jaau simʉn ãba ich Iewaa iekta ʉkhapi simʉu; mag nʉm dʉi ĩchab ich Jesucristoou waupi jaautarrjo agdaujota dich khapeen kha khõsi api sim.

²⁴ Ar mag i ipierraa wenʉrrʉm khʉʉnta i khapeenau, maagwai ichjã jũrr am khaperau. Mag chadcha ich Akhaar maachig deetarr gaaimua maadeu khaphʉ nʉm, chadcha í maach dʉi sim.