1 Corintios 7 - Wounaan Meu

¿Jua pʉrju aai nʉ wa jua pʉrju khaba nʉ?

¹ Na ar pãachdeu mʉrʉg ẽsap deepʉitarr gaai jua pʉrju aai nʉ wa jua pʉrju khaba nʉ a jeeu narr, ĩsin chad mua pãrag jaaukhim: Mʉrʉgan, emkhooin ʉʉin auba ich jãg amach appai wenʉrrakhiin nem wajaug sim.

² Mamʉ jãg amach õor khabam dʉijã sĩi parhooba aadephʉm gaaimuata emkhooinjã agdaujo amach ʉʉin dʉi sĩsidnaa chi ʉʉinjã agdaujo amach jaain dʉi sĩsid aju aai nʉm.

³ Ya mag ãba nʉisiewai, chi emkhooirau khõsi aadeewai chi ʉʉiraujã ĩgkhaba, maimua chi ʉʉirau khõsi aadeewaijã ich agjo chi emkhooiraujã magʉm aba aju aai nʉm, ya dich õor dʉita naawai.

⁴ Wa chi ʉʉirau khãijã, “Mʉch mor aawai mʉ jayaujã khaugba sim” a iekhaju khaba sim, warramjo pʉch appai khaba sĩewai. Ni chi emkhooiraujã pod, “Mʉch mor mʉch gaai wai chiraawai mʉchdeu khõsi aadeewaita magju aai chirʉm” aju khaba sim, pʉjã ĩchab pʉch apham khaba aawai.

⁵ Mag jũrr agdaujo chikham denkha naawai, ãbmua khõsi sim aig pod iwiir ãbmua, “Mua khõchkhabam” aju khaba sim. Pãrau khapes aba ãwat auju aai nʉmʉn, khãaidam khapanaa khãijã maach Ẽwandamag jewaagpaawai agdaujo sʉrkha auju aai nʉm a iekhawian chadau sʉrkhaju aai nʉm. Pari ya mag jeeu dichdimaawain chadau ũwaai pãachdeu waum khõsim aig waubat. Eeu magba akhiin, khãai khapan pãar magʉm khaugba nʉisiewai jũrr meperau deeum dʉi khãijã pekau waupidukham.

⁶ Mag chirʉm chan, mag ichiita ẽwannaan thum pãach ʉʉin aupetat aba, wa chi ʉʉinag khãijã thum jaain jʉrkhabat aba chirʉm. Mag khõs amʉn ʉuma; mag khõchkhabamʉn ich agjo nem wajaug sim.

⁷ Mʉch odiiupain muan pãarjã thumaa mʉchjota pãach appai naapim khõsi chirʉm. Mamʉ Ẽwandamau maachig agdaujo ich jua theeg deejem, mag deebarmua agdaujo dichig deemarrpierr ich atheeta nem waumkhĩir.

⁸ Pari mua ar agtha amach apha thʉnʉm khʉʉnag maimua khoopaa ʉʉinagjã agjo, “Mʉjo pãar ich jãg pãach appaita wenʉrrakhiin ʉu akham” a chirʉm.

⁹ Mamʉ pãrau pãach o khõchag pod ãwatbaju nʉm khai, warre pãach ʉʉidamcha athat; maagwai ʉʉinaujã agjo warre pãach jaaindam aupetat. Warre dich õor dʉicha nʉisiewai ʉucha sĩebahab, sĩi magʉm khõchag aadephʉmjã ich mag ãwat wenʉrraju khãai.

¹⁰ Pari ya ar amach õor dʉi nʉm khʉʉnag mua mag chirʉm. Ya ma chan sĩi mʉch iiupaijã khaba, maach Por Jesuu mag jaaupi sĩewaita mag jaau chirʉm: Pʉch chi ʉʉiraujã oob pʉch jaai pʉa ʉrram.

¹¹ Mamʉ pʉch jaai pʉawiajã, tag deeum jaaijã auba, ich magta ʉrraju aai sim. Mag ich mag pʉch appai ʉrramapha ʉmʉn, magan deeu pʉch jaai dʉita phʉʉrbaju aai ʉm. Maagwai pʉch chi emkhooiraujã pod pʉch ʉʉi pʉaju khaba, ni deeum ʉʉijã auju khaba sim.

¹² Mag tag deeum nemdam mua pãrag jaaum ig chirajim; ya ma chan maach Por Jesuu jaaupi sim khabam, maan sĩi mʉch khĩirjug eepaimʉu. Mamʉ mʉchdeu khĩirjuawai chadcha magta aju aai sĩewaita pãrag jawaagpam: Maach hermanonaan eem ãbmua khãijã ʉʉi wai sim, pari mag ʉʉirau Ẽwandam iek ʉkhaba sim; mag khitʉmuata ich jayag ich pʉapimapha sim chan, mag hermanoou pod mag ʉʉi pʉaju khaba sim.

¹³ Wa magba ʉʉi ãb Ẽwandam iek ʉkha sim jayau khãijã jũrr Ẽwandam iek ʉkhaba sim; mamʉ ich ʉʉi ya ag dʉi khaug sĩewai ich pʉapimapha sim chan, mag ʉʉiraujã pod mag emkhooi pʉaju khaba sim.

¹⁴ ¿Jãgwi? Chi emkhooirau ʉkhaba sĩewia khãijã ya jũrr ich chi ʉʉi gaaimua Ẽwandamau tag sĩi bigaaum khʉʉnjocha khaba ʉu i eeg oo sĩewaima. Wa magba chi emkhooirau khãijã wajapha ʉkha simta jũrr chi ʉʉirauta Ẽwandam iek ʉkhaba sim khai, ich agjo chi jayau pod pʉaju khaba sim. Magba akhiin Ẽwandamau ich jaai gaaimua ʉu ijã agjo eeg oo simta pʉaju. Wajapcharan mag chi Ẽwandam iek ʉkha sim gaaimuata warm khʉʉnjã ichjo Ẽwandam denkhapiejem. Magba akhiin pãar chaainjã sĩi bʉ̃ʉrjã Ẽwandam iek ʉkhaba aajem khʉʉn chaainjota sĩsid aju. Mamʉ ʉu ãbmua ʉkha kherʉm gaaimua ya ĩchab amjã ich denkhaímʉ ich denkha aaujem Ẽwandamau.

¹⁵ Mamʉ mag jũrr iwiir ãbmua Ẽwandam iek ʉkhaba sĩewai chi ʉkhaba sim garmua pʉam khõchag thʉnʉm khai, ideu pʉch pʉapibá. Chi ʉkha simua ʉkhaba simʉg pod, “Pua chan mʉ pʉaju khaba sim” a iekhaju khaba sim. Ich mag ogdʉba wenʉrrʉm chan khõinaa wenʉrrabaju. Pari Ẽwandamau maachig khõinaata wenʉrrapi jaau sim.

¹⁶ Magua mag chi ʉkhaba sim garmuata dich iseg nʉmjã, okhar dich denjo ʉkhapi auju awi ogdʉmapham gaaimua khõinaa khaba wenʉrrʉm khai, ich garmuata ideu pʉch pʉapibá. Magba akhiin ich mag khõinaa khaba wenʉrraju. Chadcha mag ʉkhaju awiajã, jãga pua mag irua ʉkhaju khaphʉ sĩ, mag gaaimuapai mag khaigba nʉmta ogdʉba wenʉrraag.

¹⁷ Pari muan iglesiapierr õor nʉnʉidʉm khʉʉnag mʉgta chirʉm: Mʉrʉgan pãachdeu Ẽwandam iek ʉkhaawai narrjota naaju aai nʉm. Mamʉ mag wenʉrrʉmua Ẽwandam Akharau pãachig ich jua theeg deemarrpierr i atheeta nem waubat.

¹⁸ Pua Ẽwandam iek ʉkhaawai judionaanau amachta Ẽwandam chaainkha nʉm khap amkhĩir aajemjo meheu phʉʉrbich chirarr khai, ich mag chirsí. Wa phʉʉrbichba khãijã chirarr khai, oob phʉʉrbichpim.

¹⁹ Judionaan denjo phʉʉrbich sim khai, ʉu sim; pari phʉʉrbichba sĩewiajã ich agjo nem wajaug sim. Mamʉ Ẽwandamau magʉm gaaimuata maach ig sim abam. Magarrau chadcha wajapha simʉn, Ẽwandamau ich iek gaai jaau sim ipierraa nʉmʉn chadau wajapcha sim magʉm phʉʉrbich nʉm khãaijã.

²⁰ Ẽwandamau maachig ich iek ʉkhapi aauwai maach narrjo ich magta naaju aai nʉm.

²¹ Irua pʉrʉg ich iek ʉkhapi aauwai pʉ sĩi chikham chogkha sĩerr khai, khani pua tag khĩirjuju. Pari pua oowai ʉu pʉ pʉch patrón jua eemua oberju ayaa oo wai sim khai, oob par daúapai oom.

²² Pari Ẽwandamau ʉ̃rcha magʉm khĩirjupiba sim. ¿Khan jãgwi mua mag chirʉ́? Pʉ ich mag chikham chogkha sĩsiwiajã, ichiita pekau maadeu oomaug sim chogkha sĩerr jua eemta maach Por Cristoou pʉ peerdʉ autarr aawaima. Pari mag chikham chog khaba arr awiajã, mag Cristoou pʉ peerdʉ autarr aigmuan pʉʉn jũrr i chogta kha sĩsim.

²³ Pãran thum Jesucristo bag ãrtarrauta Ẽwandamau pãar perkha aujim; maagwai ya pãran i deneu. Chadcha mag khai, magan sĩi mʉg jẽb gayam khʉʉn khĩirjug igba, ãba i iekpaita ũrbat.

²⁴ Ẽwandam gaaimua khodamnaan, pãachdeu Ẽwandam iek ʉkhaawai narrjo i na ich mag wenʉrrathʉ̃.

²⁵ Daupeen ar agtha õor meraam khʉʉnag iekhaag chan, maach Por Cristoou mʉrʉg jaauba arr aawai, wajappai iekhaju chukhu chirʉm. Pari mʉrʉgan mʉgta sim: Mʉjã ĩchab maach Por Cristoou juapá deewia i dʉi ubʉ chitʉmuata jaau chiraawai pãrau ʉkhaju aai nʉm. Ũrbat:

²⁶ Ĩs ewagan warag phithuurga paaukhamaawai mʉrʉgan maachin cha maach nʉmjopaita ich jãg wenʉrraju aai nʉm.

²⁷ Ʉʉi wai chirʉm khai, oob pʉch ʉʉi pʉam. Ẽwan chirʉm khai, oob jopkharraa ʉʉi auju khĩirjum.

²⁸ Pari pua ʉʉi auju khĩirjubaadewi warre ag dʉi jua pʉrmʉn pekau khabam. Wa chi ʉʉirau khãijã ich jaaipaju dʉi jua pʉrwiata pamʉn, ich agjo pekau khaba sim. Magba ya pãach õor dʉi paaukhabaadeewai, warr pãach appai aawai naajerrjo khaba, phithuurga aju. Mag pãach phithur apimaaugauta mua pãrag mag jaau chirʉm.

²⁹ Ĩchab mua pãrag magam ig chirʉmʉn mʉgau keena: Khĩir eyaa abat, mʉg jẽb gaai chan ya tag maach pom wenʉrrabaju. Mag ya maach Por Cristo beeimʉʉ sim aawaita, ʉʉi paraa chirawiajã, dich ʉʉi dʉipaita ogdʉba khekheu aju khãyau, ʉ̃rcha maach Por Cristo atheeta nem wajapha wauju aai nʉm.

³⁰ Okhĩirjuu nʉm khʉʉnjã, maach Por Cristo beeimʉʉ sim khaphʉ aawai oob atcha khoopaan sʉrkha nʉm khʉʉnjo amiet. Maimua ar onee nʉm khʉʉnjã, mag i beeimʉʉ sim khaphʉ naawai, oob dau lokoo amiet. Amach phatkhonau nem per au nʉm khʉʉnjã, oob ag dʉi ich mag eumeeju khĩirjumiet.

³¹ Mʉg jẽb gaaim nem athee por wajapha aajem khʉʉnjã, magʉm nem chukhumjo ãba Ẽwandam athee nem waujuuta ẽkhabat. Maadeu khaphʉ nʉm, mʉg jẽb gayam nemen thum owia ich mʉg durrjã chukhu aadeju.

³² Magua mua chan pãrag mʉg jẽb gayam nemta ʉ̃rcha khĩirju nʉʉ apimapha chirʉm. Ẽwannaan ʉʉinpan khãyau jua par nʉm, maach Por Cristo athee ʉ̃rcha nem wajapham waunaa i dau na wajapha wenʉrrajuuta khĩirju nʉʉ aag.

³³ Mamʉ mag khãyau jũrr ʉʉi paraam magcha jua par khaba sim Ẽwandam athee, í ichdeuta amachdeu nem ig nʉmjã khaphʉ agpierr nʉnʉʉu awia ich ʉʉi dʉijã ogdʉba sĩsiphʉm aawai. Wajapcharan ʉʉi paraa simʉn thoophem numí simjota sim, Ẽwandam atheejã nem waunaa ich ʉʉi dʉi sĩsip aagjã agjo.

³⁴ Ʉʉijã ĩchab ich agjota sim. Chi ich ap simua ãba maach Por Jesucristo dau na nem wajapha wauju khĩirjugta khĩirju sim, ich mor maimua ich akhaarjã Ẽwandam atheeta wai sĩewai. Pari jaai paraamua magbaju, irua degam nem gaaijã pʉrnaa ĩchab ich jayau nem mag abaawaijã agpierr aadep sim aawai.

³⁵ Mua mag chirʉm chan sĩi pãar jaain jʉrpimaaugaujã khaba, pãach ʉu wenʉrramkhĩirta mag chirʉm; mag õor dʉi paawaijã magʉm gaaimua amach apham khʉʉnjo jua parcha khaba aawai pod Ẽwandam athee wajappai nem waubaju khaphʉ chiraawaita mag chirʉm.

³⁶ Pari ãbmua khãijã, “Ya mʉ chi jooi chiraawai mʉch ʉʉidam auwia ag dʉita mʉ ʉu chirsiju” a khĩirju sim khai, ichdeu khĩirju simjo aju aai sim. Magan ichdeu iek dee wai sim ʉʉi dʉi warre jua pʉrju aai sim; mag jua pʉrbarm pekau khabam.

³⁷ Pari deeum agjo chi jooi ẽwan sim, magua khĩirju sĩi awia, “Mʉ ich jãg mʉch ap ʉʉin khĩirjã khaugba chitaju” amʉn, magan mag ichdeu khĩirju simjo aju aai sim, ʉʉi auba; magjã nem wajaug sim.

³⁸ Wajapcharan mʉgta sim: Ya pãach jaai awaag, wa emkhooirau khai ichdeu iek dee wai sim dʉi warre jua pʉrwiata pamʉn nem wajaug sim. Mamʉ jaai auba, maimua chi emkhooiraujã ʉʉi auba, pãach appai wenʉrrʉmjã pekau wauba wenʉrraju awia jua pʉrba akhiinjã wajapcha sim.

³⁹ Ʉʉi jaai paraamʉn, chi jaai meebam aiguin ich jaai gaai jʉ̃gadau jʉ̃ simjota sim, pod pʉajujã khaba. Magarrau chi jaai meebaadeewain chadau ich ap sĩsiewai deeum jaai auju aai sim. Pari majã parhoobam khʉʉn dʉijã khaba, agjo Ẽwandam iek ʉkha sim dʉita jua pʉrju aai sim.

⁴⁰ Pari mua khĩirjuawai mag khoopaa ʉʉi tag jaai auba ich appai nʉrrakhiin, í oneecha ʉrraju. Maau mʉ khĩirjugan. Mua pãrag mag iekha chirʉmʉn, mʉchdeupai khĩirjuawaijã chadcha Ẽwandam Akhaar mʉch gaai wai chiraawaita pãrag mag chirʉm.