1 Corintios 8 - Wounaan Meu

¿Ẽwandamnaan anʉm na nemek wai narr khoju aai nʉ?

¹ Ĩsin chad pãrag jaaukhim, ar na pãrau mʉrʉg jeeu narr: Ẽwandam awi agʉg jeeu nʉmua ag khĩirphee nemek wai narr khoju aai nʉ wa khoju aai khaba nʉ a jeeu narr. Mag iek aawai chadcha thumaam khʉʉnau khaphʉm aajem. Pari maadeu dichdeu nem khaphʉmta ig wenʉrrʉmʉn, magan dichdeupaita dich tho nʉm. Pari magba maadeu dich khapeenta daupii wai nʉmʉn chadau Ẽwandam iek gaaita maadeu am khĩirjugjã bãaupi nʉm.

² Ãbmua khãijã “Muan chadau khaphʉ chirʉm” a iekha simʉn, magan magua chan chadcha ichdeu nem khaphʉ aju aai simjã khaugbata sim.

³ Mamʉ mag nem inag pomta ʉ̃rcha khaphʉ aju khĩirjuju khãyau, ãba Ẽwandam khõsi ajuuta ẽkhaju aai nʉm, mag i khõsi nʉm gaaimuata i dʉi khapeerkha naawai.

⁴ ¿Õrau juau nem wautarrta ẽwandam awia agʉg jeeu nʉmua ag khĩirphee nemek wai narr khoju aai nʉ wa khoju khaba nʉ? Maadeu khaphʉ nʉm, õraun juau nem wautarrta ẽwandam anaab mamʉ, bʉ̃ʉrjã baleeba sĩsidʉm. Maach Ẽwandam charan ãbpaita khitʉm.

⁵ Õragan mʉg jẽb gaai ẽwandam anʉm khʉʉn khapan thʉnʉm, edjã eem magwe. Mag ẽwandamnaan anaa chi pornaan anʉm khʉʉn khapan thʉnaawiajã,

⁶ maach atheyan Ẽwandaman ãbpaita khitʉm, Ẽwandam chi Aai. Ichdeuta nem thʉnʉmjã thum ompaa aujim. Magua maachjã i atheepaita wenʉrrʉm. Maach Porjã ãbpaita sim ĩchab; ma, Jesucristoou. Nem thum thʉnʉmʉn ãba i gaaimuata thʉnʉm. Maachjã ĩchab i gaaimuata ʉu peerdʉ durrum.

⁷ Maachdeu khaphʉ nʉm, mag Ẽwandam ãbpai simta maach Porkha sim. Mamʉ ar õrau am ẽwandamnaan anʉm khʉʉn chan bʉ̃ʉrjã baleeba sĩsidʉm. Pari thumaam khʉʉnau chan magʉm khaugba nʉm. Ãaur khʉʉn warr Ẽwandam iek ʉkhaba aawai nem parhoobamʉg jeeu narr khʉʉnaun agtha chi nemekjã kho nʉm, chadcha deeum ẽwandam chi iwam khĩirpheeta wai narrpii awia. Pari am agtha Ẽwandam iek gaai khukhurpai naawai, amachdeu khĩirjuawai mag kho nʉmuajã agʉgcha jeeu nʉm dʉi ãba sim a khĩirjuajem. Mag khĩirjubaadem aigta amachdeupaita amach khaigba nʉmjoo khĩirjuajerram.

⁸ Pari maadeu khaphʉ aju aai nʉm, ĩs mag dich thach kho nʉm gaaimuata mag Ẽwandam najã maach ʉu wenʉrrʉmjã abam. Magʉm nemek mod maadeu khokhiinjã, warm khʉʉn khãai wajapchajã wenʉrrabaju. Wa khoba akhiinjã, maachta warm khʉʉn khãaijã khaigbacha wenʉrrajujã abam.

⁹ Mamʉ nem parhoobamʉg jeeu nʉmua nemek wai narr pãachdeu khoju aai nʉm awiajã, wajapha khĩirjunaata khobat, eeu pãach mag nʉm gaaimua ar Ẽwandam iek gaai agtha ubʉcha khaba durrum khʉʉnta jũrr pekau ee burrpidukham.

¹⁰ Pua khaphʉ sim, magʉm nemek mod kho nʉm khaigba khaba sim. Mamʉ pʉchdeu mag khaphʉ chirʉm awia, dich hermano agtha Ẽwandam dʉi ubʉ khaba sim dakhĩir mawia nem parhoobam khĩirphee nemek mod wai narrta khokhiin, ich dakhĩir mag khobaawai ¿iruajã agjo khom khõs khabaju khai? Irua mag oowai pʉ denjo khomʉn,

¹¹ magbarm gaaimua pua pʉch hermano agtha Ẽwandam iek athee khukhuraa khitʉmta sĩi okhoopimjo okhoopiju, majã i gaaimuapata ĩchab Cristooujã ʉdʉraa ich thõopitarrta.

¹² Maach hermanonaan Ẽwandam iek gaai agtha ubʉcha khaba khitheemta pekau ee burrpiewain, ich Cristo dʉichata iekkhõr paarpa nʉm.

¹³ Magam uguata, mua oowai mua nemek kho chirʉm gaaimua khãijã mʉ hermano imeraa pekau ee burrpiju sim khai, warag mʉchta bʉ̃ʉrjã nemek khoba ich mag chitaju. Magba akhiin mua nemek kho chirʉm gaaimua i pekau ee burrju.