1 Corintios 6 - Wounaan Meu

Juez Cristo igar khabam khʉʉn na iekkhõr eudʉ nʉm

¹ Jãga jãg pãar pãach Ẽwandam iek ʉkha nʉm khʉʉn aphajã iekkhõr aauwai, chi thethemnaan pãach eem khʉʉnjã igbanaa warag bʉ̃ʉrjã Ẽwandam iek ʉkhabam khʉʉn aarta weetjẽ, makhʉʉnagta pãach iekkhõr wai nʉm jawaan.

² ¿Pãrau khaugba nʉ, mʉg maach Ẽwandam iek ʉkha nʉm khʉʉnauta mʉg atag mʉg jẽb gaai Ẽwandam iek ʉkhaba arr khʉʉn khaibag maach ipaarmua Ẽwandamag jaau thʉnʉʉuju? Mag maachdeuta am khaibag waujujã Ẽwandamag jaauju nʉmta, jãgwia ag khãyau mʉg jẽb gayam nem phithur khabamjã pãrau podba nʉ.

³ ¿Pãrau khaugba nʉ, ʉ̃gthar Ẽwandam chognaan thʉnʉm khʉʉnjã maach khãai eegpai thʉnʉisiju, maachta Ẽwandam dʉi ãba am pornaankha nʉisiju aawai? Maachdeuta magju khai, magan mʉg jẽb gayam iekkhõr chará ag khãaijã phithurg chukhu wajaphata waupʉpʉi aju aai nʉm.

⁴ Magua mua pãrag mag chirʉm: Bʉ̃ʉr abarm gaaimua pãach eepai iek phithurg aadeewai, ¿jãgwia pãrau pãach eepaim khʉʉnta chi jueznaan khamkhĩir jʉr auba aajerrá, sĩi Ẽwandam iekjã ʉkhabam khʉʉnagta pãach jusgaapiju khãyau?

⁵ Juau ogthom pãar khĩir naaumkhĩirta chadcha mua pãrag mag iekha chirʉm. Mag khõs aawaita pãrau jãg bigaaum khʉʉnta jʉr ahau aajem. Mua khĩirjuawai pãar ee magʉm iekkhõr oberbaadephʉm paar iekhaagjã pãach eepaijã chi thethemnaan thʉnʉm, ¿jãgwi magʉm khʉʉnta jʉr auba aajerrá?

⁶ Wajapcharan mag wir aig pãach hermanonaan eepai meeukha nʉmpaijã khabam; mag meeukhanaa ag iek eudʉagpaawaijã jueznaan Ẽwandam iek ʉkhabam khʉʉn aarta wetwia mamta magʉm iekjã eudʉajerram.

⁷ Sĩi jãg pãach eepai bʉ̃ʉr abarm gaaimua khĩir auphobaadephʉmpaijã khaigbata sim. Pãach khapeenau pãach dʉi warag khaigba aawaijã, parhoobam khʉʉnagta jaauju khãyau, ¿jãgwia warag sĩi magʉm khĩu ãwatpʉiba aajẽ? ¿Jãg pãach nem khãijã jĩgkhaawai warag ʉdʉraa okhoopiba aajẽ, thumaam khʉʉnag khakhapdo apimaaugau?

⁸ Mamʉ pãrau magba, warag pãach garmuata pãach hermanonaan eepaijã nem wauju khabampa waunaa am nemdamjã khũgur aumaju ẽkhaajem.

⁹ ¿Pãrau khaugbata nʉ, jãg nem khaigba waaujem khʉʉn pod Ẽwandam sim aar wetju khabam? Oob ʉdʉʉr pãach khũgurpimiet. Ar dich õor khabam dʉita parhooba khapese aajem khʉʉn, amach õor dʉi sĩsidʉmta deeum dʉi aajem khʉʉn, nem parhoobamʉgta ẽwandam awia jeeujem khʉʉn maimua ar amach emkhooin aphajã ʉʉin dʉímjo waaujem khʉʉnjã Ẽwandam sim aar pod oberbam.

¹⁰ Mag tag thʉnʉm: nem jĩgkhaajem khʉʉn, phatkhon khĩrag bĩe sĩerrjeem khʉʉn, nag piim khʉʉn, parhooba chikham khĩir iekhaajem khʉʉn maimua ar seukha chikham khũgurnaa chikham jua eem nemjã khecheu aumaajem khʉʉn, magʉm khʉʉnjã ni ãbjã Ẽwandam sim aar oberbam.

¹¹ Ãaur khʉʉn pãar ee cha mua jaau chirʉmjota thʉnaajim warrgar. Mamʉ ĩs ya maach Por Jesucristo gaaimua ich Ẽwandam Akharau ya pãar khaibag thum ʉpʉiwia ich atheepaita nem wajapham appai wau wenʉrramkhĩir pãar jʉr aujim. Mag nʉm dʉi warr pãar i dʉi iekkhõr pom wenʉrrarrjã, maach Por Jesucristoou Ẽwandam Akhaar dʉimua ʉu pãar peerdʉ auwia pekau chukhu arrjo pãar wai sim.

Maach moron Ẽwandam sĩejem diiu

¹² Pãar ee ãaur khʉʉnau maagjeebma: “Muan mʉchdeu nem waum aig wau chitʉm; magʉm paarjã, khaíu mʉrʉg magʉm abarju” aajem. Chadcha ich magma. Mamʉ maadeu nem wau nʉm thum maach athee ʉu khaba sĩerrʉm. Magua, muajã mag mʉchdeu nem waum aig pod waubam; mua magkhiin magʉm nem wauju khĩirjugta warag mʉ ʉ̃rpaju.

¹³ Ĩchab ãaur khʉʉnau pãar ee maagjem: “Phiejãban khoog atheeta waaujem; maagwai maach bi thachdam kho nʉm atheeta Ẽwandamau deejim” aajem. Ma chadcha khoog atheema phiejãban, maagwai mag thach kho nʉmjã pekau khábama; pari ichiita Ẽwandamau magʉm thum chukhu apʉiwia maach bijã jẽbeg paapʉiju. Pari mag maach bi thach atheem awiajã, maach mor chan sĩi dich õor khabam dʉi parhooba khapes amkhĩir khabajim. Maach moron maach Por Jesucristo atheyau, thum ichdeu nem waupi sim wawaag. Maagwai ich Jesucristo, jũrr maach mor atheyau, í maach mor ee sĩejeewai.

¹⁴ Maguata ich jãg Ẽwandamau ich Jesús phiriu autarrjo, maachjã agjo ich mʉg cha maach nʉmjo deeu phiriutkha auju.

¹⁵ ¿Pãrau bʉ̃ʉrjãta khaugba nʉ, maach thumaam khʉʉn morta jũrr Cristo morkha sim? Mag simta, ãbmua khãijã ʉʉin parhooba durpa theeg sĩerrjeem khʉʉn dʉi akhiin, maach mor mag Cristo morkha simta jũrr mag ʉʉirag dee naabahab.

¹⁶ ¿Pãrau khaugba nʉ, jãg ʉʉin chi durpathierrmie dʉi nʉm aig, ya maach i denkha nʉisip nʉm, maagwai jũrr ichjã agjo õor ãbpaimjo maach denkha sĩsip sim? Ẽwandam iek phã sim gaai jaauwai, “Warr jaai khaba aawain numí narrta, jaaikha nʉisiewain õor ãbpaimjota aphobaadem” a sim, “jũrr agdaujo warm denkha nʉisim gaaimua.”

¹⁷ Ich agjota naabahab maachjã ĩchab Cristo denkha nʉisim aig. Ãb khãijã maach Por Jesucristo dʉi sĩsiewain, magbarm aigmua maadeu i oobahab mamʉ i Akhaar maach ee sĩeichem gaaimua warag maachin i dʉi õor ãbpaimkha i denkha nʉisim.

¹⁸ Oob pãach õor khabam dʉi khapese amiet. Deeum pekau waauwai chadcha Ẽwandam na maach khaigba api sĩeb mamʉ, jãg dich õor khabam dʉi khapese anʉmjocha khaba sim. Maach mor mag Cristo atheeta sĩewai, jãg dich õor khabam dʉi khapes aawain, wir aig dichdeupaita dich khaibag wau nʉm, deeum dʉi nʉmua dich mor Cristo denkha simta ãrpi naawai.

¹⁹ ¿Pãrau khaugba nʉ, mʉg maach Cristo iek ʉkha nʉm khʉʉn mor ĩchab Ẽwandamau maachig ich Akhaar deetarr ag sĩejem dikha sim? Ẽwandam Akharan chadcha maach eeta sĩejem. Mag í maach ee sĩejeewai maach mor chan maach den khabam.

²⁰ Chi morkhʉʉn Ẽwandamau, ichdeuta maach perkha autarr aawai. Maguata dich morjã ãba i atheepaita wai naaju aai nʉm, bigaaum khʉʉnaujã mag oowia Ẽwandam wajapha ig iyʉʉnaa maach eugarjã wajapha iekhamkhĩir.