1 Corintios 5 - Wounaan Meu

Jãga aju aai nʉ jãg sĩi parhooba thʉnʉm khʉʉn dʉi

¹ Jaau nʉm khʉʉn iek mag pãar ee ãbmua ich bãaurr ũanpaita ich ʉʉikha wai sim anʉm. Jãgʉm pãar dak nem wajaphampa, jãgʉm pekau chan ni Ẽwandam iek khaugbam khʉʉn eejã ooba aajem.

² Mag nʉmta pãrau pãachdeupain Ẽwandam iek wajapha ʉkha nʉm aajerram. Mag iekhaju khãai warag pãar chigaa aju aai nʉmta, chigaa khabamjo nʉm. Chi mag sim wounan warre pãach eemua jʉrpʉiju aaita sim.

³ Mʉ chan chadcha khĩircha chan pãar aar khaba chirʉm, mamʉ mʉchchata pãar aar chirʉmjo mʉch iekta maach Por Jesucristo iek gaai thʉwi mua warre pãrag jaaukhim. Mua oowain jãgʉm khʉʉn dʉin magta aju aai sim.

⁴ Pãar cha mua jaau chirʉm iek iekhaag ãba biirdʉawai khĩircha chan pãar aar khaba chirajup mamʉ mʉ akharan pãar aar sĩeju. Mag mʉchta pãar aar chirʉmjo chirʉm dʉi ĩchab maach Por Jesús i jua theegjã pãar dʉi sĩeju.

⁵ Mag wajapha iekhawian chadau chi mag ich bãaurr ũan dʉi sĩerr woun warre pãach eemua jʉrbapʉit, dosãtagta i dʉi ichdeu ampierr amkhĩir. Magbaawai ãsie ich daujã merag phewia deeu ewag phʉʉrbawia ubʉ sĩsimʉn, maach Por Jesús beem edjã ʉu i akhaardam peerdʉ auju.

⁶ Pãar ee jãg khaigba nʉm chan, pãachta wajapha nʉm awia pãrau pod pãach tho iyʉʉ aju khaba nʉm. Jãgbaadephʉmjã sĩi oobamjo bʉ̃ʉrjã iekhaba ich jãg sĩsiu akhiin, ãbpai mag sim gaaimua warag tagam khʉʉnpata ãrju, levadura bʉchkhun arin ee pʉibarmua warre thum aaidʉ joopjemjo.

⁷ Pãrau khaphʉm, phiesta Pascua ee paawai levadura thum barkhʉʉijem. Ich agjo khabahab Cristo meetarr gaaimua maach khaibag chugpaa athamjã. Mag sĩewai mag levadura denjo pãach thumaam khʉʉn ãrpi sim woun warre pãach eemua chawag jʉrbapʉit. Mag jʉrbapäaiwain chadau Pascua ee khoog pan levadura chukhu wau simjo pãar eejã mag khaigba nʉrrjeem gaaimua levadura denjo bigaaum khʉʉnpa ãrpiju khʉʉn chukhu aju.

⁸ Mag phiesta Pascua ee aajemjota maach Ẽwandam dʉi wenʉrraju aai nʉm. Wajapcharan dich khaibag thum isegwia ãba khĩirjug wajapham auwia chadam iek gaai jaau simjo wenʉrrʉmʉn, pan levadura chukhu wau simjota nʉm. Pari magba agtha dich khaigba nʉm khaphʉ nʉmjã isegba ich mag wai wenʉrrʉmʉn, magan sĩi agtha Ẽwandam iek khaugbam khʉʉnjota nʉm.

⁹ Napem mʉchdeu ĩchab pãrag ẽsap phã deepʉitarr gaai mua pãrag, “Jãg amach ʉʉin khabam dʉijã khapese aajem khʉʉn dʉi chan oob khapeerkhamiet” a chirajim.

¹⁰ Pari mua mag chirʉm chan mag ar parhooba khapese aajem khʉʉn, wa phatkhon athee bĩe sĩerrjeem khʉʉn, nem jĩgmien wa nem parhoobamʉgta Ẽwandamagamjo jeeujem khʉʉn igwiata mag warre am dʉi iekhajã iekhaba ni amag oobamjo abatjã aba chirajim. Mʉg jẽb gaai nʉweran ichiita am dʉi maach ich jãg wenʉrraju.

¹¹ Mua mag chirarran, ar pãach eepaijã hermanonaan anʉm khʉʉnta mag parhoobanaa phatkhon atheejã bĩe thʉnʉm khʉʉn, nem parhoobamʉgta ẽwandam awia jeeu nʉm khʉʉn, parhooba chikham khĩir iekhaajem khʉʉn, nag pig sĩerrjeem khʉʉn maimua nem jĩignemjã sĩerrjeem khʉʉnta jaau chirajim. Ar mag thʉnʉm khʉʉn dʉi chan ni sĩi thach khoogpaijã oob am dʉi ãba ohoodo amiet.

^12-13 Chadcha ar sĩi hermanonaan khabam khʉʉn igwia chan pod mua, “Aman magta sĩerrjeem” aju khaba chirʉm. Am mag jaaujuun ich Ẽwandamauta jaauju aai sim. Pari ichiita pãrau pãach eepaim khʉʉn dʉin chadau pãachdeu khap nem inju aai nʉm. Magua mua pãrag, “Jãg pekau pom sim warre pãach eemua chawag jʉrbapʉit” a chirʉm.