1 Corintios 9 - Wounaan Meu

Khani jãgju aai nʉ a khap amkhĩir Pabloou ichpai jaautarr

¹ Mʉʉn chadcha ich Cristooucha ich i jaaumkhĩir jʉr autarrau. Magtarr aawai mʉ sĩi chikham jua eegarta khaba chirʉm. Muajã ĩchab mʉchdeucha maach Por Jesús oobajieb; pãachdeujã pãrau khaphʉ nʉm, mʉ mag chirʉmua jaauwia khabahab pãachdeujã chadcha ʉkha durrum.

² Bigaaum khʉʉnau mʉ eugar, “Jã chan ich Cristooucha ich i jaaumkhĩir jʉr autarr khabam” aju. Pari pãraun mʉ igwia, “Ich Jesuucha jʉr autarrau” a iekhaju aai nʉm. ¿Jãgwi? Mʉ gaaimuata pãachdeujã maach Por Jesucristo iek wajapha ʉkha nʉisiewaima.

³ Mʉch eugar mʉch ĩgkha nʉm khʉʉnag mʉch iek ũrmkhĩir mua magkhim:

⁴ Muajã ĩchab warm khʉʉn denjo pãar chi ʉkha durrum khʉʉn jua eem thach dee nʉm khonaa pãar jua eem dodojodamjã doju aai chirʉm.

⁵ Ʉʉijã Ẽwandam iek ʉkha sim dʉi jua pʉrwi mʉch chitʉmpierr wai chitaju aai chirʉm, tagam khʉʉn agjo ich Jesuucha jʉr autarr khʉʉnau aajemjo. Ich Jesús eeugpeenaujã magta aajem, Pedro dʉimua.

⁶ Wa Bernabé dʉi maach numpaita maar ich jãg maach juadamaucha phidkha wenʉrraju aai nʉwa, maach bidam athee. ¿Maarjã sĩi ĩchab pãrau jãhogju aai nʉm khabá?

⁷ Khaíu jaauwai mag soldaaunkha nʉm khʉʉn amach phatkhonauta amach nem ig nʉmjã thum perkha aumaajem aajẽ. ¿Pãrau oowai nemjĩir jĩir nʉm khʉʉnau pod amach nemjĩir eem khoju khaba aajẽ? ¿Phak bãau nʉm khʉʉnau pod chi jũdcho doju khabam a ũurjẽ? Mag khabam. Maachin dich phidkha nʉm gaaimuata thachdamjã kho wenʉrrʉm.

⁸ Mua mag iekha chirʉm ũrwia oob pãrau sĩi mʉch khĩirjug eemuapaita mag iekha chirʉm amiet. Moiseeu Ẽwandam iek phã pʉatarr gaaijã ĩchab ich mag iekpai jaau sim.

⁹ Mag irua phã pʉatarr gaai jaauwai, “Pʉch nemjĩir dau bibthʉg deemkhĩir phak phidkhapi wai chirʉm aig, ag eem khom ugua awia oob i i khõorjʉ̃ sĩum” a phã sim. ¿Maig Ẽwandamau phakta ʉ̃rcha maach khãyaujã dau aug khaugwiata mag iekhajĩ? Mag khabajim.

¹⁰ Ich iek gaai maach phidkha nʉm khʉʉn igwiapata mag iekhajim, mag phidkha nʉmjã par khaba amkhĩir. ¿Pãrau khaphʉ naabá, nemjĩir jĩirwai ag eem khoju khĩirjunaata jĩirjem, maimua chi bibthʉg simuajã khoju khĩirjunaata bibthʉgba aajẽ? Ich agjota sim ĩchab Ẽwandam iekta nemjĩir jĩir nʉmjo jaau wenʉrrʉm khʉʉnjã: Chi ʉkha durrum khʉʉnauta amau ig nʉmjã thum khap aju aai nʉm.

¹¹ Magua mua mag chirʉm. Mʉchdeuta nacha pãar ee Ẽwandam iekta nemjĩir jĩir nʉmjo jĩirimajim. Magtarr aawai maarjã maach juau phidkhaba, sĩi pãrau nem dee nʉm iiupaita naaju aai nʉm.

¹² Warm khʉʉnaun chadcha amau pãar dʉi magta nʉm; pãrau pãachdeujã am dʉi jãg nʉm khai, maar dʉi chará pãrau wajapcha aju aai nʉm. Pari magʉmjã marau bʉ̃ʉrjã pãrag maar dʉi chadcha magta abatjã aba, sĩi khĩu ãwatnaa maach juadamauta phidkha durraajem maachdeu nemdam ig nʉm athee; eeu magba akhiin sĩi maachig nem deemkhĩirta Cristo iekjã mag jaau wenʉrrʉm awia i iek eugarta woun eugarmjo khaigba iyʉʉ adukham.

¹³ Pãrau khaphʉ nʉm, ar Aai i jeeujem deg phidkha nʉm khʉʉnau chadcha ag ee Ẽwandam athee nem thʉnʉm khoju aai nʉm. Wajapcharan Ẽwandamag jewaag nemek thorrphenaa chi nasãd gaai phaajem aig phidkha nʉm khʉʉnau chi nemek mod gayamjã khoju aai nʉm.

¹⁴ Ich agjota maach Por Ẽwandamaujã jaau sim: I iek mag chi maach peerdʉajem iek jaau nʉm khʉʉnan, mag jaau nʉm paar dee nʉmuata wenʉrraju aai nʉm aajem.

¹⁵ Pari magʉmjã ni biekdam ãbjã mua pãrag nem jewaa khaugba chitʉm. Ĩs mʉg ẽsap phã chirʉmjã mʉchig nem deepʉimkhĩirta mʉg phã deepʉi chirʉmjã aba chirʉm. Ãbmua khãijã mʉrʉg, “Oob tag Ẽwandam iek par jawam” akhiin, magan mua jũrr irig, “Pari mʉch khĩrauta mag par jaau chitaawai mʉg chitʉmua jãdaúa thõkhiinjã mʉ gaai mas khaba sim” aju.

¹⁶ Ẽwandam iek jaau chitʉm awiajã mua wir aigpai mʉch thoba chirʉm. Chadcha ich Ẽwandamauchata mʉchig jaaupitarr aawai mua pod irig, “Mua chan jaaubam” aju khaba chirajim. Mua Ẽwandam iekta jaauba sĩukhiin, irua mʉ gaai jua khʉaba deeju. Maigjã, ¡eh, apkhiitʉ mʉdam!

¹⁷ Mua mʉch khĩrauta i iek jaau chitʉm paarjã irua phagab khaba phagju. Pari ichiita jaaumapha awiajã, ich Ẽwandamauta mʉrʉg jaaupitarr aawai, jaauju aai chirʉm.

¹⁸ Magua mʉch khĩrauta mag i iek jaau chitaawai mʉ onee chiraajem, ni Ẽwandamaujã mag par jaaupiba sim ee mʉchdeupaita par jaau chitaawai. Mʉch mag chirʉm gaaimua onee chirʉmta mʉrʉgan ya phatkhonaucha jua ee phagbarmjo sim. Chadcha pãrag nem jeeuju aai chirʉmta, Ẽwandam iek jaauba chitʉmjota bʉ̃ʉrjã pãrag jeeuba chirʉm.

¹⁹ Mʉ chan chikham chog khaba chirʉm, pari mag chirʉmta thumaam khʉʉn chogjota chirʉm, mʉch mag chitʉm gaaimua jũrr õor khapanaacha Cristo iek ʉkhapi aumaag.

²⁰ Judionaan ee chitʉm aig mʉchjã chadcha judiojota aadeejem, amagjã ĩchab dʉi Cristo iek ʉkhapi aum khõchgau. Mua mag chirʉm aiguin mʉgta chirʉm: Ar agtha Moiseeu phã pʉatarr iek ʉ̃rcha ʉʉrkhaajem khʉʉnta Cristo igar thereu awaagan mʉchdeujã agtha am denjo ʉʉrkhaajem. Pari mʉ chan mag Moiseeu phã pʉatarr iekhau phẽethʉgba chirʉmta mag chitʉm.

²¹ Maimua ĩchab judionaan khabam khʉʉn ee maawaijã, am oowai ĩchab amachjota aadeejem. Mag amachjo aadeejem a chirab mamʉ, maach Por Cristoou nem waupiba aajem nem chan bʉ̃ʉrjã wauba chitʉm; sĩi amagjã ĩchab Cristo iek ʉkhapi awaagpaita maagjem. Pari wajapcharan mʉʉn Cristo iek ʉkha chitaawai Ẽwandam ley dʉita chirʉm, ich ag leipai ĩchab Cristo ley aawai.

²² Õor agtha Ẽwandam iek gaai khukhurpaim khʉʉn daarjã amau nem wauju khabam nem wauba chitʉm, amagjã maach Por Jesucristo iek gaai ubʉ apijuuta ẽkha chitaawai. Wajapcharan mʉʉn mʉchta õor ee maawaijã dʉi ĩchab amachjo aadeejem, mag chach oomamua ãaur khʉʉnau khãijã ʉkhabaawai ʉu peerdʉtkhamkhĩir.

²³ Mʉ mag chitʉmʉn mʉʉn mʉg Jesucristo iek jaaum khõchgauta mag chitʉm, mʉch dʉijã ĩchab ich chaain tagam khʉʉn dʉi wajapha aajemjo wajapha amkhĩir.

²⁴ Pãrau khaphʉ nʉm, apostaa khaphig nʉm aig, õor khapan khaphiigjem. Mamʉ chi regaloon ãbpaimua auju simta thumaam khʉʉnau auju ẽkhaajem. Ich agjota sim Ẽwandam sim aar baraagjã. Irua nem wajapham deebarm auju khĩirjuwiata khaphig nʉmjo abat.

²⁵ Chi mag khaphiigjem khʉʉnan sĩi nem inag jopcha ãarjem awaagpaijã amach mor sʉrkha nʉm. Maachjã agjo sʉrkha nʉm; mamʉ mag sʉrkha nʉmʉn jũrr am den khãaijã nem wajapcharamta maachig deemkhĩrau. Ma chan ãrjã ãrba ni ojã oba ich mag sĩerraju.

²⁶ Mag khĩirjuwiata mʉʉn mʉch appaijã khaphig chirʉmjo chiraajem, mʉch barju aar baraag. Mag nʉm dʉi ĩchab õrau chikham phãr thʉnʉwaag werbʉ nʉmjota aajem.

²⁷ Wajapcharan Ẽwandamau nem jaau sim ichaaur amaaugau, mʉʉn mʉch wawí chirʉmuata ajués sʉrkha chiraajem, parhoob nem wauba aag. Magba akhiin mʉch garmua õrag Ẽwandam iek jaau chitʉʉ aajerrta, jũrr Jooirau mʉrʉg nem deeju atarrta ĩgkha auju.