1 Juan 2 - Wounaan Meu

Cristoou maach kõit iekhaajem

¹ Keena, pãar thum mua mʉch chaainjo daupii wai chitaawai pãrag khap amkhĩir mʉg ẽsap gaai mʉgta jaaupʉi chirʉm, mag khaphʉ aphobaadeewai pekau waum ugua. Pari mʉg jaaupʉi chirʉm ãba, ãb khãijã pekau ee burrmʉn maach abogado wai nʉm, Ẽwandam chi Aai dʉi maach kõit iekhaajem; ma Jesucristoou. Irua õor dʉi agpierraa ichdeu khap nem waaujeewai maach dʉijã agjo aju.

² Jesucristota maach pekau kõit ʉdʉraa ich thõopijim, mag ich thõopibarmua maach pekau appaijã khaba thum ich iek ʉkha nʉm khʉʉn denpa Ẽwandamau chugpaapʉimamkhĩir.

³ Maachta Ẽwandamau nem jaau sim ipierraa nʉmʉn magan chadcha maadeu khaphʉ nʉm, ya maach i denkha nʉm.

⁴ Pari ãbmua khãijã “Mʉʉn i deneu” a sim, pari mag simta bʉ̃ʉrjã irua nem jaau sim ipierraa khaba simʉn magan sĩi seunemgau ich iiupaita mag i den a nʉrrʉm; magan maguajã agtha chadam iek khaugbata sim.

⁵ Pari jũrr maach i ipierraa nʉm khʉʉnaun chadau chadcha wajapchata i khõsi nʉm. Mag i khõsi nʉm gaaimua maadeu khaphʉ nʉm, chadchata i denkha nʉm.

⁶ Iin Ẽwandam den aawai i dʉi chirʉm a sim wounan chadcha mʉg jẽb gaai aawai ich Cristo nʉrraajerrjota nʉrraju aai sim.

Iek Iiur

⁷ Cristo gaaimua khodamnaan, cha mua pãrag jãga aju aai nʉ a jaaupʉi chirʉm chan iek iiurcha khabam. Mʉg iekhan ar nawe pãachdeu warrcha Jesucristo iek ʉkha phobaadewe ũrtarr iekpaiu; wajapcharan dich khapeen kha khõsi api jaau sim iekma.

⁸ Mag nawe pãachdeu ũrtarr ab mamʉ mua mʉg phã chirʉmʉn, ya tag warrgar pãach khĩchag ee naajerr khʉʉn khaba ararag chaar eeta ich Cristo dʉicha naawai, ichiita pãar atheyan chi iiurkha sim. Magua ich Jesuu ich khapeen daupii aajerrjo pãraujã agjo pãach khapeen daupii wai nʉm.

⁹ Ãbmua khãijã Cristo dʉi sĩewai ararag ee sim a sim, pari mag simta Cristo gaaimua ich khodkha simjã oomapha sim chan magan maan agtha khĩchag ee sĩewaita mag sim, bʉ̃ʉrjã maach peerdʉajem iek khaugba.

¹⁰ Magarrau ar chadcha Cristo gaaimua ich khodkha thʉnʉm khʉʉn thum daupii wai sim wounan chadcha ararag eeta khajapha nʉrrʉmjo sim, bʉ̃ʉrjã khaibag waujujã khĩirjuba.

¹¹ Pari magba ar Cristo gaaimua dich khodkha kherʉmjã oomapha wai simʉn agtha ich mag khĩchag eeta simjo sim; ich mag sim gaaimuata dau khĩsumjo nʉrraawai pekaúa ich eudʉ arrumjo simjã khaugba sim.

¹² Keena, ar ewaa Ẽwandam iek ʉkha nʉm gaaimua agtha chaainjo khitheem khʉʉn, Ẽwandamau Jesucristo gaaimua ya pãach pekau perdonaabarm pãrau khaphʉ naawaita mʉg ẽsap pãrag phã deepʉi chirʉm.

¹³ Keena, pãachdeu Ẽwandam iek ʉkhatarr gaai ubʉ nʉm gaaimua ya chi jooinkha nʉm khʉʉnjã agjo warrgar nem thum ompaawaiwe sĩerr ag Ẽwandampaita pãrau khaphʉ naawai pãragjã mʉg ẽsap phã deepʉi chirʉm. Maimua pãar ar Ẽwandam iek ʉkhatarr agtha dʉrrʉʉcha khaba nʉm gaaimua sĩi ewaa jooinpagkhamam khʉʉnjo nʉm khʉʉn, pãraujã ya agjo chi dajãumie nem khaibag sĩerrʉm pãach garmua podpʉiwi nʉm aawaita pãragjã agjo mʉg ẽsap phã deepʉi chirʉm.

¹⁴ Deeu ũwaai pãrag jaaukhim: Agtha chaainjo khitheem khʉʉn, ya pãrau Ẽwandam pãach Aaikha simjã khaphʉ naawai, pãrag mʉg ẽsap phã deepʉi chirʉm. Jooinaan, warr nem thum ompaawaiwe sĩerr ich ag Ẽwandampaita khaphʉ naawai pãragjã mʉg ẽsap phã deepʉi chirʉm. Ẽwannaan, pãraujã pãachdeu Ẽwandam iek ʉkhatarr gaai ubʉnaa pãach thãar eecha wai wenʉrrʉmua ĩchab chi dajãumieu nem khaigbam waupiejemjã pãach garmua podpʉiwi naawai pãragjã agjo mʉg ẽsap phã deepʉi chirʉm.

¹⁵ Magua ya chi jooinag awiajã pãrag mag chirʉm: oob pãrau sĩi mʉg jẽb gaai parhoobam khʉʉnau amach khõchagpierr nem waaujemʉgta ee amiet. Ãbmua khãijã magʉm nem waujuuta ʉ̃rcha khĩirju sim khai, magan magua chan jũrr Ẽwandamta khõchkhaba sim.

¹⁶ Mʉig eegar jãg dichdeu nem khõchagpierrta nem waum khõchkhabaadep aajem khĩirjug, wa nem dich dawagaa oowaijã dich denkhapim khõsim khĩirjug maimua ar phatkhondam paraam khʉʉnjã ãba aata thobaadep aajem khĩirjug chan ich Ẽwandamauta dee sim khaba sĩi ich mʉig eegarm khĩirjugpaiu.

¹⁷ Pari mʉg jẽb gaai jãg õor pekau waupieg nem khaigbam pom thʉnʉmʉn mʉg durr om ed thum dʉi chugpaju; pari magba jũrr ar Ẽwandamau khõsim nempaita waaujem khʉʉnan chad ich Ẽwandam dʉita ich mag nʉisiju.

Seu paraam khʉʉn maimua seu chukhum khʉʉn

¹⁸ Chaaina, mʉg durran ya ich eegar paju ora pabaadem. ¿Pãrau ũrba aajẽ, anticristo beeju anʉm? Ya mʉʉgwaiwejã maach Cristo chaar oomaphanaa i igar khaba iekhaajem khʉʉn thʉnʉm, anticristonaan aajem khʉʉn. Õor seukha jãg nʉrrjeem gaaimua ya maadeu khaphʉ nʉm, chadchata ya mʉg durr eegar paimʉʉ sim.

¹⁹ Pari jãg nʉrrjeem khʉʉnan maach eem arr khʉʉnpaita ĩs jãg Cristo igar khaba iekha nʉrrjeem; mag maach eem khʉʉn ajieb mamʉ, am chadcha maachjo Cristo den khabajierram. Am chadcha maachjo Cristo den arr akhiin agtha maach dʉi ogdʉba wenʉrrakham. Pari juaujo ich Ẽwandamau jãgpi simʉn, jãan maach ee maach khapeen anʉm khʉʉnjã chadcha Cristo den chaar khaba nʉmta jãg nʉrrjeemjã merag chukhu khap amkhĩrau.

²⁰ Pari pãragjã Cristoou ich Ẽwandam Akhaar chaar deetarr wai naawai mua khaphʉ chirʉm pãrau jãgbaju. Mag pãrau chadam iek khaphʉ naawai jãg warm khʉʉn denjo i ichaaur abaju.

²¹ Magua mua pãrag mʉg ẽsap phã deepʉi chirʉm chan mag pãrau bʉ̃ʉrjã khaugba naawai khabam; mag khãai pãrau chadam iek khaphʉ naawaita pãrag mʉg ẽsap phã deepʉi chirʉm. Mag nʉm dʉi pãrau khaphʉ nʉm ĩchab, ar chi seukha nem ĩgkhaajem khʉʉn chan chadam iek ʉkhaajem khʉʉn eem khabam.

²² Pãrau khaphʉ nʉm chijã agá chi seumie chaar. Chi seumie charan, ar Jesús igwia “Jã chan Ẽwandamaucha jʉr auwia pʉitarr Cristo khabajim” a iekhaajem khʉʉnau. Ich magʉm khʉʉnpai khabahab anticristonaan, amach garmuata Cristo dʉi iekkhõr autarr khʉʉn; ich akhʉʉnpaiu ĩchab Ẽwandam chi Aai iekjã ʉkhaba, i Iewaa Cristo iekjã ʉkhaba aajem khʉʉn.

²³ Ar chi Ẽwandam Iewaa Cristo iekjã ʉkhaba simuan waragta Ẽwandam chi Aaijã iseg sim; magarrau ar chadcha Ẽwandam Iewaa Cristo igar simʉn chadau ĩchab chi Aai dʉijã khapeerkha sim.

²⁴ Maguata muan pãragan warrcha pãachdeu maach peerdʉajem iek ʉkhatarrta ich mag pãach thãar ee wai naapi jaau chirʉm. Jãg maach peerdʉajem iekta pãrau pãach thãar ee wai nʉmʉn, pãachchajã ĩchab Cristo dʉi khapeerkhanaa chi Aai dʉijã ich mag khapeerkha wenʉrraju.

²⁵ Ich Cristooucha jaauwaijã maachin ich dʉita ich mag phe wai nʉrraju a jaaujim.

²⁶ Jãg sĩi pãach khũguraag ẽkhaajem khʉʉn gaaimuata mua pãrag khap amkhĩir mʉg phã deepʉi chirʉm.

²⁷ Pari pãrau ich Ẽwandam Akhaarta pãach thãar ee wai naawai muata pãrag jaauju khaba chirʉm, mag pãar thãar ee simuata ichdeu khap pãrag jaaumaawai. Irua nem jaau sim chan seukhaa khaba chadcharau. Maguata ich chi Ẽwandam Akharau pãachig jaaujemjo Cristo dʉita ogdʉba ich jãg nʉisit.

²⁸ Chaaina, deeu pʉaba muan pãragan, Cristo dʉita ogdʉba nʉisit a chirʉm, maagwai deeu i beewaijã i ogkhaju khãyau warag chigag chukhu i dʉi naag.

²⁹ Pãrau khaphʉ nʉm, maach Por Jesucristoou nem agchata ichdeu khap nem waaujem. Maagwai ĩchab khaphʉ aju aai nʉm, thum nem agcha nem waaujem khʉʉnjã agjo Ẽwandam chaainkha nʉm.