1 Juan 1 - Wounaan Meu

Jesucristoouta õor iiupi wai sĩejem

¹ Warr nem thum ompaawaiwe sĩerr igwiata mua mʉg ẽsap phã chirʉm, tagam khʉʉn ich Cristooucha jʉr autarr khʉʉn dʉimua muajã mʉch jʉ̃gʉucha ũrwia mʉch daúacha ootarr jawaag; maachdeuta maach daúacha oonaa maach juaucha i gaai pʉrjim. Wajapcharan magan ar ʉ̃gthar õor oberpiejemma, ich Cristo; i igwiata mua pãrag mʉg ẽsap phã chirʉm.

² Mag ichdeuta õor Ẽwandam aar obeerpiwia ich mag iiupiejemʉn warrgarwejã ich Aai dʉita sĩejeejim; pari magtarrta dau daaucha ich oopien beewia marau maach daúachata i ootarr aawai maachdeu ootarrta jaau nʉm.

³ Mag maach daúacha oowia maach jʉ̃gʉucha ũrtarrpa pãrag jaau nʉmʉn, mʉg maachjã ich Jooi chaar dʉijã khapeerkhanaa chi Iewaa Jesucristo dʉijã khapeerkha nʉmjo ĩchab pãarjã maach dʉi khapeerkhanaa õor ãbpaimjo naamkhĩrau.

⁴ Mʉg thum ẽsap gaai mua phã deepʉi chirʉmʉn, pãachdeujã cha mʉchdeu jaaupʉi chirʉmjo abaawai warag pãach oneecha amkhĩrau.

Ẽwandaman õtdauu

⁵ Pãrag jaaumkhĩir ich Jesucristooucha marag jaautarr iekhan mʉgau: Ẽwandaman õtdau paa dʉnʉmjo araraata sim; i gaai bʉ̃ʉrjã pekau chukhu sĩewai i sim aig chan bʉ̃ʉrjã khĩkhĩsupaijã khaba sim.

⁶ I mag sim dʉita maachin khapeerkha nʉm. Pari mag i dʉi khapeerkha nʉmta maachdeu nem khaigba wau nʉm gaaimua khĩchag eeta wenʉrrʉmjo nʉm chan magan maachin seukhaawaita mag i dʉi khapeerkha nʉm a iekha nʉm. Mag nʉm dʉi ĩchab maachdeu nem waauwaijã khaigbata wau nʉmʉn magan parta mag i dʉi nʉm a iekha nʉm.

⁷ Pari ich jãg Ẽwandamjã pekau chukhu ararag eeta sĩejemjo maachjã ĩchab pekau wauba nʉm gaaimua ararag eeta wenʉrrʉmjo nʉmʉn, magan Ẽwandamau dich khapeen dʉijã õor ãbamjo o ãba apinaa ĩchab ichdeu ich Iewaa Jesucristoog ich bag maach kõit ãrtarrauta maach khaibagjã thumaa chugpaapiejem, ich jãg doou memerkhog ʉawai chugpaajemjo.

⁸ Maadeuta dich igwia bʉ̃ʉrjã pekau chukhum a nʉmʉn, chadcha pekaupanta mag pekau chukhum anaawai, maachdeupaita wir aig maach khũgur nʉm; mag nʉm aig chan chadam iekjã khaugbata nʉm.

⁹ Pari chadcha dich pekau pom nʉm khap irigta chaigpanaa dich khaigba abarm jaaumʉn, magan chadcha Ẽwandamau nem agchata waaujeewai agpierr maach khaibagjã thum chugpaapʉimaju.

¹⁰ Wa sĩi khãijã maadeu maar chan bʉ̃ʉrjã pekau wauba aajem a iekhakhiin, magan jũrr maadeu ich Ẽwandamta seunemeg phe nʉm, i iek mag maachin thumta pekau pom khitheem aajeewai. Mag nʉm aig chan magan maadeu i iek ʉkhabata nʉm.